મેઘાની જમાવટ / ગુજરાતમાં 5 દિવસ ભારે વરસાદની આગાહીના પગલે તંત્ર એલર્ટ, તાબડતોબ NDRFની 9 ટીમો કરાઇ તૈનાત

• ગુજરાતમાં હજુ 5 દિવસ ભારે વરસાદની આગાહી છે
• રાજ્યના કેટલાંક વિસ્તારોમાં NDRFની 9 ટીમો તૈનાત
• ગુજરાતમાં છેલ્લા 24 કલાકમાં 169 તાલુકામાં વરસાદ વરસ્યો

ગુજરાતમાં હજુ 5 દિવસ ભારે વરસાદની આગાહી કરવામાં આવી છે. 12 જુલાઈ સુધી હજુ રાજ્યમાં વરસાદી માહોલ રહેશે. ત્યારે ગુજરાતમાં ભારે વરસાદની આગાહીના પગલે રાજ્યમાં અલગ-અલગ જગ્યાએ NDRFની કુલ 9 ટીમો તૈનાત કરી દેવાઇ છે.

રાજકોટમાં 2 NDRFની ટીમ અને પોરબંદરમાં 1 SDRFની 1 ટીમ તૈનાત

રાજ્યમાં સોમનાથમાં 1, નવસારીમાં 1, બનાસકાંઠામાં 1 ટીમ તૈનાત કરી દેવાઇ છે. તો બીજી બાજુ વલસાડમાં પણ 1 અને સુરતમાં 1 ભાવનગરમાં 1, કચ્છમાં 1 NDRFની  ટીમ તૈનાત કરી દેવાઇ છે. તો રાજકોટમાં 2 NDRFની ટીમ તૈનાત કરવામાં આવી છે. જ્યારે પોરબંદરમાં 1 SDRFની 1 ટીમ તૈનાત કરવામાં આવી છે.

તમને જણાવી દઇએ કે, રાજ્યમાં હજુ 5 દિવસ વરસાદી માહોલ રહેશે. જેમાં મોટા ભાગે સૌરાષ્ટ્ર અને દક્ષિણ ગુજરાતમાં સારો એવો વરસાદ વરસવાની આગાહી કરવામાં આવી છે. રાજ્યમાં 11 જુલાઈએ ઉત્તર ગુજરાતમાં સારો એવો વરસાદ પડી શકે છે. જ્યારે મધ્ય ગુજરાતમાં હજુ પણ સામાન્ય વરસાદની આગાહી કરવામાં આવી છે.

ગુજરાતમાં છેલ્લા 24 કલાકમાં 169 તાલુકામાં વરસાદે રમઝટ બોલાવી

ગુજરાતમાં છેલ્લા 24 કલાકમાં 169 તાલુકામાં વરસાદે રમઝટ બોલાવી છે. જેમાં સૌથી વધુ ગીર સોમનાથના કોડીનારમાં 7.5 ઇંચ વરસાદ ખાબક્યો છે. જ્યારે સૂત્રાપાડામાં 6.25 ઇંચ, વેરાવળમાં 5.25 ઇંચ, માંગરોળમાં 4.5 ઇંચ, હળવદમાં 2.25 ઇંચ, ધરમપુરમાં 2.25 ઇંચ, પારડીમાં 2.25 ઇંચ, ભૂજમાં 2.25 ઇંચ અને વલસાડમાં 2 ઇંચ વરસાદ નોંધાયો છે.

જ્યારે હાંસોટમાં 2 ઇંચ, માળિયામાં 2 ઈંચ, ચિખલીમાં 2 ઈંચ, વાપીમાં પોણા 2 ઈંચ, કેશોદમાં 1.5 ઈંચ, કલ્યાણપુરમાં 1.5 ઈંચ, ખેરગામમાં 1.5 ઈંચ, ધોલેરામાં 1.5 ઈંચ, વાંસદામાં 1.5 ઈંચ અને મહુવામાં 1.5 ઈંચ વરસાદ નોંધાયો છે.

જુઓ ગુજરાતમાં કયા દિવસે કઇ જગ્યાએ મેઘરાજા જમાવટ કરશે?

7 જુલાઈએ ભાવનગર, સુરત, ભરૂચ, જૂનાગઢ સહિતના વિસ્તારોમાં વરસાદની આગાહી

તમને જણાવી દઇએ કે, હવામાન વિભાગે આજે આગાહી કરતા જણાવ્યું છે કે, 'રાજ્યમાં તારીખ 7 જુલાઈના રોજ ભાવનગર, સુરત, ભરૂચ, જૂનાગઢ, અમરેલી, સોમનાથ, તાપી, નવસારી, ડાંગ અને વલસાડમાં વરસાદની આગાહી વ્યક્ત કરવામાં આવી છે. તો 8 જુલાઈના રોજ નવસારી, દ્વારકા, ડાંગ,પોરંબદર, સુરત, તાપી, ડાંગ, સોમનાથ, રાજકોટ, જામનગર, જૂનાગઢ, કચ્છ, મોરબી, અમરેલી, ભાવનગર, ભરૂચ અને નર્મદામાં વરસાદની આગાહી વ્યક્ત કરવામાં આવી છે.'

9 જુલાઈના રોજ કચ્છ, જામનગર, દ્વારકા, પોરબંદર, રાજકોટમાં વરસાદની આગાહી

જ્યારે તારીખ 9 જુલાઈના રોજ રાજ્યમાં કચ્છ, જામનગર, દ્વારકા, પોરબંદર, રાજકોટ, મોરબી, નવસારી, વલસાડ, ડાંગ, જૂનાગઢ, સુરત અને તાપીમાં વરસાદની આગાહી કરાઇ છે. તો 10 જુલાઈએ દ્વારકા, પોરબંદર, વલસાડ, જૂનાગઢ, મોરબી,રાજકોટ, તાપી, સુરત અને ડાંગમાં વરસાદની આગાહી કરવામાં આવી છે.

12 જુલાઇએ સૌરાષ્ટ્ર અને કચ્છમાં ચક્રવાત સાથે વરસાદ પડશે

રાજ્ય (Gujarat) માં સાબરકાંઠામાં અરવલ્લીમાં ભારે વરસાદની સંભાવના સેવવામાં આવી રહી છે. તારીખ 10 જુલાઇએ મધ્ય ગુજરાતમાં બારેમેઘ ખાંગા થવાની પૂરી સંભાવના છે. તો બીજી બાજુ મધ્ય ગુજરાતના પણ અનેક ભાગમાં ભારે વરસાદ પડશે. 11 જુલાઇએ આખા ગુજરાતમાં ભારેથી અતિ ભારે વરસાદની સંભાવના છે. જ્યારે 12 જુલાઇએ સૌરાષ્ટ્ર અને કચ્છમાં ચક્રવાત સાથે વરસાદ પડશે. તો 11 અને 12 જુલાઇએ ગુજરાતમાં ભારેથી અતિભારે વરસાદ વરસશે.