દક્ષિણ ગુજરાતમાં વરસાદ થંભવાનું નામ નથી લઈ રહ્યો. ત્યારે હવામાન વિભાગે હજુ પણ આગામી 2-3 દિવસ સુધી રાજ્યમાં વરસાદી માહોલ રહેશે તેવી આગાહી કરી છે. હવામાન વિભાગનું માનીએ તો દક્ષિણ ગુજરાતના જિલ્લાઓમાં ભારે વરસાદ થઈ શકે છે. સુરત, નવસારી અને વલસાડમાં વરસાદ થઈ શકે છે.
તો આ તરફ મધ્યપ્રદેશની બોર્ડરે આવેલા પંચમહાલ, દાહોદ, છોટાઉદેપુરમાં ભારે વરસાદ થઈ શકે છે. જ્યારે મધ્યગુજરાત અને કચ્છમાં સામાન્ય વરસાદ પડી શકે છે. આ તરફ સૌરાષ્ટ્રના દરિયા કિનારાના જિલ્લાઓમાં વરસાદ થાય તેવી શક્યતા છે. જેમાં દ્વારકા, જૂનાગઢ, પોરબંદરમાં વરસાદી માહોલ યથાવત્ રહી શકે છે. તો ઉત્તર ગુજરાતમાં અને કચ્છમાં કેટલાક વિસ્તારોમાં સામાન્ય વરસાદ થઈ શકે છે.
ઉમરગામમાં 10 ઇંચથી વધુ વરસાદ
વલસાડમાં ભારે વરસાદના કારણે જનજીવન પ્રભાવિત થયું છે. ઉમરગામ તાલુકામાં 10 ઇંચથી વધારે વરસાદ પડતા અનેક વિસ્તારોમાં પાણી ભરાઇ ગયા છે. જેમાં ટીંબી ગામમાં સતત વરસાદ પડતા લોકોના ઘરમાં પાણી ઘૂસી ગયા છે. જેને લઇ લોકોને મુશ્કેલીનો સામનો કરવો પડી રહ્યો છે. ઘરમાં પાણી ઘૂસી જતા ઘરનો સમાન પણ પલળી ગયો છે. અને ખાવા-પીવાની વસ્તુઓ પણ ખરાબ થઇ ગઇ છે. ત્યારે હજુ સુધી ટીંબી ગામમાં કોઇ તંત્ર દ્વારા કોઇ મદદ કરતા લોકોમાં રોષ જોવા મળી રહ્યો છે. ટીંબી ગામમાં માછીવાડમાં લોકોના ઘરમાં નદીના પાણી ઘૂસી ગયા છે. તો રસ્તા પર પાણી ભરાઇ જતા ટેમ્પો પાણીમાં ફસાઇ ગયો છે. અને મહારાષ્ટ્ર-સંજાણને જોડતો ખાડીનો પુલ પણ પાણીમાં ગરકાવ થઇ ગયો છે.
કંપનીઓ વરસાદી માહોલનો ગેરલાભ, કેમિકલયુકત પ્રદુષિત પાણી છોડાયું
વલસાડ જિલ્લામાં છેલ્લા ત્રણ દિવસથી સતત વરસાદ વરસી રહ્યો છે. જેને કારણે તમામ નદી-નાળાઓ બે કાંઠે વહી રહ્યા છે. ત્યારે આવા વરસાદી માહોલમાં કેટલીક કંપનીઓ વરસાદી માહોલનો ગેરલાભ ઉઠાવી રહી છે. ત્યારે વલસાડ નજીકના ધમડાચીના વેજલપુર નજીક આવેલી એક કંપની દ્વારા વરસાદી પાણીની સાથે કેમિકલયુક્ત પ્રદુષિત પાણી છોડાઈ રહ્યો હોવાનું ગામ લોકોએ આક્ષેપ કરી કંપની વિરુદ્ધ રોષ વ્યક્ત કર્યો હતો.
મહત્વપૂર્ણ છે કે ધમડાચીના વેજલપુર નજીક માવાણી કેમિકલ નામની કંપની આવેલી છે. આ કંપની દ્વારા છેલ્લા કેટલાક સમયથી આસપાસના વિસ્તારમાં પ્રદૂષિત કેમિકલ છોડાઈ રહ્યું હોવાની ફરિયાદો ઉઠી હતી. કંપની વિરુદ્ધ અનેક વખત રજૂઆત કરી હોવા છતાં પણ જીપીસીબી દ્વારા પણ કોઇ કાર્યવાહી નહીં કરી હોવાથી સ્થાનિક લોકોએ જીપીસીબી સામે પણ રોષ વ્યક્ત કર્યો હતો.
પૂર જેવી પરિસ્થિતિમાં પણ યુવકો રમી રહ્યાં છે ક્રિકેટ
આફતને અવસરમાં બદલી શકે તેનું નામ જ ગુજરાતી. આ વાક્યને વલસાડના ટીંભી ગામના યુવાનોએ સાર્થક કર્યું છે. વાત જાણે એમ છે કે, વલસાડના ટીંભી ગામે પૂરના પાણી ફરી વળ્યા છે. ગામમાં મોટાભાગના વિસ્તારમાં ધીંચણસમા પાણી છે. ત્યારે પૂર જેવી પરિસ્થિતિમાં પણ યુવકો ક્રિકેટ રમી રહ્યા છે. ઢીંચણસમા પાણીમાં પણ યુવકો ક્રિકેટની મજા માણતા નજરે પડી રહ્યા છે. યુવકો પાણની વચ્ચે ક્રિકેટ રમીને વરસાદની પણ મજા માણી રહ્યા છે. એક તરફ ગામમાં પૂરની સ્થિતિ છે ત્યારે આ યુવકો આ પરિસ્થિતિને પણ આનંદની ક્ષણોમાં બદલી રહ્યા છે.
નદીમાં નવા નીર આવતા શિલ્પા ગામમાં આવેલો કોઝવે ડૂબ્યો
વલસાડમાં સતત ધોધમાર વરસાદ વરસી રહ્યો છે. કપરાડામાં ભારે વરસાદને પગલે કોલક નદીમાં નવા નીર આવ્યા છે. નવા નીર આવતા ખેડૂતોમાં ખુશીનો માહોલ જોવા મળ્યો છે. નદીમાં નવા નીર આવતા શિલ્પા ગામમાં આવેલો કોઝવે ડૂબ્યો છે. કોઝવે ડૂબતા વાહન ચાલકોને પરેશાનીનો સામનો કરવાનો વારો આવ્યો છે.