મેઘમહેર / રાજકોટમાં ધોધમાર વરસાદ વરસ્યો, નિચાણવાળા વિસ્તારોમાં પાણી ભરાયા, ખેડૂતોમાં ખુશીની લહેર

સિઝનના પ્રથમ વરસાદમાં જ તંત્રની ખુલી ગઈ પોલ
રાજકોટ જિલ્લામાં ધોધમાર વરસાદ વરસ્યો હતો. જેના કારણે અનેક નિચાણવાળા વિસ્તારો પાણીમાં ગરકાવ થઈ ગયા હતા. સિઝનના પ્રથમ વરસાદમાં જ તંત્રની પોલ ખુલી ગઈ છે. તો લક્ષ્મીનગરના ગરનાળામાં પાણી ભરાયું છે. એકથી દોઢ ઈંચ જેટલો વરસાદ ખાબકતાં ગોંડલ, ઢેબર અને યાજ્ઞિક રોડ પર પાણી ભરાઈ ગયું.

તો રાજકોટના મવડી સહિતના વિસ્તારોમાં પણ વરસાદી પાણી ભરાયા હતા. તો કાલાવડ રોડ અને 150 ફૂટ રિંગ રોડ પર દોઢ ફૂટ જેટલા પાણી ભરાઈ જતાં વાહન ચાલકોને હાલાકીનો સામનો કરવો પડ્યો હતો. 

રાજ્યના અનેક જિલ્લાઓમાં ખેડૂતોમાં ખુશીની લહેર
રાજ્યના અનેક જિલ્લાઓમાં વરસાદી માહોલ છવાયો છે. વહેલી સવારથી અમરેલી, સુરેન્દ્રનગર, ગીર સોમનાથ, બનાસકાંઠા અને રાજકોટમાં પણ વરસાદનું આગમન થયુ. અમરેલીમાં ધીમીધારે વરસાદ પડ્યો.

તો બીજી તરફ સુરેન્દ્રનગરના વઢવાણ સહિતના વિસ્તારોમાં ઝરમર વરસાદની શરૂઆત થઈ. ગીર સોમનાથના વેરાવળ, તાલાલા, સુત્રાપાડા, કોડીનાર, ઊના, ગીરી સહિતના તમામ વિસ્તારોમો વરસાદ ખાબક્યો.

બનાસકાંઠાના પાલનપુર, ડીસા, ધાનેરામાં વરસાદ પડી રહ્યો છે. તો દાંતીવાડામાં પણ ધીમીધારે વરસાદ વરસ્યો. આ ઉપરાંત રાજકોટમાં પણ વરસાદનું આગમન થયું. હવામાન વિભાગે હજુ પણ બે દિવસમાં ભારે વરસાદ થાય તેવી આગાહી કરી છે. જેને લઈને ધરતીપુત્રોમાં આનંદની લાગણી છવાઈ છે.