હવામાન / સમગ્ર દક્ષિણ ગુજરાતમાં મેઘરાજા મન મૂકીને વરસ્યા, જુઓ ક્યાં કેટલો વરસાદ

દક્ષિણ ગુજરાતમાં વહેલી સવારથી વરસાદ વરસી રહ્યો છે. દરમિયાન વાપીમાં 9 ઈંચ વરસાદ નોંધાયો છે. વલસાડ જિલ્લાના કપરાડામાં 7 ઈંચ વરસાદ નોંધાયો છે. જ્યારે ધરમપુરમાં 6.8 ઈંચ વરસાદ પડ્યો છે. વલસાડ જિલ્લામાં પારડીમાં 5.8 ઈંચ, વલસાડમાં 8.8 ઈંચ, ઉમરગામમાં 2.8 ઈંચ વરસાદ નોંધાયો છે. વલસાડમાં ભારે વરસાદના પગલે છીપવાડ વિસ્તારમાં ઘરો અને દુકાનોમાં પાણી ઘૂસી ગયા હતા. અને છીપવાડમાં આવેલા ધુલિયા હનુમાન મંદિરમાં પણ પાણી ઘૂસી જતા બંધ કરી દેવામાં આવ્યું હતું.

ધડોઈ ડેમ ઓવરફ્લો

દક્ષિણ ગુજરાતમાં ધોધમાર વરસાદના પગલે વલસાડ જિલ્લાનો ધડોઈ ડેમ ઓવરફ્લો થઈ ગયો છે. જ્યારે માંડવીનો ગોડધા ડેમ પણ ભારે વરસાદના પગલે ઓવરફ્લો થઈ ગયો છે. દક્ષિણ ગુજરાતમાં ભારે વરસાદથી ઓરંગા નદી પણ બે કાંઠે વહી રહી છે. માંગરોળનો સિયાલજ ગામનો લો લેવલ બ્રિજ પાણીમાં ગરકાવ થઈ ગયો છે. જેથી સિયાલજ અને કોસંબા વચ્ચેનો વાહન વ્યવહાર ખોરવાઈ ગયો છે.

ચાલુ વરસાદે કોઝ-વેનો ઉપયોગ ન કરવો

વાપીમાં ચાર કલાકમાં સાત ઇંચ વરસાદ પડતા NDRFની ટીમને સ્ટેન્ડ બાય રાખવામાં આવી છે. વલસાડ જિલ્લા કલેક્ટર સી.આર. ખરસાણે જણાવ્યું હતું કે, ચાલું વરસાદે કોઝ-વેનો ઉપયોગ ન કરવો, નદીના પટમાં અચાનક પાણી આવવાની શક્યતા હોવાના કારણે નદીમાં ન જવું જોઈએ. વલસાડીની ઓરંગા, પાર અને કોલટ નદીઓ સામાન્ય સ્થિતીમાં છે. અને બે કાંઠે વહી રહી છે.

વાહન વ્યવહાર ઠપ

ભારે વરસાદના કારણે નાળાઓ ઉખડી જતાં વરસાદી પાણીનો ભરાવો થયો હતો. વરસાદી પાણીના ભરાવાના કારણે વાહન વ્યવહાર ઠપ થઇ ગયો હતો. આ બ્રિજ ચોમાસા પહેલા બની જશે એવો દાવો થયો હતો, પરંતુ હજુ સુધી આ બ્રિજની કામગીરી પૂર્ણ થઇ નથી. સ્થાનિકોમાં જવાબદાર એજન્સી સામે આક્રોશ ભભુકી ઉઠયો હતો. પ્રથમ વરસાદમાં જ વરસાદી પાણીનો ભરાવો થતાં આ ચોમાસામાં સ્થાનિકોને હાલાકીનો સામનો કરવો પડશે.