વડોદરા જળબંબાકાર / વડોદરાનું જનજીવન સંપૂર્ણપણે ઠપ દૂધ-શાકભાજી માટે લોકોનાં વલખાં

મોટાભાગના વિસ્તારોમાં વીજળી ગુલ છે. દૂધ અને શાકભાજી ખરીદવા લોકોએ લાઇનો લગાવી છે. ટ્રાન્સર્પોટેશન બંધ છે. લોકોને ઘરની બહાર નીકળી શકાય તેવી સ્થિતિ પણ નથી. આજવા જળાશયમાંથી પાણી છોડવામાં આવતાં આજે પણ શહેરમાં પૂરની સ્થિતિ સર્જાય તેવી સંભાવના છે. વિશ્વામિત્રીની સપાટી રાત્રે ર૮.પ૦ ફૂટે પહોંચતાં નીચાણવાળા વિસ્તારમાંથી ૧પ૦૦થી વધુ લોકોના સ્થળાંતરની કામગીરી કરવામાં આવી છે. હજુ ૪૮ કલાક વડોદરામાં ભારે વરસાદની આગાહીના પગલે શહેર પર વરસાદી સંકટ તોળાઈ રહ્યું છે. 

આજે વડોદરાનાં શાળા-કોલેજ અને કોર્ટ બંધ છે. વિશ્વામિત્રી નદીએ ભયજનક સપાટી વટાવી દીધી છે. વડોદરામાં સવારના ૬ થી રાતના ૮ વાગ્યામાં સુધીમાં પડેલા 20 ઇંચ વરસાદના કારણે શહેરમાં ચારે બાજુ પાણી જ પાણી છે. મુખ્યમંત્રી વિજય રૂપાણીએ વડોદરા શહેરમાં ભારે વરસાદથી સર્જાયેલી સ્થિ‌તિની ઉચ્ચ સ્તરીય બેઠક યોજી સમીક્ષા કરીને રાજ્ય સરકાર દ્વારા બચાવની કામગીરીના સંકલન માટે બે આઇએએસ અધિકારીઓ લોચન સહેરા તથા વિનોદ રાવને વડોદરા મોકલ્યા છે.

નેશનલ ડિઝાસ્ટર રિસ્પોન્સ ફોર્સ (એનડીઆરએફ)ની પ્રત્યેક ટીમમાં ૩પ જેટલા જવાન સાથેની ૩ ટીમ ત્યાં સ્થાયી હોઈ આ ટીમ બચાવ-રેસ્ક્યૂના કામે લાગી છે. પ્રત્યેક ટીમમાં ૧૦૦ જેટલા જવાન સાથેની સ્ટેટ ડિઝાસ્ટર રિસ્પોન્સ ફોર્સ (એસડીઆરએફ)ની પણ બે ટીમ પણ ત્યાં બચાવકાર્યમાં લાગી છે. આર્મી અને એરફોર્સના તંત્રને એલર્ટ કરાયાં છે. આજે જો જરૂર પડશે તો હેલિકોપ્ટરની મદદ પણ લેવાશે. 

ભરાયેલાં પાણીના કારણે લોકો હાલાકીનો સામનો કરી રહ્યા છે. અનેક વિસ્તારમાં હોસ્પિટલમાં લઇ જવા માટે દર્દી માટે એમ્બ્યુલન્સની સુવિધા પણ નથી. લોકો દર્દીને ખાટલામાં સૂવડાવીને હોસ્પિટલ સુધી પહોંચાડી રહ્યા છે. અનેક વિસ્તારમાં ગઇ કાલ બપોરથી વીજળી ગુલ થઇ ગઇ છે, જે હજુ  સુધી તો આવી નથી.

રાજ્યના ૧૦ર તાલુકામાં નોંધપાત્ર વરસાદ નોંધાયો છે. રાજયના ૩૦ તાલુકામાં બે ઈચથી વધુ અને અન્ય ૪પ તાલુકામાં એક ઈંચથી વધુ વરસાદ વરસ્યો છે. સમગ્ર ગુજરાતમાં વરસાદ વરસી રહ્યો છે ત્યારે ગુજરાતમાં હજુ પાંચ દિવસ ભારે વરસાદની આગાહી કરવામાં આવી છે. ઉત્તર ગુજરાત અને દક્ષિણ ગુજરાતમાં સૌથી વધારે વરસાદની આગાહી કરાઇ છે, સાથે-સાથે સમગ્ર ગુજરાતમાં સારો વરસાદ પડશે. 

