સુરતમાં મોડી રાતે થયેલા ભારે વરસાદથી અનેક વિસ્તારો પાણીમાં ગરકાવ થયા છે. સુરતના ઓલપાડ અને કોસંબામાં ભારે વરસાદ થતા ઠેર ઠેર પાણી ભરાવવાની સમસ્યા ઉભી થઈ છે. જ્યારે રાજ્યના અનેક જિલ્લાઓમાં ભારે વરસાદની આગાહી કરવામાં આવી છે.
ઠેર ઠેર પાણી ભરાતા લોકોને પણ હાલાકી ભોગવવાનો વારો આવ્યો છે. સુરતના ઓલપાડ અને કોસંબામાં માત્ર એક કલાકની વરસાદની હેલીમાં સમગ્ર વિસ્તાર પાણીથી તરબોળ થઈ ગયો. તો ભારે વરસાદ બાદ અનેક નીચાણવાળા વિસ્તારોમાં પણ પાણી ભરાયા છે. બીજી તરફ હવામાન વિભાગે પણ રાજ્યમાં 4 દિવસ સુધી ભારે વરસાદની આગાહી કરી છે.
જ્યારે હવામાન વિભાગ દ્વારા દક્ષિણ ગુજરાતમાં આજે ભારે વરસાદ થઈ શકે છે. જેમાં સુરત,નવસારી અને વલસાડમાં ભારે વરસાદ થઈ શકે છે. તો ઉત્તર ગુજરાત,મધ્ય ગુજરાત અને કચ્છમાં સામાન્ય વરસાદ રહેશે. જ્યારે સૌરાષ્ટ્રના દરિયાઈ જિલ્લાઓમાં પણ વરસાદની શક્યતા સેવાઈ રહી છે. જેને લઈને દ્વારકા, જૂનાગઢ અને પોરબંદરમાં વરસાદી માહોલ જોવા મળશે. આમ, રાજ્યભરમાં આગામી 4 દિવસ સુધી વરસાદી માહોલ યથાવત રહેવાની આગાહી કરવામાં આવી છે.