હવામાન / ગુજરાતમાં વરસાદી માહોલ: ક્યાક ઝાંપડા તો ક્યાક ધોધમાર, ખેડૂતોમાં ખુશીનો માહોલ

અમદાવાદમાં હળવો વરસાદ

અમદાવાદમાં ધીમીધારે વરસાદ શરૂ થયો. બોડકદેવ, SG હાઇવે, પકવાન સર્કલ પાસે વરસાદ પડ્યો. વસ્ત્રાપુર, માનસી, શિવરંજની ઇસ્કોન, થલતેજ અને વેજલપુરની આસપાસના વિસ્તારમાં વરસાદ પડતા પગલે વાતાવરણમાં ઠંડક પ્રસરી છે.

સુરત પાંડેસરા વિસ્તારમાં વરસાદ

તો સુરત પાંડેસરા વિસ્તારમાં પણ ધોધમાર વરસાદ પડ્યો હતો. ભારે વરસાદથી વતાવરણમાં ઠંડક થઇ હતી. આ વરસાદ થતા સુરતીવાસીઓમાં હાશકારો થયો છે.

બનાસકાંઠામાં થરાદ પંથકમાં ધીમી ધારે વરસાદ 

તો આ તરફ બનાસકાંઠામાં થરાદ પંથકમાં ધીમી ધારે વરસાદ પડ્યો હતો. ધીમીધારે વરસાદ પડતા ખેડૂતોમાં ખૂશીનો માહોલ જોવા મળ્યો. બનાસકાંઠા જિલ્લામાં ભારે વરસાદની આગાહી કરવામાં આવી હોવાથી અહીં NDRFની ટીમ પણ તૈનાત કરવામાં આવી છે. 

છોટાઉદેપુરમાં વરસાદી માહોલ 

આ તરફ છોટાઉદેપુરમાં વરસાદી માહોલ સર્જાયો છે. છોટાઉદેપુરના પાવીજેતપુરમાં ધોધમાર વરસાદ શરૂ થયો થતા ભારે બફારાથી લોકોને રાહત મળી હતી. આ વરસાદથી ખેડૂતોમાં ખુશીની લાગણી જોવા મળી છે.

ભરૂચ શહેરમાં જામ્યો વરસાદી માહોલ 

ભરૂચ શહેરમાં વરસાદી માહોલ જામ્યો છે. 4 કલાક બાદ ફરી એકવાર મેઘરાજાનું આગમન થયું છે. આ વરસાદને લઇ વાતાવરણમાં ઠંડક પ્રસરી  છે. અંકલેશ્વરમાં વરસાદી માહોલમાં લોકોએ અલગ પ્રકારે મોજ માણી છે. વરસાદમાં લોકોએ ગરબા રમી મોજ માણી હતી.

અરવલ્લીમાં અતિભારે વરસાદની આગાહી

અરવલ્લી જીલ્લામાં અતિભારે વરસાદની આગાહી હવામાન વિભાગ કરી છે. આ આગાહીને લઈને તંત્ર સજ્જ બન્યું છે. જીલ્લામાં કોઈપણ સ્થિતિને પહોંચી વળવા માટે NDRFના 30 જવાનોની ટીમ તમામ પ્રકારોના સાધનો સાથે પહોચી છે. આ ટીમ બે દિવસથી અરવલ્લી જીલ્લામાં અલગ-અલગ સ્થળોનું નિરીક્ષણ કરી રહી છે.