રાજ્યમાં છેલ્લા 24 કલાકમાં સરેરાશ 17.12 મિમી વરસાદ નોંધાયો છે. છેલ્લા 24 કલાકમાં 23 જિલ્લાના 12 તાલુકામાં વરસાદ વરસ્યો. રાજ્યમાં સૌથી વધુ વાપીમાં 14 ઈંચ વરસાદ નોંધાયો છે.. જુન મહિનામાં રાજ્યમાં કુલ સવા ચાર ઈંચ વરસાદ નોંધાયો છે. જ્યારે જુલાઈ માસની શરૂઆતમાં પોણો ઈંચ વરસાદ નોંધાયો. સીઝનનો અત્યાર સુધીનો 15.13 ટકા વરસાદ નોંધાયો છે. દક્ષિણ ગુજરાતમાં વરસાદ થંભવાનું નામ નથી લઈ રહ્યો.
રાજ્યમાં છેલ્લા 24 કલાકમાં સરેરાશ 17.12 મિમી વરસાદ નોંધાયો છે. છેલ્લા 24 કલાકમાં 23 જિલ્લાના 12 તાલુકામાં વરસાદ વરસ્યો. રાજ્યમાં સૌથી વધુ વાપીમાં 14 ઈંચ વરસાદ નોંધાયો છે.. જુન મહિનામાં રાજ્યમાં કુલ સવા ચાર ઈંચ વરસાદ નોંધાયો છે. જ્યારે જુલાઈ માસની શરૂઆતમાં પોણો ઈંચ વરસાદ નોંધાયો. સીઝનનો અત્યાર સુધીનો 15.13 ટકા વરસાદ નોંધાયો છે. રાજ્યનાં 44 તાલુકામાં 0થી 2 ઈંચ વરસાદ, 132 તાલુકામાં 2થી 5 ઈંચ વરસાદ, 66 તાલુકામાં 5થી 10 ઈંચ વરસાદ, 16 તાલુકામાં 10થી 20 ઈંચ વરસાદ અને 6 તાલુકામાં 20થી 40 ઈંચ જેટલો વરસાદ નોંધાયો છે.
આ વિસ્તારોમાં ભારે વરસાદની આગાહીઃ
દક્ષિણ ગુજરાતમાં વરસાદ થંભવાનું નામ નથી લઈ રહ્યો..ત્યારે હવામાન વિભાગે હજુ પણ આગામી 3 દિવસ સુધી રાજ્યમાં વરસાદી માહોલ રહેશે તેવી આગાહી કરી છે. હવામાન વિભાગનું માનીએ તો દક્ષિણ ગુજરાતના જિલ્લાઓમાં ભારે વરસાદ થઈ શકે છે. ખાસ કરીને દમણ, દાદરાનગર હવેલી, સુરત, નવસારી અને વલસાડમાં વરસાદ થઈ શકે છે. તો આ તરફ મધ્યપ્રદેશની બોર્ડરે આવેલા પંચમહાલ, દાહોદ, છોટાઉદેપુરમાં ભારે વરસાદ થઈ શકે છે. જ્યારે મધ્યગુજરાત અને કચ્છમાં સામાન્ય વરસાદ પડી શકે છે. આ તરફ સૌરાષ્ટ્રના દરિયા કિનારાના જિલ્લાઓમાં વરસાદ થાય તેવી શક્યતા છે. જેમાં દ્વારકા, જૂનાગઢ, પોરબંદરમાં વરસાદી માહોલ યથાવત્ રહી શકે છે. તો ઉત્તર ગુજરાતમાં અને કચ્છમાં કેટલાક વિસ્તારોમાં સામાન્ય વરસાદ થઈ શકે છે.
અંબાલાલે પણ કરી હતી આગાહીઃ
હવામાનશાસ્ત્રી અંબાલાલ પટેલે વરસાદની આગાહી કરી છે. 2 જુલાઈ સુધી મધ્ય અને ઉત્તરગુજરાતમાં વરસાદ પડવાની આગાહી કરવામાં આવી છે. 4થી 7 જુલાઈ દરમિયાન ઉત્તર ગુજરાતમાં વરસાદ પડવાની આગાહી કરવામાં આવી છે. સાબરકાંઠા સહિત ઉત્તરગુજરાતમાં ભારે વરસાદની આગાહી કરવામાં આવી છે. તો અંબાલાલ પટેલે દક્ષિણ ગુજરાતમાં પણ 4થી 7 જુલાઈ દરમિયાન વરસાદની આગાહી કરી છે.
દક્ષિણ ગુજરાતમાં ભારે વરસાદઃ
વલસાડના ઉમરગામમાં ભારે વરસાદના કારણે સામાન્ય જનજીવનને અસર પડી છે. વરોલી ખાડી બે કાંઠે વહેતા નીચાણવાળા વિસ્તારોમાં પાણી ભરાયા છે. ટીંબી ગામમાં માછીવાડમાં લોકોના ઘરમાં નદીના પાણી ઘૂસી ગયા છે. તો રસ્તા પર પાણી ભરાઇ જતા ટેમ્પો પાણીમાં ફસાઇ ગયો છે. અને મહારાષ્ટ્ર-સંજાણને જોડતો ખાડીનો પુલ પણ પાણીમાં ગરકાવ થઇ ગયો છે. બીજી બાજુ કપરાડામાં ભારે વરસાદને પગલે કોલક નદીમાં નવા નીર આવ્યા છે.
