ચોમાસું / વલસાડમાં ધોધમાર વરસાદ, ઓરંગા નદીમાં પૂરની સ્થિતિ

સતત વરસી રહેલા વરસાદના કારણે છેલ્લા એક અઠવાડિયાથી વલસાડ જિલ્લામાં સૂરજ દેવના દર્શન થયા નથી અને સમગ્ર વાતાવરણ અંધકારમય લાગી રહ્યું છે. આજે સવારથી જ ઔદ્યોગિક નગરી વાપીમાં વરસાદ વરસી રહ્યો છે અને વાપીના નીચાણવાળા વિસ્તારોમાં પાણી ભરાવાની સમસ્યા પણ ઊભી થઈ હતી. તો વાપીના મુખ્ય પોશ વિસ્તાર એવા ગુંજન વિસ્તારમાં પણ પાણી ભરાયા હતા. ગુંજન વિસ્તારમાં આવેલી મુખ્ય રાજમાર્ગ પર નદી વહેતી થઇ છે. જેના કારણે મુસાફરો અને લોકોએ ભારે હાલાકી ભોગવવાનો વારો આવ્યો છે. સતત વરસી રહેલા વરસાદના કારણે હવે વાપી વાસીઓ પણ ભારે મુશ્કેલીનો સામનો કરી રહ્યા છે.

છેલ્લા 24 કલાકમાં જિલ્લામાં વરસેલો વરસાદ  

• ઉમરગામ 4.8  ઇંચ
• કપરાડા 10.44 ઈચ
• ધરમપુર 10.32 ઇંચ 
• પારડી 9.2 ઇંચ
• વલસાડ  6.6

તો ઔરંગા નદીમાં ઉપરવાસમાં ભારે વરસાદના કારણે પૂરની સ્થિતિ સર્જાઇ છે. જેને લઇ હાલ NDRF અને ફાયરની ટીમ સાથે પોલીસ જવાનોની ટીમ પણ ખડકી દેવામાં આવી છે. ઔરંગા નદીમાં પાણીનું સ્તર ભયજનક રીતે વધતા નદી કિનારાના અનેક વિસ્તારોમાં પાણી ભરાઇ ગયા છે. જેના કારણે લોકો મુશ્કેલીમાં મૂકાયા છે. જ્યારે વલસાડના કશ્મીરા નગરમાં લોકોને સલામત સ્થળે ખસેડવામાં આવ્યા છે. ઔરંદા નદી કિનારાના પીચિગ, છીપવાડા, તરીયાવાડ, કૈલાસનગર, લીલાપોરમાં પાણી ભરાયા હતા.