અમદાવાદ. સૌરાષ્ટ્ર અને દક્ષિણ ગુજરાતની સાથે સાથે આજે અમદાવાદ અને ગાંધીનગરમાં પણ મેઘરાજાએ ધમાકેદાર એન્ટ્રી કરી છે. બપોર સુધી ભારે ઉકળાટ રહ્યાં બાદ 3 વાગ્યા આસપાસ વાતાવરણમાં એકાએક પલટો આવ્યો હતો અને ભારે વરસાદ તૂટી પડ્યો હતો. જેને કારણે શહેરીજનોને પણ બફારામાંથી રાહત મળી હતી. તેમજ ઠેર ઠેર પાણી ભરાયા હતા. આજે જુહાપુરા, ઘાટલોડિયા, નારણપુરા, વેજલપુર, બોપલ, વટવા, જશોદાનગર, આશ્રમ રોડ, એસ.જી.હાઈવે અને મણિનગર સહિતના અનેક વિસ્તારોમાં 1 કલાકથી વધુ સમયથી મન મુકીને મેહુલો વરસ્યો હતો.
અમદાવાદ-ગાંધીનગરમાં ધોધમાર વરસાદ શરૂ
વરસાદના પગલે વાતાવરણમાં પ્રસરી ઠંડક
ગાંધીનગરમાં ભારે પવન ફૂંકાયો
હવામાન વિભાગની આગાહી અનુસાર, રાજ્યમાં સૌરાષ્ટ્ર, દક્ષિણ ગુજરાત અને કચ્છમાં ધમાકેદાર વરસાદ વરસી રહ્યો છે. ત્યારે આજે (સોમવાર) અમદાવાદ અને ગાંધીનગરમાં ગાજવીજ સાથે ધોધમાર વરસાદ વરસી રહ્યો છે. દિવસભર વાદળછાયા વાતાવરણ બાદ પલટો આવ્યો છે. અમદાવાદના સમગ્ર પશ્ચિમ વિસ્તાર અને પૂર્વમાં પણ વરસાદ ખાબક્યો છે. વરસાદના પગલે વાતાવરણમાં ઠંડક પ્રસરી છે.
અમદાવાદના એસ.જી.હાઈવે, બોપલ, નારણપુરા, ઘાટલોડિયા, રાણીપ, વડવા, જશોદાનગર, આશ્રમ રોડ, સુભાષબ્રિજ, સેટેલાઇટ વિસ્તાર, નહેરૂનગર, મણીનગર, કૃષ્ણનગર, ઇસનપુર, ખોખરા, અમરાઇવાડી, બોડકદેવ, પાલડી અને નરોડામાં ધોધમાર વરસાદ વરસી રહ્યો છે. શહેરના લોકો વરસાદની મજા માણી રહ્યા છે, તો વાવણીલાયક વરસાદથી આસપાસના વિસ્તારોના ખેડૂતો પણ ખુશખુશાલ નજરે પડી રહ્યા છે. તો ગાંધીનગરમાં પણ મૂશળધાર વરસાદ વરસી રહ્યો છે. સાથે ભારે પવન ફૂંકાયો છે.
તો શહેરના નિચાણવાળા વિસ્તારમાં વરસાદના કારણે પાણી ભરાયા છે. જેમાં સાબરમતિ વિસ્તાર, હાટકેશ્વર, નરોડાના વિસ્તારોમાં પાણી ભરાયા છે. ઘાટલોડિયા, કે.કે નગર, પારસનગર અને શાસ્ત્રીનગરમાં પણ પાણી ભરાયા છે. તો સીટીએમ રોડ બેસી જવાની ઘટના સામે આવી છે. ત્યારે પ્રિ-મોન્સૂનની કામગીરી છતા કેટલીક બાબતો સામે આવી છે. તો અખબારનગર અંડરપાસ પર પાણી ભરાયું છે જેને લઇને અંડરપાસ બંધ કરાયો છે.