વડોદરામાં ગત રાત્રી દરમિયાન વરસાદની શરૂઆત થઇ હતી. ત્યારે હાલ શહેરમાં ધોધમાર વરસાદ વરસી રહ્યો છે. છેલ્લા 14 કલાકમાં 18 ઈંચથી વધુ વરસાદ વરસ્યો છે. ત્યારે હાલ વડોદરામાં લોકો ભારે મુશ્કેલીનો સામનો કરી રહ્યા છે.
વડોદરામાં ભારે વરસાદથી લોકોની જનજીવન અસ્તવ્યસ્ત થઇ ગયું છે. વડોદરામાં વરસાદે 14 વર્ષ જૂનો રેકોર્ડ તોડ્યો છે. 14 કલાકમાં 18 ઈંચ વરસાદ નોંધાયો છે. જેને લઇને રોડ, રસ્તા, ગરનાળા અને નિચાણવાળા વિસ્તારોમાં પાણી ભરાયા છે. જેનાથી લોકોને આવવા જવામાં મુશ્કેલીનો સામનો કરવો પડી રહ્યો છે. પાણી ભરાવાને લઇને લોકોના વાહન રોડ પર ફંસાઇ ગયા છે. આ વરસાદને લઇને વડોદરા જિલ્લા કલેક્ટરે તમામ સરકારી, પ્રાઇવેટ અને વીએમસીની શાળાઓને ગુરૂવારે બંધ કરવાનો આદેશ આપ્યો છે.
ત્યારે, મુખ્યમંત્રી વિજય રૂપાણીએ વડોદરામાં થયેલ વરસાદ અને ત્યાંની પરિસ્થિતિની સમીક્ષા કરી હતી. સ્ટેટ કંટ્રોલ ઓફિસ ખાતે ઇમરજન્સી સેવાઓને લઇને બેઠક બોલાવી હતી. જ્યારે ઇમરજન્સી કંટ્રોલ રૂમ શરૂ કરવામાં આવ્યો છે. જેને લઇને હેલ્પલાઇન નંબર 1800-233 0265, 0265-2423101 અને 0265-2426101 જાહેર કરવામાં આવ્યો છે. આ નંબરો પર ફોન કરવાની સહાયતા માંગી શકાય છે.
આવતીકાલે શાળા-કોલેજોમાં રજા
સમગ્ર શહેર જળબંબાકાર સર્જાયો છે. વિશ્વામિત્રી ભયજનક સપાટીની નજીક વહેતી થઇ છે. 18 ઈંચ વરસાદ પડતા શાળા-કોલેજોમાં આવતીકાલે રજા જાહેર કરવામાં આવી છે. આપને જણાવી દઈએ વડોદરામાં ભારે વરસાદને કારણે પાણી ભરાતાં લોકોની હાલત કફોડી બની છે. વરસાદના કારણે અનેક સોસાયટીઓ પાણીમાં ગરક, રસ્તાઓ નદીમાં ફેરવાયા છે. નિચાણવાળા વિસ્તારોમાંથી સુરક્ષિત જગ્યા પર જવા મુખ્યમંત્રીએ સૂચન કર્યું છે. જ્યારે અનેક વિસ્તારોમાં શોર્ટ સર્કીટને કારણે વીજપુરવઠો ખોરવાયો છે.
CM રૂપાણીએ બોલાવી બેઠક
વડોદરામા અનાધાર વરસાદને પગલે CM રૂપાણીએ ઉચસ્તરીય સમીક્ષા બેઠક બોલાવી હતી. બે IAS અધિકારી વિનોદ રાવ અને લોચન સહેરાને સ્થાનિક તંત્રનુ માર્ગદર્શન આપવા સુચના અપાઇ છે. નીચાળવાળા વિસ્તારના લોકોને સલામત સ્થળે સ્થળાંતર કરવા સુચના અપાઇ છે.
