રાજ્યના મોટાભાગના વિસ્તારમાં મેઘાના મંડાણ થઈ ગયા છે. પરંતુ મેઘાએ જે રીતે પ્રથમ આગમને જ ધુંવાધાર વરસવાનું શરૂ કર્યું છે. તેના કારણે લોકોને રાજી થવું કે સાવધ થઈ જવું તે નક્કી કરવું મુશ્કેલ બન્યું છે. કારણ કે એક તરફ વરસાદથી ખેડૂતો ખુશ છે તો બીજી તરફ શહેરોમાં ઘરોમાં પાણી ઘુસ્યા છે, નિચાણવાળા વિસ્તારમાં પાણી ઘુસ્યા છે, તો કેટલીક દુર્ઘટનાઓ પણ બની છે. મહત્વનું છે કે, રાજ્યમાં ભારે વરસાદના પગલે અનેક ડેમ ઓવરફ્લો થયા છે.
ગુજરાતમાં મેઘરાજાની ધમાકેદાર બેટિંગ
નદી-નાળા છલકાયા છે
સૌરાષ્ટ્ર-કચ્છમાં હજુ વરસાદની આગાહી
ગુજરાતના મોટા ભાગના જિલ્લાઓમાં આજે ધોધમાર વરસાદ પડ્યો છે. તો હજુ ગુજરાતના સૌરાષ્ટ્ર અને કચ્છમાં આજે ધોધમાર વરસાદ થઈ શકે છે. દ્વારકાના ખંભાળિયામાં 18 ઈંચ જેટલો વરસાદ વરસ્યો છે. તો જૂનાગઢમાં 4 ઈંચ જેટલો વરસાદ વરસ્યો છે. આજે પણ દ્વારકા અને જૂનાગઢ, અમરેલી, રાજકોટ, ભાવનગર, બોટાદ અને દીવમાં ભારે વરસાદ થઈ શકે છે. આ તરફ દક્ષિણ ગુજરાતના સુરત, નવસારી, વલસાડ, દમણ અને ભરૂચમાં વરસાદ થાય તેવી સંભાવના છે. હવામાન વિભાગનું માનીએ તો ઉત્તર ગુજરાતના કેટલાક જિલ્લાઓમાં પણ વરસાદ થઈ શકે છે.
જૂનાગઢઃ બામણાસા ગામનો બ્રિજ થયો ધરાશાયી
ભારે વરસાદથી જૂનાગઢના કેશોદ પાસે આવેલો બામણાસા ગામનો બ્રિજ ધરાશાયી થયો છે. પુરના પાણીથી બ્રિજ તૂટતા ગામનો સંપર્ક કપાયો છે. એક ગામથી બીજા ગામે જતા લોકોને ભારે તકલીફ પહોંચી છે. અનેક લોકો બ્રિજ તૂટતા રસ્તા પર અટવાયા છે. ભારે વરસાદથી સ્થાનિક લોકોને ભારે મુશ્કેલીનો સામનો કરવો પડી રહ્યો છે. પુલ ધરાશાયી થવાના બનાવમાં કોઇ જાનહાનિ સર્જાય નથી.
મહત્વનું છે કે છેલ્લા કેટલાય વર્ષોથી લોકો આ પુલનું રિપેરિંગ કરવામાં આવે તે માટે તંત્રને રજૂઆત કરી ચૂક્યા હતા. પરંતુ અત્યાર સુધી સુધી પુલનું રિપેરિંગ કામ ન થતાં આ દુર્ઘટના બની છે. બામણાસાથી પાડોદર તરફ જઈ રહેલો આ પુલ 1 કરોડના ખર્ચે બન્યો હતો. જે હાલ ધરાશાયી થતાં બામણાસાથી કેશોદ વાયા પાડોદર જવાનો રસ્તો બંધ થઈ ગયો છે. જેથી લોકો મુશ્કેલીમાં મુકાઈ ગયા છે.
રાજ્યમાં સાર્વત્રિક વરસાદ, અનેક ડેમ ઓવરફ્લો
રાજ્યમાં વરસાદી માહોલ જામ્યો છે. ક્યાંક ધીમીધારે તો ક્યાંક ધોધમાર વરસાદ પડ્યો છે. સારા વરસાદના કારણે રાજ્યના ડેમોમાં નવા નીર આવ્યા છે. સારા વરસાદથી સૌરાષ્ટ્રના ડેમોમાં પાણીની આવક થઇ છે. સૌરાષ્ટ્રના 17 ડેમોમાં 4 ફુટ સુધી પાણીની આવક થઇ છે. દ્વારકાના સોઢાભારથરી ડેમમાં 4.27 ફુટ પાણીની આવક થઇ છે. તો વેરાડી-1માં 2.62 ફુટ, વેરાડી-2માં 1.31 ફુટ, મીણસારમાં 0.98 ફુટ, મોરબીના મચ્છુ-3માં 0.07 ફુટ પાણી આવ્યું છે. તો બીજી તરફ જામનગરના ઉંડ-3માં 1.15 ફુટ, ભાદર ડેમમાં 0.10 ફુટ, ફોફળ ડેમમાં 0.92 ફુટ, વેણુ-2માં 0.16 આજી-1માં 0.20 ફુટ પાણીની આવક થઇ છે.
