મુશળધાર / ઉદયપુર સ્ટેટ હાઇવે બંધ, નેશનલ હાઇવે પર 20 કિમીનો ચક્કાજામ: રાજસ્થાન બાજુ જવાના હોવ તો ચેતજો

• અરવલ્લી જિલ્લામાં વ્યાપક વરસાદ વરસતા નદીઓમાં ઘોડાપૂર
• ભૂસ્ખલનથી શામળાજી નેશનલ હાઈવે પર 20 કિ.મી ટ્રાફિક જામ
• ભારે વરસાદના કારણે શામળાજી-ઉદયપુર સ્ટેટ હાઇવે બંધ

અરવલ્લીમાં ભારે વરસાદના કારણે શામળાજી-ઉદયપુર સ્ટેટ હાઇવે બંધ થઇ ગયો છે. વેણપુર પાસે વરસાદી પાણી ફરી વળતા 5 કિમીનો લાંબો ટ્રાફિક જામ સર્જાયો છે. આ સાથે અરવલ્લીની ગીરીમાળામાં ભૂસ્ખલન થતા શામળાજી નેશનલ હાઈવે પર 20 કિ.મી.નો ટ્રાફિક જામ સર્જાતા વાહનવ્યવહાર ખોરવાયો છે. શિલાઓ પડતા કેટલાક વાહનોને પણ નુકસાન થયું છે.

શામળાજી સર્કિટ હાઉસમાં પાણી ભરાઇ ગયા

બીજી બાજુ મોડાસા-શામળાજી હાઈવે ઉપર વરસાદી પાણી ફરી વળતા શામળાજી સર્કિટ હાઉસમાં પાણી ભરાઇ ગયા છે. ખેતરો જળબંબાકાર થઇ ગયા છે અને સ્ટેટ હાઈ-વે ધોવાઇ ગયો છે. ભારે વરસાદના કારણે અરવલ્લીમાં અનેક તળાવો ભરાઇ ગયા છે.

પાલનપુરના આબુ હાઇવે પર પણ પાણી ફરી વળ્યાં

બનાસકાંઠાના પાલનપુરમાં ધોધમાર વરસાદ વરસતા નીચાણવાળા વિસ્તારોમાં પાણી ભરાઇ ગયા છે. વહેલી સવારે બે કલાકમાં એક ઇંચ વરસાદ ખાબક્યો છે. ભારે વરસાદના કારણે પાલનપુરના આબુ હાઇવે પર પણ પાણી ભરાઇ ગયા છે. ગઠામણ પાટીયા તેમજ અંબાજીને જોડતા હાઇવે પર પાણી ફરી વળ્યાં છે. જેના લીધે વાહનચાલકોએ મુશ્કેલીનો સામનો કરવો પડી રહ્યો છે.

શામળાજીથી બહેચરપુરા તરફનો કોઝ-વે બંધ

અરવલ્લીના સુનોખમાં 6 ઈંચ વરસાદના કારણે ગામમાં પાણી ફરી વળ્યા છે. નેશનલ હાઈ-વેના પાણી ગામમાં ફરી વળતા ગ્રામજનોએ ભારે હાલાકીનો સામનો કરવો પડી રહ્યો છે. એ સિવાય અરવલ્લી જિલ્લામાં સાર્વત્રિક વરસાદના કારણે શામળાજી પાસે મેશ્વો નદીમાં ઘોડાપૂર જેવી સ્થિતિ સર્જાઇ છે. કોઝ-વે ઉપર પાણી ફરી વળતા શામળાજીથી બહેચરપુરા તરફનો કોઝ-વે બંધ કરાયો.

ટીટોઈમાં 7 ઇંચ જેટલો વરસાદ નોંધાયો

અરવલ્લી જિલ્લામાં ધોધમાર વરસાદના કારણે મોડાસા તાલુકાના ટીંટોઇ ગામે નદી વહેતી થઇ છે. ટીટોઈમાં 7 ઇંચ જેટલો વરસાદ નોંધાયો છે. આથી ટીંટોઇ ગામના નીચાણવાળા વિસ્તારોમાં પાણીમાં ગરકાવ થઇ ગયા છે. ટીંટોઈના ડુંગર વિસ્તારનું પાણી ગામમાં ઘૂસી ગયા છે. આથી, નદી જેવા વહેતા પાણીને જોવા માટે સ્થાનિકોની ભારે ભીડ ઉમટી છે.