ચોમાસું / રાજ્યમાં મેઘરાજાની ક્યાંક મહેર તો ક્યાંક કહેર, જાણો ક્યાં કેવી છે પરિસ્થિતિ?

અમદાવાદ:

અમદાવાદમાં ગઇકાલે મેઘરાજાની ધમાકેદાર બેટિંગ બાદ આજે મોડી રાત્રે ફરી વરસાદ શરૂ થઇ ગયો હતો. શહેરમાં સતત 3 દિવસથી વરસાદી માહોલ છે. શહેરના અનેક વિસ્તારોમા મોડી રાત્રે વરસાદ શરૂ થયો હતો. ઓઢવ, વટવા, ગોતા, બોડકદેવ સહિતના વિસ્તારોમાં વરસાદ પડ્યો છે. હજુ પણ શહેરમાં ધીમીધીરે વરસાદ પડી રહ્યો છે. ઝરમર ઝરમર વરસાદમાં અમદાવાદીઓ મજા માણી રહ્યા છે.

વડોદરા:

વડોદરામાં મનમૂકીને મેઘરાજા વરસી રહ્યા છે. ત્યારે શહેરમાં ફરી પૂરનો ખતરો તોળાઇ રહ્યો છે. વડોદરામાં વિશ્વામિત્રી નદીએ ભયજનક સપાટી વટાવી દીધી છે. હાલ નદી 30 ફૂટની સપાટી પર છે. ત્યારે ફરી એક વખત વડોદરામાં પૂરનું સંકટ છે. આજવા ડેમની સપાટી 212 ફૂટ છે. હાલ વિશ્વામિત્રી પર આવેલા 8 બ્રિજ બંધ કરી દેવાયા છે

સુરેન્દ્રનગર:

સુરેન્દ્રનગરમાં ઉપરવાસમાં વરસાદના કારણે ધોળીધઝા ડેમ ઓવરફ્લો થતાં ડેમમાંથી પાણી છોડવામાં આવ્યું છે. જેથી ભોગાવો નદીમાં પાણીની આવક થતા તંત્ર એલર્ટ પર છે. તંત્ર દ્વારા જોરાવરનગર કોઝ-વે, રતનપર વિસ્તારો એલર્ટ પર છે. વઢવાણ સહિતના નીચાણવાળા વિસ્તારોને એલર્ટ કરી દેવાયા છે. જ્યારે સુરેન્દ્રનગર-પાટડી રોડ પર નાળું પણ તૂટ્યું છે. ખેરવા ગામ નજીક નાળું તૂટતા સ્થાનિકો અને વાહનચાલકોને હાલાકી પડી રહી છે. આરોગ્ય કેન્દ્ર સહિત ગામમાં પાણી ફરી વળ્યા છે. 2 દિવસમાં પડેલા ભારે વરસાદના કારણે નાળું તૂટ્યું છે.

નર્મદા:

નર્મદામાં સતત ધોધમાર વરસાદ થઈ રહ્યો છે. ભારે વરસાદના કારણે સરદાર સરોવર નર્મદા ડેમની સપાટીમાં વધારો થયો છે. હાલમાં ડેમમાં 1 લાખ 89 હજાર 244 ક્યુસેક પાણીની આવક થઈ રહી છે. ડેમની સપાટી વધીને 131.65 મીટરે પહોંચી છે. પાણીની આવક થતા ડેમના 8 દરવાજા ખોલાયા છે.

જામનગર:

જામનગરના જોડિયા પંથકના ગામડાઓ પરથી પૂરનો ખતરો ટળ્યો છે. રણજીતપર, જીવાપર, મોરાણા ગામ બેટમાં ફેરવાયા હતા. તારાણા, માધાપર, સાંપર, જામસર સહિતના ગામો પાણી પાણી થઇ ગયા હતા. ડેમી-3 ઓવર ફ્લો થતા ગામો બેટમાં ફેરવાઇ ગયા હતા. જો કે હાલ સ્થિતિ સામાન્ય બની ગઇ છે. ગામડાઓમાંથી પાણી ઓસર્યા છે. તો જામનગરમાં વરસાદના કારણે બાલંભા ગામમાં ફસાયેલી સગર્ભા મહિલાને બચાવાઇ હતી. જોડિયા પંથકમાં રાત્રે NDRFની ટીમ દ્વારા સગર્ભા મહિલાને બચાવી જોડિયા હોસ્પિટલમાં ખસેડાઇ હતી. જ્યાં મહિલાએ બાળકને જન્મ આપ્યો. હાલ જામનદરમાં રણજીત સાગર, સસોઇ, કંકાવટી, ઉન્ડ અને આજી ડેમમાં પાણીની આવક થઇ છે.

ખેડા:

ખેડા જિલ્લામાં પૂરની સ્થિત વચ્ચે રાહતના સમાચાર છે. ડાકોર અને આજુબાજુના નીચાણવાળા વિસ્તારોમાંથી પાણી ઓસરી ગયા છે. જો કે ડાકોર, ખેડામાં ધીમીધારે હજુ પણ વરસાદ પડી રહ્યો છે. ડાકોરમાં ભારે વરસાદના કારણે વીજ પુરવઠો ખોરવાયો છે.