ગીર પંથકમાં મેઘરાજા મહેરબાન, છલકાયા નદી-નાળા
ગીર-સોમનાથ જિલ્લાના જામવાળા નજીક આવેલા જમજીર ધોધ ફરી એકવાર ભારે વરસાદના કારણે સક્રીય થઈ ગયો છે. જમજીર ધોધનો આહલાદક નજારો જોવા મળી રહ્યો છે. જમજીર ધોધમાંથી નીચે પડતું પાણી અને પાણીના પ્રવાહના કારણે ઉડતા ધૂમ્મસના કારણે કુદરત સોળે કળાઓ ખીલી ઉઠી હોય તેવા દ્રશ્યો સર્જાયા છે. આ ધોધને નિહાળવા દેશ વિદેશથી પર્યટકો આવે છે. આ ધોધનું સૌંદર્ય જ એવું છે કે તેને નિહાળવું અને માણવું તે એક લ્હાવો છે. શિંગવડો નદીમાં આવેલો આ જમજીર ધોધને જોવા માટે મોટી સંખ્યામાં લોકો ઉમટી પડતા હોય છે. જોકે વરસાદી માહોલ સમયે અહીં જવા પર પ્રતિબંધ હોય છે. શીંગવડો નદી મધ્યગીર કનકાઈની ગીરી કંદરાઓમાંથી ઉદ્દભવી 80 કિલોમીટરનું અંતર કાપી કોડીનારનાં મુળ દ્વારકા બંદરે સમુદ્રને મળે છે. શીંગવડો નદી ગીર જંગલમાંથી પસાર થાય છે. ગીર બોર્ડરનાં જામવાળા ખાતે આ નદી શિંગોડા ડેમમાં આવે છે. અહીંથી આગળ વધી જમદગ્નિ ઋષિનાં આશ્રમની નજીક જમજીરનાં ધોધ સ્વરૂપે વહે છે. 30 ફૂટ ઉપરથી પડતા જમજીર ધોધના કારણે અહીં ધૂમ્મસ જેવું વાતાવરણ છવાઈ જાય છે..
ગીર પંથકમાં મોડી રાતથી ધોધમાર વરસાદ વરસી રહ્યો છે. ભારે વરસાદના કારણે નદીઓમાં નવા નીર આવ્યા છે. કોડિનારમાંથી પસાર થતી સાંગાવાડી નદીઓમાં ઘોડાપૂર આવ્યું છે.
ગીર-સોમનાથ જિલ્લાને પણ મેઘરાજા ઘમરોળી રહ્યા છે. અરબી સમુદ્રમાં પણ કરંટ જોવા મળી રહ્યો છે. ભારે વરસાદના કારણે સમુદ્રમાં તોફાની મોજા સાથે હાઈટાઈડ જોવા મળી. દરિયો ગાંડોતૂર થયો છે. ત્યારે માછીમારોને દરિયો ન ખેડવા માટે પણ સૂચના આપવામાં આવી છે.
જૂનાગઢ જિલ્લામાં મુશળધાર વરસાદ
બાદલપરાના ઓઝત-2 ડેમના દરવાજા 2 ફૂટ ખોલી દેવાયા છે. રુલ લેવલ જાળવવા માટે ઓઝત-2 ડેમના દરવાજા ખોલી દેવામાં આવ્યા છે. ઓઝત-2 ડેમમાં પાણીની આવક વધી છે. ઓઝત-2 ડેમમાં 6 હજાર ક્યૂસેક પાણીની આવક થઇ છે. ઉપરવાસમાં વરસાદ પડતા પાણીની આવક વધી છે.
જુનાગઢના કેશોદમાં ધોધમાર વરસાદ પડ્યો. કેશોદમાં 12 કલાકમાં 7 ઇંચ વરસાદ પડ્યો છે. ત્યારે ભારે વરસાદના કારણે ઓઝત નદીમાં નવા નીર આવ્યા છે. સાથે જ જૂનાગઢના નીચાણવાળા વિસ્તારોમાં અલર્ટ રહેવા સૂચન આપી દેવાયું છે.
