અનરાધાર / અમદાવાદમાં મોડી રાત્રે મેઘરાજાની ધમાકેદાર બેટિંગ, છેલ્લા 3 કલાકથી વરસાદ બંધ છતાં પૂર્વ વિસ્તાર હજુ પાણી-પાણી

• અમદાવાદમાં આજે મોડી રાત્રે વરસ્યો મુશળધાર વરસાદ
• શહેરના નીચાણવાળા વિસ્તારોમાં ઢીંચણસમા પાણી ભરાયા
• આજે રાજ્યમાં સાર્વત્રિક વરસાદની હવામાન વિભાગની આગાહી

ગુજરાતમાં હજુ ભારે વરસાદ વરસશે એવી હવામાન વિભાગે આગાહી કરી છે. ત્યારે આજે મોડી રાત્રે અમદાવાદમાં તડામાર વરસાદ વરસ્યો હતો. શહેરના અનેક વિસ્તારમાં મોડી રાત્રે ધોધમાર વરસાદ પડ્યો હતો. જેના લીધે અનેક વિસ્તારો પાણી-પાણી થઇ ગયા છે.

સૌથી વધુ વરસાદ શહેરમાં પૂર્વ વિસ્તારમાં પડ્યો

એમાંય સૌથી વધુ વરસાદ શહેરમાં પૂર્વ વિસ્તારમાં પડ્યો હતો. જેના લીધે નીચાણવાળા વિસ્તારોમાં પાણી ભરાઇ જતા લોકોને ભારે મુશ્કેલીનો સામનો કરવો પડી રહ્યો છે. વરસાદ બંધ થઇ ગયો હોવા છતાં હજુ સુધી કેટલાક વિસ્તારોમાં પાણી નથી ઓસર્યા. કારણ કે ડ્રેનેજની સુવિધા ન હોવાના કારણે શહેરીજનોએ ભારે હાલાકી ભોગવવી પડે છે. શહેરમાં કેટલીક સ્કૂલોની બહાર પણ વરસાદના પાણી ભરાઇ જતા વાલીઓને બાળકોને સ્કૂલે મૂકવામાં ભારે પરેશાની ભોગવવી પડી છે. શહેરમાં આવેલ પ્રકાશ સ્કૂલની બહાર વરસાદી પાણી ભરાઇ ગયા હોવા છતા બાળકો સ્કૂલે જવા માટે મજબૂર બન્યા છે. હાઈવે નં. 8ના સર્વિસ રોડ પર પણ ઢીંચણસમા પાણી ભરાઇ જતા વાહનચાલકોએ ભારે મુશ્કેલીનો સામનો કરવો પડી રહ્યો છે.

આજે પણ તમામ જિલ્લાઓમાં સાર્વત્રિક વરસાદની આગાહી

તમને જણાવી દઇએ કે, બંગાળની ખાડીમાં લો પ્રેશર સર્જાવાના કારણે રાજ્યમાં હજુ ભારે વરસાદ પડવાની શક્યતા છે. ત્યારે હવામાન વિભાગની આગાહી અનુસાર, આજે રાજ્યના તમામ જિલ્લામાં સાર્વત્રિક વરસાદ વરસશે. આજે રાજ્યના અનેક જિલ્લાઓને મેઘરાજા ધમરોળશે. રાજ્યમાં પોરબંદર, મોરબી, બોટાદ, સુરેન્દ્રનગર, રાજકોટ, જામનગર, દ્વારકા, અમરેલી, ગીર સોમનાથ, જૂનાગઢ, ભાવનગર, પાટણમાં વરસાદની આગાહી કરવામાં આવી છે.

બીજી બાજુ આજે અમદાવાદ, કચ્છ, ખેડા, બનાસકાંઠા, સાબરકાંઠા, દાહોદ, મહેસાણા, ગાંધીનગર, ડાંગ, સુરત, વલસાડ, નવસારી, ભરૂચ, નર્મદા અને તાપીમાં પણ સારો એવો વરસાદ વરસી શકે છે.