હવામાન / આ દિવસે ગુજરાતમાં અહીં ભારે વરસાદની હવામાન વિભાગની આગાહી

ઉલ્લેખનીય છે કે, ગીર સોમનાથ, અમરેલી, ભાવનગર અને રાજકોટમાં વરસાદ પડે તેવી શક્યતા છે. મુંબઈના વરસાદની ગુજરાતમાં ઓછી અસર જોવા મળશે. અમદાવાદમાં સામાન્ય વરસાદ પડે તેવી શક્યતા છે. આ સાથે જ દિવ, દમણ, દાદરા નગર હવેલી, વલસાડમાં ભારે વરસાદની હવામાન વિભાગે આગાહી કરી છે. 

અમરેલીમાં રાજુલાના પીપાવાવ પોર્ટમાં વરસાદ 

અમરેલીમાં રાજુલાના પીપાવાવ પોર્ટમાં વરસાદ શરૂ થઇ ગયો છે. ઉપરાંત સાજણવાવ, ડુંગર, રાભડા અને જિંજકા ગામમાં ધોધમાર વરસાદ પડી રહ્યો છે. ભારે વરસાદના કારણે રસ્તા પર પાણી ભરાઇ ગયા છે. જ્યારે બીજી બાજુ સારા વરસાદથી ખેડૂતોમાં ખુશી જોવા મળી છે.

સુરત અને મુંબઇ વચ્ચેનો રેલ વ્યવહારને અસર

મુંબઇ અને દક્ષિણ ગુજરાતમાં છેલ્લા બે દિવસથી ભાર વરસાદ પડતા સુરત અને મુંબઇ વચ્ચેનો રેલ વ્યવહાર પ્રભાવિત થયો છે. અને આજે બીજા દિવસે પણ અનેક ટ્રેન રદ કરી દેવાઇ છે. અને કેટલીક ટ્રેનને અડધેથી રોકી દેવાઇ છે. ત્યારે મુસાફરોને હાલાકી ન પડે તે માટે રેલવેના મુસાફરો માટે સુરત રેલવે તરફથી એસટી બસની વ્યવસ્થા કરવામાં આવી છે.

મુંબઇમાં ભારે વરસાદના કારણે સૌથી મોટી અસર ટ્રેન વ્યવહાર પર પડી છે. અનેક ટ્રેનો કેન્સલ કરવામાં આવી છે. સુરતથી જતી ફ્લાઈંગ રાણી, ગુજરાત એક્સપ્રેસ, શતાબ્દી, ઇન્ટરસિટી, વિરાર-ભરૂચ ટ્રેન કેન્સલ કરવામાં આવી છે. તો સૂર્યનગરી એક્સપ્રેસના પૈડા સુરત સ્ટેશન પર થંભી ગયા છે. 

આ ટ્રેન સુરત સ્ટેશન પર પહોંચતા કેન્સલ કરાઈ હતી. રણકપુર ટ્રેનને નવસારીથી કેન્સલ કરાઈ છે. તો મુંબઈ જતી અનેક ટ્રેનોને વલસાડ થોભાવી દેવાઈ છે. આમ, ગુજરાતથી મુંબઈ જવા નીકળેલા અનેક મુસાફરો દક્ષિણ ગુજરાતના વિવિધ સ્ટોપેજ પર અટવાયા છે.