જૂનાગઢમાં માળીયાહાટીનામાં વરસાદી માહોલ જામ્યો છે. માળીયાનો જીવાદોરી ભાખરવડ ડેમમાં નવા નીર આવતા 70 ટકા જેટલો ડેમ ભરાયો છે. ડેમનુ જળસ્તર વધતાં સ્થાનિકોમાં ખુશી જોવા મળી રહી છે. વાવણી બાદ સારો વરસાદ થતાં ખેડૂતોમાં ખુશીના માહોલ સર્જાયો છે.
ગીર-સોમનાથમાં મોડી રાતથી ધોધમાર વરસાદ વરસી રહ્યો છે. જેના કારણે ગીર-સોમનાથની નદીઓ ગાંડીતૂર થઈ ગઈ છે. વરસાદના કારણે નદીઓમાં નવા નીર આવ્યા છે. સરસ્વતી અને કપીલા નદીમાં પાણીની આવક થતાં નદીઓ બે કાંઠે વહી રહી છે.
ગીર સોમનાથના પ્રભાસ તીર્થના ત્રિવેણી ઘાટમાં પાણીની આવક થઇ છે. હિરણ, કપિલા અને સરસ્વતી નદીમાં પાણીની આવક થઇ છે. ત્રણેય નદીઓનો અહી સમુદ્ર સાથે સંગમ થાય છે..
દ્વારકામાં છેલ્લા 24 કલાકમાં 18 ઈંચ જેટલો વરસાદ
દ્વારકામાં છેલ્લા 24 કલાકમાં 18 ઈંચ જેટલો વરસાદ વરસી ગયો છે. જેના કારણે જામખંભાળિયાની નદીઓ ગાંડૂતીર બની ગઈ છે. વંગડી ડેમ ઓવરફ્લો થઈ ગયો છે. તો ચેકડેમ પરથી પાણી વહી રહ્યા છે. ભારે વરસાદના કારણે ખેડૂતો પણ ચિંતાતૂર બન્યા છે. દ્વારકાથી જામખંભાળિયા માર્ગ પર પણ પાણી ભરાઈ ગયા છે.
દ્વારકામાં ભારે વરસાદથી ખેડૂતો ચિંતાતૂર થઈ ગયા છે. ભારે વરસાદના કારણે ખેતરો ધોવાઈ ગયા છે.. તો મગફળીના પાકને પણ ભારે નુકસાન થયું છે. ત્યારે ખેડૂતોનું માનીએ તો મગફળીના પાકને 50 ટકા જેટલું નુકસાન થયું છે. 18 ઈંચ જેટલો વરસાદ પડવાના કારણે ભારે નુકસાન ભોગવવાનો વારો આવ્યો છે. ખેડૂતોના મતે છેલ્લા 20 વર્ષ બાદ જામ ખંભાળીયામાં આટલો બધો વરસાદ થયો છે. નદીઓ પણ ગાંડીતૂર થઈ ગઈ છે. આ ભારે વરસાદના કારણે જામખંભાળીયાના 25થી 30 ગામમાં ભારે નુકસાન થવાની ભીતિ છે.
દ્વારકાના કલ્યાણપુર તાલુકામાં ધોધમાર વરસાદ પડી રહ્યો છે. ભારે વરસાદના કારણે ગાગા ગામ અને બામસણા રોડ પર પૂરની સ્થિતિ છે. કલ્યાણપુરમાં ભારે વરસાદના કારણે ખેતરોમાં દૂર દૂર સુધી પાણી જોવા મળી રહ્યાં છે.
દ્વારકાના સતાપર ગામમાં ધોધમાર વરસાદ વરસ્યો છે. જેના કારણે નદી-નાળા છલકાઈ ગયા છે. સતાપર ગામ પાસે આવેલો સિંધણી ડેમ પણ ઓવરફ્લો થયો છે. જેના કારણે આહલાદક દ્રશ્ય સર્જાયા છે. ડેમમાંથી પાણી છોડાતા નદીઓ બે કાંઠે વહી રહી છે. હજુ પણ દ્વારકા, અને સૌરાષ્ટ્રના દરિયા કિનારાના જિલ્લાઓમાં વરસાદનો ખતરો યથાવત્ છે.
દ્વારકાના જામ ખંભાળિયામાં આભા ફાટ્યું હોય તેવી સ્થિતિ સર્જાઈ છે. ભારે વરસાદ બાદ હવે જામ ખંભાળિયાની સોસાયટીઓ પાણીમાં ગરકાવ થઈ ગઈ છે.. સોસાયટીઓમાં પાર્ક કરેલી કાર પણ આખે આખી પાણીમાં ડૂબી ગઈ છે. કેટલાક લોકોના મકાનોમાં પણ વરસાદી પાણી ઘુસી ગયા છે. આ દ્રશ્યો જોઈએ જ સ્થાનિક લોકોની સ્થિતિ કેવી હશે અને વરસાદ કેવો પડ્યો હશે તે આંકી શકાય છે.
