મેઘમહેર / સૌરાષ્ટ્ર અને ડાંગમાં ધોધમાર વરસાદ, આગામી 5 દિવસ આ વિસ્તારોમાં ભારે વરસાદની આગાહી

• રાજ્યમાં વરસાદી માહોલ જામ્યો
• રાજ્યમાં 67 તાલુકામાં વરસાદ ખાબક્યો
• સૌરાષ્ટ્રના અનેક પંથકમાં વરસાદ પડ્યો

રાજ્યમાં વરસાદી માહોલ જામ્યો છે. ક્યાંક ધોધમાર વરસાદ તો ક્યાંક ધીમીધારે વરસાદ પડ્યો છે. વરસાદના કારણે રસ્તાઓ પાણી પાણી થઇ ગયા છે. તો બીજી તરફ ક્યાંક નદી-નાળામાં પણ નવા નીર આવ્યા છે. રાજ્યમાં છેલ્લા 24 કલાકમાં 67 તાલુકામાં વરસાદ પડ્યો છે. જેમાં તાલાલાના ધાવા જશાપુર, અમૃતવેલ, રસુલપરા સહિતના ગામોમાં 1 ઇંચ વરસાદ ખાબક્યો છે. સૌથી વધુ વલસાડના ધરમપુરમાં 3.5 ઈંચ વરસાદ નોંધાયો છે. તો લિલિયામાં સવા 3 ઈંચ, અમરેલીમાં 2.5 ઈંચ, કોડીનારમાં 2 ઈંચ અને ભેસાણમાં 1.5 ઈંચ વરસાદ પડ્યો છે.

જૂનાગઢના વંથલીમાં ભારે વરસાદ

જૂનાગઢના વંથલી અને માળીયાહાટીનામાં ભારે વરસાદ થયો છે. ભારે વરસાદના પગલે ખેતરોમાં પાણીની આવક થઇ છે. વાવણીલાયક વરસાદના પગલે ખેડૂતોમાં ખુશીનો માહોલ છે. વંથલી આસપાસના અંદાજે 12 ગામમાં વરસાદ થયો છે. તેમજ માળીયાહાટી સહિત ગામોમાં વરસાદ થયો છે. પવન સાથે ધોધમાર વરસાદ શરૂ થયો છે. ભારે વરસાદના પગલે ખેતરોમાં પાણીની આવક થઇ છે.

ભાવનગર: ઉપરવાસમાં વરસાદને લઇ શેત્રુંજી ડેમમાં પાણીની આવક

ભાવનગરના શેત્રુંજી ડેમમાં પાણીની આવક થઇ છે. ઉપરવાસમાં ભારે વરસાદના કારણે ડેમમાં પાણીની આવક થઇ છે. અમરેલી અને ગીરના વિસ્તારોમાં વરસાદ થતા ડેમની સપાટીમાં વધારો થયો છે. હાલ 13 હજાર ક્યૂસેક પાણીની આવક થઇ રહી છે. જેના કારણે ડેમની સપાટીમાં 1.5 ફૂટનો વધારો થયો છે.

ડાંગ જિલ્લાના ઉપરવાસમાં ભારે વરસાદ

ડાંગ જિલ્લાના ઉપરવાસમાં સતત ભારે વરસાદ નોંધાઈ રહ્યો છે. ભારે વરસાદ થતા ખાપરી નદીમાં ઘોડાપૂરની સ્થિતિ સર્જાઈ છે. નદીમાં પાણીના પ્રવાહને જોતા તંત્ર દ્વારા એલર્ટ જાહેર કરાયું છે. તંત્ર દ્વારા નીચાણવાળા વિસ્તારોને એલર્ટ કરવામાં આવ્યા છે. આહવા, વઘઈ, સુબીર સહિતના વિસ્તારોને એલર્ટ કરાયા છે.

ક્યાં પડી શકે છે વરસાદ?

હવામાન વિભાગની આગાહી અનુસાર, સૌરાષ્ટ્ર, કચ્છ અને દક્ષિણ ગુજરાતમાં ભારે પવન સાથે વરસાદ પડી શકે છે. જ્યારે અમદાવાદ, ગાંધીનગર, વડોદરામાં બે દિવસ સામાન્યથી મધ્યમ વરસાદ રહેશે અને દક્ષિણ ગુજરાત, સૌરાષ્ટ્ર અને કચ્છમાં 50થી 60 કિલોમીટરની ઝડપે પવન ફૂંકાશે.