નવા નીર આવતા ખેડૂતોમાં ખુશીનો માહોલ જોવા મળ્યો છે. નદીમાં નવા નીર આવતા શિલ્પા ગામમાં આવેલો કોઝવે ડૂબ્યો છે.. કોઝવે ડૂબતા વાહન ચાલકોને પરેશાનીનો સામનો કરવાનો વારો આવ્યો છે. ભારે વરસાદના કારણ વાપીમાં વિયર કમ કોઝવે ઓવરફ્લો થઇ ગયો છે. ઉપરવાસમાં વરસાદ પડતા વાપીમાં દમણગંગા નદીનો કોઝવે ઓવરફ્લો થયો છે. વાપીની જીવાદોરી સમાન ગણાતી દમણગંગા નદીમાં નવા નીરની આવક થઇ છે.
આ બાજુ નવસારીમાં પણ સતત ભારે વરસાદ વરસી રહ્યો છે.. ભારે વરસાદને પગલે તરોટા બજારના દેસાઈવાડામાં બે મકાનની ગેલેરી ધરાશાયી થઈ છે.. જર્જરિત મકાનની ગેલેરી ધરાશાયી થઈ હતી. પાલિકાએ નોટિસ આપ્યા બાદ પણ મકાન માલિકોએ ધ્યાન આપ્યુ ન હતું. સદનસીબે આ ઘટનામાં કોઈ જનહાની થઈ નથી... બે દિવસ પહેલા પણ જલાલપોરના વાણીયાવાડમાં બે મકાન ધરાશાયી થયા હતાં. ત્યારે હવે જિલ્લામાં વધુ મકાન ધરાશાયી થયા છે.
વડોદરા-સુરતમાં તંત્રની પોલ ખુલીઃ
વરસાદ આવતા શહેરોમાં ભૂવા પડવાની પણ શરૂઆત થઈ છે.. સુરત અને વડોદરામાં વરસાદ આવતા તંત્રની પ્રિ-મોન્સૂનની કામગીરીની પોલ ખુલી છે. વડોદરાના આજવા રોડ અને આરવી દેસાઈ રોડ પર ભૂવા પડ્યાં છે. ગંગોત્રી એપાર્ટમેન્ટ અને આજવા રોડ પર દિનદયાળ નગર પાસે ભૂવો પડ્યો છે. તો બીજી તરફ સુરતના વેસુ વિસ્તારમાં આવેલા ફાયર સ્ટેશન પાસે 40 ફૂટનો ભૂવો પડ્યો છે. રસ્તા પર ભૂવો પડતા SMC કમિશનર એમ.થેનારાસન ઘટનાસ્થળે દોડી આવ્યા હતાં. રસ્તાની વચ્ચે ભૂવો પડતા વાહન ચાલકોને પરેશાનીનો સામનો કરવો પડી રહ્યો છે
રેલવે વ્યવહાર ખોરવાયોઃ
મહારાષ્ટ્રના પાલઘર રેલવે સ્ટેશન પર પાણી ભરાયા છે. જેને લઇ સુરતથી મુંબઇ વચ્ચેના ટ્રેન વ્યવહારને અસર પડી છે. અને મોટાભાગની ટ્રેન 2થી 3 કલાક મોડી ચાલી રહી છે. જેમાં રણકપુર એક્સપ્રેસ 2.30 કલાક મોડી પડી છે. ગ્વાલિયર વિકલી 2.15 કલાક મોડી પડી, ગુજરાત એક્સપ્રેસ 50 મિનિટ મોડી, કચ્છ એક્સપ્રેસ 2 કલાક મોડી પડી છે. કર્ણાવતી એક્સપ્રેસ 34 મિનિટ અને દાદર વેસ્ટર્ન એક્સપ્રેસ 40 મિનિટ મોડી પડી છે. જ્યારે બિકાનેર એક્સપ્રેસ 1.10 કલાક મોડી છે. તો સુરત-વિરાર શટલ પણ રદ કરી દેવાઇ છે. આ ઉપરાંત વલસાડ-વાપી પેસેન્જર રદ કરવામાં આવી છે. જેને લઇ યાત્રીઓ અટવાયા છે.
વરસાદના કારણે માયાનગરી મુંબઈના હાલ બેહાલ થઈ ગયા છે..મુંબઈમાં ફરી એકવાર વરસાદ શરૂ થઈ ગયો છે. ગઈકાલે મધરાતથી શરૂ થયેલા બારે વરસાદના કારણે મુંબઈમાં અનેક વિસ્તારોમાં ત્રણથી ચાર ફૂટ સુધી પાણી ભરાઈ ગયા હતાં. તો આ તરફ પાલઘરમાં પાણી ભરાઈ જવાના કારણે 4 ટ્રેન રદ્દ અને પાંચ ટ્રેનને ડાયવર્ટ કરવામાં આવી હતી. હવામાન વિભાગે આજે પણ મુંબઈમાં ભારે વરસાદનું એલર્ટ જાહેર કર્યું છે.
આ સાથે જ મુંબઈમાં હાઈટાઈડનું એલર્ટ પણ આપ્યું છે. તો વરસાદના કારણે રેલવે ટ્રેક પણ પાણીમાં ગરકાવ થઈ ગયા છે. મુંબઈમાં ભારે વરસાદનાં કારણે માર્ગો પર ઉભેલી ગાડીઓ પણ ડુબવા લાગી હતી. તો પાણી ઘુસી જવાથી અનેક ગાડીઓ બંધ પડી ગઈ હતી અને લોકો ગાડીને ધક્કો મારવા માટે મજબૂર બન્યા હતા. તો ભારે વરસાદના કારણે ટ્રાફિક જામની સ્થિતિ સર્જાઈ હતી. કેટલાક વિસ્તારોમાં દુકાનો અને મકાનોમાં પણ પાણી ઘુસી ગયા હતા. જો કે આજે પણ ભારે વરસાદની આગાહી છે. જો આજે દરિયાએ પાણી ન સ્વીકાર્યું તો મુંબઈગરાની મુશ્કેલીમાં વધારો થઈ શકે છે.