અનેક વિસ્તારો પાણીમાં થઇ શકે છે ગરકાવ
જેમાં રાવપુરા, માર્કેટ ચાર રસ્તા, આકોટા, માંજલપુર, અલ્કાપુરી, સમા, કારેલીબાગ વિસ્તાર, ગોરવા, ગોત્રી સહિતના તમામ વિસ્તારમાં ભારે વરસાદ પડી રહ્યો છે. શહેરના નીચાણવાળા વિસ્તારમાં ગળાડુબ પાણી ભરાયા છે. ભારે વરસાદને કારણે જેતલપુર રોડ બંધ કરવો પડ્યો, જેતલપુર, અલ્કાપુરી, નવા યાર્ડમાં ભારે વરસાદથી પાણી પાણી થયું. જ્યારે એમ.એસ.યુનિ., અમિતનગર, કારેલીબાગ, આજવા રોડ, વાઘોડિયા રોડ, માંજલપુર, વાડી, ગોત્રી, ગોરવા વગેરે નીચાણવાળા વિસ્તારમાં પાણી ભરાયા તો શહેરની અનેક દુકાનોમાં પણ પાણી ભરાતા ભારે મુશ્કેલી સર્જાઈ હતી. લોકોએ મુશ્કેલી ભોગવ્યા બાદ વડોદરા મહાનગરપાલિકા તંત્ર અંતે હરકતમાં આવ્યું હતું. જો સતત વરસાદ ચાલુ રહે તો શહેરના અનેક વિસ્તારો પાણીમાં ગરકાવ થઈ શકે છે.
NDRFની ટીમ વડોદરા જવા રવાના
વડોદરામાં ભારે વરસાદની સ્થિતીની ધ્યાનેમાં લઇ તંત્ર અલર્ટ થયું છે. સમીક્ષા માટે પ્રભારી સચિવ લોચન સહેરા ગાંધીનગરથી રવાના થયા છે.3 સ્થાનિક NDRFની ટીમને અલર્ટ કરવામાં આવી છે. જ્યારે ગાંધીનગરથી NDRFની એક ટીમ રવાના કરવામાં આવી છે. તો NDRFની 2 ટીમ સ્ટેન્ડ બાય રાખવામાં આવી છે. આ ઉપરંત સેનાના જવાનોને અલર્ટ રહેવા સુચના આપવામાં આવી છે અને અમદાવાદ મનપા અને અને સુરત મનપાની ટીમને પણ મદદ માટે બોલાવવામાં આવી છે.
25 લોકોનું રેસક્યુ કરવામાં આવ્યું
શહેરમાં બારે મેઘ ખાંગા થતા પૂર જેવી સ્થિતિ સર્જાઈ હતી. જેને લઈને શહેરીજનો મુશ્કેલીમાં મુકાયા હતા. ત્યારે ફાયર બ્રિગેડ દ્વારા 25 લોકોનું રેસક્યુ કરવામાં આવ્યું છે. કારેલીબાગ તુલસીવાડીની વસાહત પાણીમાં ગરકાવ થઈ હતી. જેને લઈને લોકો જીવ બચાવવા ઘરના છાપરે ચડ્યા હતા. ત્યારે ફાયર બ્રિગેડે લોકોનું રેસક્યૂ કરી સલામત જગ્યાએ ખસેડ્યા હતા.
શહેરની અનેક શાળાઓમાં વિદ્યાર્થીઓ અટવાયા
શહેરની ઉર્મી સ્કૂલમાં પણ 200 જેટલા વિદ્યાર્થીઓ હાલ પોતાના માતા-પિતાની રાહ જોઈ રહ્યા છે. કારણ કે, જળબંબાકારની સ્થિતિના પગલે સ્કૂલના સ્ટાફ અને તંત્ર દ્વારા વિદ્યાર્થીઓને ઘરે મોકલવામાં આવ્યા નથી. તમામ વિદ્યાર્થીઓને સ્કૂલમાં જ રોકી લેવામાં આવ્યા છે. તેમના માટે કઢી-ખીચડી બનાવી તેમને જમાડવામાં આવ્યા છે. વીટીવીએ જ્યારે સ્કૂલના તંત્ર અને સ્ટાફ સાથે વાતચીત કરવાની કોશિશ કરી તો તેમણે જણાવ્યું હતું કે, જ્યાં સુધી વાલીઓ તેમના બાળકોને લેવા માટે નહીં આવે ત્યાં સુધી બાળકને ઘરે નહીં મોકલવામાં આવે. બાળકો માટે તમામ પ્રકારની વ્યવસ્થા કરવામાં આવી છે. જો વરસાદ અવિરત આવો જ રહ્યો તો રાત્રી દરમિયાન પણ બાળકોને સ્કૂલમાં જ રાખવામાં આવશે.