જામનગરમાં થઈ રહેલા ભારે વરસાદના કારણે નદી નાળા છલકાઈ ગયા છે. જામજોધપુરનો ફુલજર ડેમ પણ ઓવરફ્લો થઈ ગયો છે. ડેમના 6 દરવાજા ખોલવામાં આવતા ભારે પાણીનો પ્રવાહ નદીમાં વહી રહ્યો છે. ડેમ સાઈટ પર પણ 5 ઈંચથી વધુ વરસાદ વરસ્યો છે. જેના કારણે નદી કિનારાના ગામડાઓને અલર્ટ કરવામાં આવ્યા છે.
પોરબંદરમાં ધોધમાર વરસાદ
પોરબંદરના બરડા પંથકમાં પણ ધોધમાર વરસાદ વરસ્યો છે. ભારે વરસાદથી સોરઠી ડેમમાં નવા નીર આવ્યા છે. ડેમમાં નવા નીર આવતા સોરઠી ડેમ ઓવરફ્લો થયો છે. સોરઠી ડેમ ઓવરફ્લો થતા ખેડૂતોમાં ખુશીની લાગણી જોવા મળી છે.
પોરબંદર-ખંભાળિયા હાઇવે બંધ કરી દેવાયો છે. બરડા પંથકમાં ભારે વરસાદને કારણે વર્તુ નદીમાં નવા નીર આવ્યા છે. પુલ પર પાણી ફરીવળતા રસ્તો બંધ કરી દેવાયો છે. જ્યારે મીનસર નદીમાં પણ ઘોડાપુર આવ્યું છે.
પોરબંદરના બરડા પંથકમાં પણ મોડી રાતથી ભારે વરસાદ વરસી રહ્યો છે. ભારે વરસાદના કારણે ખેતરોમાં પાણી ભરાયા છે. ખેતરોમાં પાણી ભરાતા પાકને નુકસાન થવાની ભિંતી સેવાઇ રહી છે.
પોરબંદરમાં ધોધમાર વરસાદ પડ્યો છે. ભારે વરસાદના કારણે મેંઢાક્રીક ડેમ ઓવરફ્લો થયો છે. હર્ષદ-મિયાણીમાં મેંઢાક્રીક ડેમ ઓવરફ્લો થતા. આસપાસના વિસ્તારોમાં પૂરની સ્થિતિ સર્જાઇ છે.
કચ્છ જિલ્લામાં ભારે વરસાદ
કચ્છ જિલ્લામાં પણ ભારે વરસાદ વરસી રહ્યો છે. નખત્રાણા અને તેની આસપાસના વિસ્તારોમાં ભારે વરસાદ થઈ રહ્યો છે. જેના કારણે નખત્રાણાની સ્થાનિક નદીઓમાં નવા નીર આવ્યા છે.. તો ખેડૂતો પણ ખુશખુશા થયા છે. સુકાભઠ કચ્છમાં ભારે વરસાદ થઈ રહ્યો છે. જેના કારણે ખેડૂતોને પણ એક આશાની કિરણ દેખાઈ રહી છે. કચ્છમાં મધરાતથી તેજ પવન સાથે વરસાદ વરસી રહ્યો છે. કચ્છના મોટાભાગના વિસ્તારોમાં ઝરમર વરસાદ વરસ્યો છે.
અમરેલીમાં સતત ધોધમાર વરસાદ થતા નદી-નાળા છલકાયા છે. ધારી તાલુકાના નાગધ્રાની સેલ નદીમાં પાણીની આવક થતા પૂરની સ્થિતિ સર્જાઈ. સેલ નદીમાં પૂર આવતા બળદ ફસાયો હતો. ગ્રામજનોએ બળકનું રેસ્ક્યૂ કર્યુ છે.
ભોગાત-દ્વારકા હાઇવે પર વાહનોની કતાર લાગી છે. ભારે વરસાદના પગલે ભોગાત-દ્વારકા હાઇવે બ્લોક થયો છે. હાઇવે પર પાણી ફરી વળતા વાહનો અટવાયા છે. નદીઓમાં પૂરના કારણે નાના વાહનોની લાગી લાઈનો છે. ભોગાત નદી આસપાસના વિસ્તારોમાં ચારે તરફ પાણી પાણી ફરી વળ્યા છે. તો રાજકોટમાં પણ ધોધમાર વરસાદ પડ્યો છે.