સમગ્ર ગુજરાતનમાં હાલ વરસાદી માહોલ જામ્યો છે ત્યારે ઉત્તર ગુજરાતમાં પણ હવે ભારે વરસાદ પડશે તેવી હવામાન વિભાગે આગાહી કરી છે. જેના કારણે બનાસકાંઠા સહિતના જિલ્લાઓમા તંત્ર એલર્ટ મોડમાં આવી ગયું છે.
ઉત્તર ગુજરાતમાં ભારે વરસાદની આગાહી
બનાસકાંઠામાં ભારે વરસાદની આગાહી
વરસાદની આગાહીને લઈ તંત્ર એલર્ટ મોડમાં
સમગ્ર ગુજરાતમાં હાલ મેઘરાજા મહેરબાન થયા છે. ત્યારે બનાસકાંઠામાં ભારે વરસાદની આગાહી હવામાન વિભાગ દ્વારા કરવામાં આવી છે. જેને લઈને તંત્ર એલર્ટ મોડમાં આવી ગયું છે. તંત્ર દ્વારા ઉચ્ચ અધિકારીઓને હેડ કવાર્ટર ન છોડવા આદેશ આપવામાં આવ્યા છે. તેમજ આગામી 4 દિવસ સુધી અધિકારીઓને સ્ટેન્ડ બાય રહેવા આદેશ પણ આપવામાં આવ્યા છે.
સાંબરકાંઠામાં જામ્યો વરસાદી માહોલ
બીજી તરફ સાબરકાંઠા જિલ્લામાં વરસાદી માહોલ જામ્યો છે. હિંમતનગર, ખેડબ્રહ્મા, પોશીના, તલોદમાં વરસાદ બરાબરનો જામ્યો છે. સાથેજ પોશીના તાલુકા ગ્રામ્ય પંથક કોટડા,લામ્બડિયા વિસ્તારમાં વરસાદ પડી રહ્યો છે. પોલાપન, ધડાકા પાસે સાબરમતી નદીમાં નવા નીર આવ્યાસ છે. ઉપરવાસમાં ભારે વરસાદને લઇ નદીઓ વહેતી થઇ છે. આ સિવાય ખેડબ્રહ્મા ગ્રામ્ય પંથકમાં ધોધમાર વરસાદ પડ્યો છે. સારો વરસાદ થતાં ડાંગર, કપાસ, મગફળી, શાકભાજીને ફાયદો થશે. જેના કારણે જગતના તાતમાં હાલ ખુશીનો માહોલ છે.
ઉંઝામાં પણ ભારે વરસાદ
મહેસાણાના ઊંઝામાં ભારે વરસાદ પડ્યો છે. જેના કારણે નિચાણવાળા વિસ્તારમાં પાણી ભરાઈ ગયા છે. આપને જણાવી દઈએ કે ઊંઝા શહેરમાં પ્રવેશવા માટેનો અન્ડર બ્રીજમાં પાણી ભરાયાં છે. જેના કારણે અન્ડર બ્રીજને હાલ પૂરતો વાહન વ્યવહાર માટે બંધ કરાયો. જોકે વરસાદને કારણે અહીયાના ખેડૂતોમાં પણ આનંદ જોવા મળી રહ્યો છે.
સૌરાષ્ટ્ર અને દક્ષિણ ગુજરાત સાંબેલાધાર
સૌરાષ્ટ્રની જો વાત કરવામાં આવે તો ગુજરાતમાં સૌથી વધારે વરસાદ સૌરાષ્ટ્રમાં નોંધાયો છે. પરંતુ તેની સાથે દક્ષિણ ગુજરાતમાં પણ ભારે વરસાદ પડી રહ્યો છે. સૌરાષ્ટ્રમાં ભારે વરસાદને કારણે નદી નાળા છલકાઈ ગયા છે. જોકે ભારે વરસાદને કારણે ખેડૂતોમાં આનંદનો માહોલ જોવના મળી રહ્યો છે.
20 કરતા વધારે ડેમમાં નવા નીરની આવક
આપને જણાવી દઈએ કે વરસાદ મોડો પડ્યો તેના કારણે સૌરાષ્ટ્રમાં પાણીની ભારે અછત સર્જાઈ હતી. જોકે હવે ભરપૂર વરસાદ પડતા સૌરાષ્ટ્રના 20 કરતા વધારે ડેમોમાં નવા નીરની આવક જોવા મળી છે. જેના કારણે જગતના તાતમાં આનંદનો માહોલ જોવા મળી રહ્યો છે. બીજી તરફ લોકોએ પણ હાંશકારો અનુભવ્યો છે.
સૌથી વધુ ગીર સોમનાથમાં 10 ઈંચ વરસાદ
જિલ્લા મુજબ જોવા જઈએ તો ગીર સોમનાથ સુત્રાપાડામાં 10 ઈંચ વરસાદ પડ્યો છે. માણવદરમાં 8 ઈંચ. વંથલી-દ્વારકામાં 7 ઈંચ, વેરાવળમાં 6 ઈંચ વરસાદ પડ્યો છે. કુતિયાણા-ગોંડલમાં 6 ઈંચ વરસાદ પડ્યો છે. ઉપરાંત માળિયા વિસાવદરમાં 5 ઈંચ વરસાદ પડ્યો છે.
દુષ્કાળની સ્થિતી વચ્ચે નદી અને ડેમ છલકાયા
ઉલ્લેખનીય છે કે ભાદરવા મહિનામાં મેઘરાજા મનમૂકીને વરસ્યા છે. જેના કારણે ખેડૂતોમાં આનંદનો માહોલ જોવા મળી રહ્યો છે. તેના પાછળનું કારણ છે કે અગાઉ વરસાદ નહોતો પડ્યો તે પહેલા દુષ્કાળની સ્થિતી સર્જાઈ હતી. પરંતુ હવે તો ભારે વરસાદને કારણે નદી-ડેમ છલકાઈ ગયા છે. જેના કારણે ખેડૂતોને હવે સિંચાઈનું પાણી પણ મળી રહેશે.