સુરતમાં ધોધમાર વરસાદને પગલે ખાડીઓ થઇ ઓવરફ્લો, ખાડીના પાણી રસ્તાઓ પર ફરી વળતા રહીશો પરેશાન
સુરતમાં જળબંબાકારની સ્થતિ
ખાડીઓ થઇ ઓવરફ્લો
રોડ રસ્તા પર ઘૂંટણસમા પાણી
ગુજરાતમાં હવામાન વિભાગની આગાહી પ્રમાણે શ્રાવણમાં શ્રીકાર જેવો માહોલ સર્જાયો છે..તેમાં પણ સુરતમાં જળબંબાકારની સ્થિતિ સર્જાઇ છે. સુરત શહેર પાણી પાણી થયુ છે. એક બાજુ વરસાદ તો બીજી તરફ ખાડીના પાણી ફરી વળતા સ્થાનિકોએ હાલાકી વેઠવાનો વારો આવ્યો. વરસાદી માહોલ બાદ અનેક ઠેકાણે પાણી ભરાઇ જવા પામ્યા છે.
સણીયા ગામ હજી પાણીમાં
સુરતનું સણીયા ગામમાં હજી એની એજ સ્થિતિ જોવા મળી રહી છે. હજી પણ વિસ્તારમાં 4થી6 ફૂટ પાણી ભરાયેલા છે. ગામનું પાદર કહો કે પછી નદી, ભારે વરસાદને પગલે મંદિર, દુકાનો અને કેટલાક ઘરો પાણીમાં અડધે સુધી ડુબી ગયાં છે. આથી લોકોને સુરક્ષિત જગ્યા પર ખસેડવાની નોબત આવી હતી. હળપતિવાસમાં પાણી ભરાયા છે. સ્થાનિકોને આવન-જાવનમાં મુશ્કેલી પડી રહી છે.
ખાડીનું પાણી માર્ગો પર ફરી વળ્યું
સુરતમાં ખાડીના પાણી ફરી વળતા ભારે અવ્યવસ્થા સર્જાઈ છે. સુરત-કડોદરાને જોડતા માર્ગ ઉપર ખાડીના પાણી ફરી વળ્યા. પાણી ફરી વળતા બે કિલોમીટર લાંબો ટ્રાફિક જામ સર્જાયો હતો. સુરત મનપા કમિશનર બંછાનિધિ પાની સ્થિતિનો તાગ મેળવવા પહોંચ્યા હતા. તેઓએ વીટીવી ન્યૂઝ સાથે વાત કરતા જણાવ્યું હતું કે ગઇ કાલે 10 ઇંચ વરસાદ થતા પાણી ભરાયા છે. અત્યારે હાલમાં વિવિધ જગ્યાઓથી જે પાણીનું નિકાલ ખાડીમાં થતુ હતુ તે બંધ કરવામાં આવ્યું છે જેથી ખાડીનું જળસ્તર ઘટે.
કિમ-માંડવી સ્ટેટ હાઇવે પાણીમાં
સુરત જિલ્લાના માંગરોળ તાલુકાના પાલોડ, કિમ ચોકડી વિસ્તારમાં વરસાદી પાણી ભરાયા હતા. કિમ થી માંડવીને જોડતા સ્ટેટ હાઇવે પર વરસાદી પાણી ફરી વળ્યા હતા. તંત્ર દ્વારા યોગ્ય પાણી નિકાલની વ્યવસ્થા કરવામાં ન આવતા દર વર્ષે આવી જ પરિસ્થિતિનું નિર્માણ થાય છે. વરસાદી પાણી ભરાતા વાહનચાલકો ને ભારે હાલાકીનો સામનો કરવો પડી રહ્યો છે. તંત્ર દ્વારા પાણીના નિકાલની વ્યવસ્થા કરીને સારો રોડ બનાવવામાં આવે તેવી અનેકવાર માંગ કરવામાં આવી પરંતુ ઠેર ઠેર રોડ પર ખાડેખાડા જ જોવા મળી રહ્યો છે.
ઉમરપાડામાં નદી નાળા-છલકાયા
સુરતના ઉમરપાડા તાલુકામાં મુશળધાર વરસાદ વરસ્યો. ઉમરપાડામાં છેલ્લા 3 દિવસથી સતત વરસાદ વરસતા નદી નાળા છલકાયા. ઉમરપાડા તરફ જતા માર્ગો પરના નાળામાં પાણીની ભારે આવક થવા પામી. જે પાણી જાહેરમાર્ગ પર ફરી વળતા વાહન વ્યવહારને અસર થવા પામી હતી.
પરવત પાટિયા તરફ અવરજવર બંધ કરાઇ
સુરત-કડોદરા હાઇવે પાણીમાં ગરકાવ થયો. ભારે વરસાદને કારણે ખાડી વિસ્તાર જળબંબાકાર થયો. પરવત પાટીયા પાસે રસ્તા પર પાણી ભરાતા બે કિલોમીટર લાંબો ટ્રાફિકજામના દ્રશ્યો સર્જાયા હતા. કલાકો સુધી લોકો પાણીને કારણે રસ્તા પર અટવાયા હતા. જો કે સતત વરસાદ રહેતા પરવત પાટિયા તરફ અવરજવર બંધ કરાઇ. મોડલ ટાઉન પાર્ક પાણી-પાણી થયું. ઘૂંટણ સમા પાણી ભરાતા સ્થાનિકોએ હાલાકી વેઠવાનો વારો આવ્યો.
દુકાનોમાં ઘુસ્યા વરસાદી પાણી
તો આ તરફ સુરતના કીમ વિસ્તારમાં વરસાદી પાણી ફરી વળ્યા. કીમ વિસ્તારમાં 50થી વધુ દુકાનોમાં પાણી ઘુસી ગયા. તેમજ કીમ પૂર્વ વિસ્તારમાં વરસાદી પાણી ભરાયા હોવાનું સામે આવ્યું છે.સુરતમાં મોડી રાત્રે ધોધમાર વરસાદ થતા ઠેર ઠેર પાણી ભરાવાના દ્રશ્યો જોવા મળ્યા હતા. દુકાનોમાં પાણી ભરાતા કરોડોના માલ-સામાનને નુકસાન પહોંચ્યુ છે.