સુરત:

સુરતની કીમ નદીના જળસ્તરમાં ઘટાડો થયો છે. વરસાદ ધીમો થતા કીમ નદીનું જળસ્તર ઘટ્યું છે. ગતરોજથી જિલ્લામાં ધીમીધારે વરસાદ પડી રહ્યો છે. શનિવારે કીમ નદી બે કાંઠે થઇ હતી. જો કે આજે વરસાદ ઓછો રહેતા જળસ્તરમાં નોંધપાત્ર ઘટાડો થયો છે.

તાપી:

તાપીમાં ઉકાઇ ડેમના ઉપરવાસમાં ભારે વરસાદથી પાણીની આવક વધી છે. ઉકાઇ ડેમની સપાટી 337.07 ફૂટ પર છે. ઉકાઇ ડેમમાં પાણીની આવક 2 લાખ 89 હજાર ક્યૂસેક છે. જ્યારે ડેમમાંથી 1 લાખ 94 હજાર ક્યૂસેક પાણી છોડવામાં આવી રહ્યું છે. ઉકાઇ ડેમની ભયજનક સપાટી 345 ફૂટ છે.

બોટાદ:

બોટાદના ભારે વરસાદના પગલે નાવડા પમ્પિંગ સ્ટેશનમાં પાણી ભરાઇ ગયા છે. 6 પમ્પિંગ સ્ટેશન, મશીનરી અને પેનલ બોર્ડ પાણીમાં ગરકાવ થઇ ગયા છે. જેને લઇ સૌરાષ્ટ્રના પાણી વિતરણમાં અડચણ ઉભી થઇ શકે છે. 38 શહેરો અને 4 હજાર ગામોને પાણી વિતરણમાં સમસ્યા ઉભી થઇ શકે છે. હાલ ઝડપથી પમ્પિંગ સ્ટેશન શરૂ કરવાની કામગીરી હાથ ધરાઇ છે.

આગાહી:

રાજ્યમાં 24 કલાકમાં ભારે વરસાદની આગાહી કરવામાં આવી છે. અને આજે પણ ભારે વરસાદનું સંકટ યથાવત છે. હવામાન વિભાગ દ્વારા પાટણ, મહેસાણા, બનાસકાંઠા, સાબરકાંઠા, ગાંધીનગર, અમદાવાદ,સુરેન્દ્રનગર,પોરબંદરમાં ભારે વરસાદની આગાહી કરાઇ છે. જ્યારે રાજકોટ, મોરબી, દેવભૂમિ દ્વારકા, ગીરસોમનાથ, બોટાદ, જામનગર, કચ્છમાં ભારેથી અતિભારે વરસાદની આગાહી કરાઇ છે. તો અરવલ્લી, ખેડા, આણંદ, વડોદરા,પંચમહાલ ઉપરાંત દાહોદ, નર્મદા ,ભરૂચ, સુરતમાં ભારેથી અતિભારે વરસાદની આગાહી કરાઇ છે. જ્યારે વલસાડ અને નવસારીમાં પણ ભારે વરસાદ પડી શકે છે. ત્યારે ભારેથી અતિભારે વરસાદને લઇ માછીમારોને દરિયો ન ખેડવા સૂચન અપાયા છે.

ગુજરાતમાં મોટા ડેમની સ્થિતિ:

• ઉકાઈ ડેમ-    સપાટી- 102.21 મીટર- આવક- 5,38,312 ક્યૂસેક
• નર્મદા ડેમ-    સપાટી- 131.22 મીટર- આવક- 1,65,110 ક્યૂસેક
• કરજણ ડેમ- સપાટી- 109.08 મીટર- આવક- 32,375 ક્યૂસેક
• દમણગંગા ડેમ- સપાટી-73.03 મીટર- આવક- 20,627 ક્યૂસેક
• કડાણા ડેમ- સપાટી- 125.48 મીટર- આવક- 46,482 ક્યૂસેક

ગુજરાતમાં સિઝનનો 71 ટકા વરસાદ પડ્યો છે. ગુજરાતમાં તમામ તાલુકામાં સારો વરસાદ પડ્યો છે. અત્યાર સુધી દક્ષિણ ગુજરાતમાં 98 ટકા વરસાદ પડ્યો છે. જ્યારે સૌરાષ્ટ્રમાં સિઝનનો 64 ટકા વરસાદ પડ્યો છે. જ્યારે મધ્ય ગુજરાતમાં 71 ટકા અને ઉત્તર ગુજરાતમાં 51 ટકા વરસાદ પડ્યો છે. તો ભરૂચ, નર્મદા, સુરત, છોટાઉદેપુરમાં સિઝનનો 100 ટકા વરસાદ પડ્યો છે. જ્યારં ડાંગ, નવસારી, વલસાડમાં સિઝનનો 90થી 95 ટકા વરસાદ છે. ગત સિઝન કરતા આ વર્ષે સારો વરસાદ રહેતા ગુજરાતમાં લોકોમાં ખુશી છે. જ્યારે હજુ પણ ગુજરાતમાં સારા વરસાદની સંભાવના છે.