એલર્ટ / રાજસ્થાનમાં વરસાદનો કહેર, સીકરમાં 11 ઇંચ વરસાદથી તબાહી

ભારે વરસાદના કારણે ઉત્તર પશ્ચિમ રેલવેની રેલ સેવાઓ પ્રભાવિત થઇ. સીકરના ડેપ્યુટી જિલ્લા કલેક્ટર જયપ્રકાશ નારાયણે જણાવ્યું કે સીકર અને આસપાસમાં ભારે વરસાદના કારણે બનેલી ઘટનાઓમાં પાંચ લોકો મૃત્યુ પામ્યા છે. કેટલાય રસ્તા ક્ષતિગ્રસ્ત થયા છે અને ઘણાં ગામડાંનો સંપર્ક મુખ્ય રસ્તા સાથે તૂટી ગયો છે.
 

મૃતકોનાં પરિવારજનોને ૪-૪ લાખ રૂપિયાનું વળતર આપવાની જાહેરાત કરાઇ છે. જિલ્લામાં પાંચ મકાન પચાસ ટકા સુધી ક્ષતિગ્રસ્ત થયાં છે, જ્યારે ૩૦ થી ૩૫ મકાન આંશિક ક્ષતિગ્રસ્ત થયા છે. રાજધાની જયપુરમાં પણ ગુરુવારની રાત્રે અને શુક્રવારની સવારે ધોધમાર વરસાદ થયો. ભારે વરસાદના કારણે શહેરના અનેક વિસ્તારના રસ્તા પર પાણી ભરાઇ ગયું અને ટ્રાફિક જામ થઇ ગયો. ઝરમર વરસાદનો ક્રમ સાંજ સુધી ચાલુ રહ્યો.
 

રાજસ્થાનમાં વરસાદનો કહેર જોવા મળી રહ્યો છે. સતત ચાર દિવસથી રાજસ્થાનના વિવિધ વિસ્તારમાં ધોધમાર વરસાદ પડી રહ્યો છે. રાજસ્થાનના ચૂરું, ટોંક, જયપુર, અજમેર, ભીલવાડા, ચિત્તૌડગઢમાં ભારે વરસાદના કારણે લોકોના ઘરમાં અને દૂકાનોમાં પાણી ભરાઇ ગયા છે.

ભારે વરસાદના પગલે રસ્તાઓ પણ પાણીમાં ગરકાવ થઇ ગયા છે. ત્યારે હજુ સાત જિલ્લામાં ભારે વરસાદનું એલર્ટ અપાયું છે. જેમાં બારાં, ઝાલાવાડ, અજમેર, ભીલવાડા, રાજસમંદ અને ચિત્તૌડગઢમાં ભારે વરસાદનું એલર્ટ અપાયું છે.

નેપાળ અને બાંગ્લાદેશમાં પૂરથી ૨૧૫નાં મોત નીપજ્યાં
નેપાળ અને બાંગ્લાદેશમાં ભીષણ પૂરે હાહાકાર મચાવી દીધો છે. પૂરના કારણે અહીં ૨૧૫ લોકો મોતને ભેટી ચૂક્યા છે. નેપાળમાં અત્યાર સુધી સતત વરસાદના કારણે આવેલા પૂર અને ભૂસ્ખલનની ઘટનાઓમાં ૧૧૧ લોકો મૃત્યુ પામ્યા છે, જ્યારે ૬૭ ઘાયલ થયા છે.

બાંગ્લાદેશના આકાશમાંથી વરસી રહેલી આફતે ૧૦૪ લોકોના જીવ લીધા છે. છેલ્લાં બે અઠવાડિયાંથી નેપાળમાં પડી રહેલા વરસાદે સમગ્ર દેશનું જનજીવન ઠપ કરી દીધું છે. પૂર અને ભૂસ્ખલનની ઘટનાઓમાં ૪૦ લોકો ગાયબ છે.

બાંગ્લાદેશમાં ભારે વરસાદના કારણે આવેલા પૂરથી મૃતકોની સંખ્યા ૧૦૦ને પાર પહોંચી ચૂકી છે. ૪૮ કલાકમાં લગભગ ૨૦ મોત થયાં હોવાની સાથે મૃતકોની સંખ્યા ૧૦૪ પર પહોંચી ગઇ છે. મોન્સૂન છેલ્લાં ઘણાં વર્ષમાં સૌથી ભયાનક બની ગયો છે.