ઉત્તર ગુજરાતના બનાસકાંઠા, સાબરકાંઠા, પાટણ, મહેસાણામાં ભારે વરસાદ પડશે. મધ્ય ગુજરાત, અમદાવાદ, છોટાઉદેપુર, પંચમહાલ, દાહોદ, આણંદ અને ખાસ કરીને વડોદરામાં અ‌િત‌ભારે વરસાદની આગાહી છે. દક્ષિણ ગુજરાતમાં નર્મદા, સુરત, ભરૂચ, સુરત, તાપી, નવસારી, વલસાડ, વાંસદા, ડાંગમાં ભારે વરસાદ પડવાની આગાહી કરાઇ છે. આ ઉપરાંત અન્ય વિસ્તાર જેવા કે સૌરાષ્ટ્ર અને મધ્ય ગુજરાતમાં સારો વરસાદ રહેશે. કચ્છ, દીવ, દમણ, દાદરા-નગર હવેલી સહિતના વિસ્તારમાં મધ્યમ વરસાદ રહેશે.

ક્યાં કેટલો વરસાદ:

• હાલોલમાં 7.5 ઈંચ, ડભોઈમાં 7.5 ઈંચ વરસાદ
• સંખેડામાં 6 ઈંચ, કરજણમાં 6 ઈંચ વરસાદ
• તિલકવાડામાં 6 ઈંચ, વંથલીમાં 6 ઈંચ વરસાદ
• સાણંદમાં સવા 5 ઈંચ, વાઘોડિયામાં સવા 5 ઈંચ વરસાદ
• ઉમરપાડામાં 5 ઈંચ, વઘઈમાં 4.5 ઈંચ વરસાદ
• બોડેલીમાં 4.5 ઈંચ, વીસાવદરમાં સવા 4 ઈંચ વરસાદ
• કલોલમાં સવા 4 ઈંચ, માણાવદરમાં સવા 4 ઈંચ વરસાદ
• જૂનાગઢમાં 4 ઈંચ, માંડવિમાં 4 ઈંચ વરસાદ
• વાસોમાં 4 ઈંચ, નડિયાદમાં 4 ઈંચ વરસાદ
• જાંબુઘોડામાં 4 ઈંચ, વાલોદમાં 4 ઈંચ વરસાદ
• જંબુસરમાં 4 ઈંચ, ઓલપાડમાં 4 ઈંચ વરસાદ
• બારડોલીમાં 3.5 ઈંચ, મહુવામાં 3.5 ઈંચ વરસાદ
• મેંદરડામાં 3.5 ઈંચ, આમોદમાં 3.5 ઈંચ વરસાદ
• પાદરામાં 3 ઈંચ, ભરૂચમાં 3 ઈંચ વરસાદ
• આણંદમાં 3 ઈંચ, ધોળકામાં 3 ઈંચ વરસાદ
• સિદ્ધપુરમાં 3 ઈંચ, મહુધામાં 3 ઈંચ વરસાદ
• ગરુડેશ્વરમાં 3 ઈંચ, અમદાવાદમાં 2.5 ઈંચ વરસાદ
• પલસાણામાં 2.5 ઈંચ, બાબરામાં 2.5 ઈંચ વરસાદ
• બોરસદમાં 2.5 ઈંચ, માતરમાં 2.5 ઈંચ વરસાદ
• નાંદોદમાં 2.5 ઈંચ, વ્યારામાં 2.5 ઈંચ વરસાદ
• કપરાડામાં 2.5 ઈંચ, સોનગઢમાં 2.5 ઈંચ વરસાદ
• ખેડામાં 2.5 ઈંચ, ડોલવણમાં 2.5 ઈંચ વરસાદ
• સોજીત્રામાં સવા 2 ઈંચ, અંકલેશ્વરમાં સવા 2 ઈંચ વરસાદ
• વાંસદામાં સવા 2 ઈંચ, દશક્રોઈમાં સવા 2 ઈંચ વરસાદ
• કામરેજમાં સવા 2 ઈંચ, માંગરોલમાં સવા 2 ઈંચ વરસાદ
• સિનોરમાં સવા 2 ઈંચ, કેશોદમાં સવા 2 ઈંચ વરસાદ
• ચોર્યાસીમાં સવા 2 ઈંચ, બાવલામાં સવા 2 ઈંચ વરસાદ