દેશનાં કેટલાક રાજ્યોમાં આગામી દિવસોમાં હવામાન બગડવાનું છે. આ કમોસમી વરસાદ મોટી સમસ્યા પણ બની શકે છે. હવામાન વિભાગના નિષ્ણાતોએ આગાહી કરી છે કે, આજથી ૨૫ ફેબ્રુઆરી દરમિયાન કેટલાંક રાજ્યમાં મધ્યમથી ભારે વરસાદ પડી શકે છે
૨૫ ફેબ્રુઆરી સુધીમાં જોરદાર આંધી સાથે ભારે વરસાદ વરસે તેવી આશંકા છે
આગામી પાંચ દિવસ સુધી દેશનાં કેટલાંક રાજ્યોમાં હવામાન ઠંડું રહેશે
મોડી સાંજે હવામાન પલટાય અને ભારે વરસાદ પડી શકે છે
ઘણાં રાજ્યમાં આજે સવારથી જ વાતાવરણ ઓચિંતું પલટાઈ ગયું છે. ૨૫ ફેબ્રુઆરી સુધીમાં જોરદાર આંધી સાથે ભારે વરસાદ વરસે તેવી આશંકા છે. કેટલાંક સ્થળોએ વીજળી પડવાની સંભાવના પણ વ્યક્ત કરવામાં આવી છે. આગામી પાંચ દિવસ સુધી દેશનાં કેટલાંક રાજ્યોમાં હવામાન ઠંડું રહેશે અને વરસાદનાં ઝાપટાં પડશે.
આમ તો ગઈ કાલ રાતથી જ અનેક જગ્યાએ હવામાનમાં પલટો જોવા મળ્યો છે. હવામાન વિભાગની આગાહી અનુસાર, આગામી દિવસોમાં દિલ્હી સહિત એનસીઆરના ઘણા વિસ્તારોમાં ભારેથી અતિભારે વરસાદ પડી શકે છે. આ ઉપરાંત દિલ્હીને અડીને આવેલા ઉત્તરપ્રદેશના પાણિપત, ગનૌર, હિસાર, હંસી, કૈથલ, જિંદ, કરનાલ, કુરુક્ષેત્ર અને શ્યામલીમાં પણ હવામાન બદલાઈ ગયું છે. અહીં આગામી બે દિવસ સુધી ભારે વરસાદ પડે તેવી સંભાવના છે. આ વિસ્તારોમાં વરસાદ સાથે વાવાઝોડાની પણ આશંકા વ્યક્ત કરવામાં આવી છે.
મહાશિવરાત્રિના આગલા દિવસે જ એટલે કે ગુરુવારે મોડી રાત્રે દિલ્હી અને એનસીઆરના ઘણા વિસ્તારોમાં ભારે ગાજવીજ સાથે ધોધમાર વરસાદ પડ્યો હતો. આમ તો બુધવારની રાતથી જ રાજધાની દિલ્હીમાં હવામાનનો મૂડ બદલવા લાગ્યો હતો. ગઈ કાલે સાંજ સુધી જોરદાર પવન ફૂંકાયો હતો. ત્યારબાદ મોડી રાત સુધી તોફાની વરસાદ પડ્યો હતો. હવામાન વિભાગે આગાહી કરી હતી કે, પર્વતીય વિસ્તારોમાં ભારે બરફ વર્ષા પણ થઈ શકે છે, જેની અસર મેદાની વિસ્તારોમાં પણ થઈ શકે છે.
હવામાન વિભાગે એવી સંભાવના વ્યક્ત કરી હતી કે, મોડી સાંજે હવામાન પલટાય અને ભારે વરસાદ પડી શકે છે. બે દિવસથી દિલ્હી અને એનસીઆરના કેટલાક વિસ્તારો પર વાદળ છવાયાં હતાં, જેના કારણે વરસાદની સંભાવના વધી ગઈ હતી.
જમ્મુ-કાશ્મીર, હિમાચલ પ્રદેશ અને ઉત્તરાખંડમાં આગામી એક-બે દિવસમાં ભારે બરફ વર્ષા થવાની સંભાવના છે. પરિણામે આગામી દિવસોમાં ફરી એક વખત કેટલાંક રાજ્યમાં કાતિલ ઠંડીનું મોજું ફરી વળશે અને લોકોની પરેશાની વધશે તેવું પણ હવામાન વિભાગે જણાવ્યું છે. ૨૫ તારીખ સુધી હવામાનમાં થનારા પલટાને કારણે ખાસ કરીને ઉત્તર ભારતમાં કડકડતી ઠંડીનો અંતિમ રાઉન્ડ શરૂ થશે.
આગાહી અનુસાર, બિહાર, ઝારખંડ, પશ્ચિમ બંગાળ અને ઓડિશામાં આંધી સાથે ભારે વરસાદ પડી શકે છે. આ રાજ્યના મોટા ભાગના વિસ્તારોમાં ગાજવીજ સાથે વરસાદ પડવાની સંભાવના છે.