રાજ્યમાં મેઘરાજાએ ધમાકેદાર બેટિંગ શરૂ કરી છે, રાજ્યમાં હાલ મોટાભાગના જિલ્લાઓમાં વરસાદી માહોલ જામ્યો છે. દક્ષિણ ગુજરાતના તમામ જિલ્લા અને તાલુકામાં વરસાદ વરસી રહ્યો છે. સુરતના માંડવી, જલાલપોર, વાપી, વઘઈ, તેમજ નવસારીમાં વરસાદ વરસી રહ્યો છે. તો રાજ્યમાં ભારે વરસાદની હવામાન વિભાગે આગાહી કરી છે.
- દક્ષિણ ગુજરાતમાં ભારે વરસાદ
સુરતમાં વહેલી સવારથી ધોધમાર વરસાદ:
સુરતમાં વહેલી સવારથી ધોધમાર વરસાદ વરસી રહ્યો છે. ભારે વરસાદના કારણે શહેરના અનેક વિસ્તારોમાં પાણી ભરાયા છે. શહેરનાં પુણાગામ, રાંદેર, કામરેજ, અડાજણ અને કતારગામ વિસ્તારોમાં પાણી ભરાતા વાહન ચાલકોને હાલાકી ભોગવવાનો વારો આવ્યો છે. ભારે વરસાદના કારણે સિવિલ હોસ્પિટલમાં પણ પણી ભરાયા છે. ટ્રોમા સેન્ટરમાં પાણી ભરાતા દર્દીઓને પરેશાની થઈ રહી છે. પાણીના નિકાલની કોઈ વ્યવસ્થા ન હોવાના કારણે દર્દીઓને પરેશાની ભોગવવી પડી રહી છે.
સુરતમાં રેલવે કોરીડોરના કારણે ખેતરોમાં પાણી:
સુરતમાં ભારે વરસાદને પગલે રેલવે કોરીડોરના કારણે ખેતરોમાં પાણી ભરાયા છે. રેલવે તંત્રની બેદરકારીના કારણે ખેડૂતોને હાલાકી ભોગવવાનો વારો આવ્યો છે. કોસંબામાં વરસાદી પાણી ખેતરોમાં ભરાતા ખેડૂતો ચિંતિત થયા છે. કોરિડોરની બાજુના ચાસ પુરી દેવાતા વરસાદી પાણી ખેતરોમાં ભરાયાં છે, જ્યારે પાણીનો નિકાસ નહી હોવાના કારણે ખેતરમાં પાણી ઘુસ્યા છે. છેલ્લા ઘણા સમયથી રેલવે કોરિડોરનું કામ ચાલી રહ્યો છે. રેલવે તંત્રએ કોઈ કામગીરી ન કરાતા ઉદ્દભવી પરિસ્થિતિ સર્જાઈ છે.. પાણીનો નિકાલ ન થતા ખેડૂતોને ભોગવવાનો વારો આવ્યો.
ભારે વરસાદના કારણે લસકાના-ખોલવડ વચ્ચે ખાડી ઓવર ફ્લો:
ભારે વરસાદના કારણે લસકાના અને ખોલવડ વચ્ચે ખાડી ઓવર ફ્લો થઇ છે. ખાડી ઓવરફ્લો થતા રસ્તો બંધ કરી દેવામાં આવ્યો છે. ત્યારે સ્થાનિકોએ જીવના જોખમે રસ્તો પસાર કરવો પડી રહ્યો છે. છેલ્લા એક વર્ષથી જિલ્લા પંચાયત દ્વારા પૂલ બનાવવાની કામગીરી ચાલી રહી છે, પરંતું હજુ પણ કામ પૂર્ણ ન થતા લોકોને હાલાકી વેઠવાનો વારો આવ્યો છે.
અંકલેશ્વરમાં ધોધમાર વરસાદ:
આ તરફ અંકલેશ્વરમાં ધોધમાર વરસાદ વરસ્યો છે. ભારે વરસાદ આવતા અનેક વિસ્તારોમાં પાણી ભરાયા છે. જિલ્લાના એશિયાદનગર,વૃદાવન નગર, એસડી નગર, પાસવના વિસ્તારમાં પાણી ભરાતા સ્થાનિકો પરેશાન થયા છે. રસ્તા પર પાણી ભરાતા વાહન ચાલકોને હાલાકી ભોગવવાનો વારો આવ્યો છે.
ભરૂચમાં ધોધમાર વરસાદ:
ભરૂચમાં ગુરૂવારે મોડી રાતે જિલ્લાના 9 તાલુકામાં ક્યાંક ધોધમાર તો ક્યાંક ઝરમર વરસાદી માહોલ જામ્યો છે. વરસાદ આવતા જિલ્લાના અનેક વિસ્તારોમાં પાણી ભરાયા છે. ધોધમાર વરસાદ આવતા સરકારી કચેરીઓમાં પણ પાણી ભરાયા છે. કચેરીમાં પાણીના નિકળવાની વ્યવસ્થા ન હોવાના કારણે પાણી ભરાયા હતા. મામલતદાર-કલેક્ટર કચેરીના પટાંગણમાં પાણી ભરાતા લોકોને હાલાકી ભોગવવાનો વારો આવ્યો છે.
ભરૂચ, વાગરા, જંબુસર, આમોદ, હાંસોટ, અંકલેશ્વર, ઝઘડિયા, નેત્રંગ, વાલિયા તાલુકામાં વરસાદ પડ્યો છે. જેને લઇ કેટલાક સ્થળે વીજ પુરવઠો પણ ખોરવાયો છે. નિચાણવાળા વિસ્તારોમાં પાણી ભરાઇ ગયા છે.
નવસારીમાં પણ ધોધમાર વરસાદ:
તો આ તરફ નવસારીમાં પણ ધોધમાર વરસાદ વરસ્યો છે. નવસારી જિલ્લામાં સરેરાશ 1 ઈંચ વરસાદ વરસ્યો છે. નવસારીમાં આવેલી પૂર્ણા નદી અને અંબિકા નદીની જળસપાટીમાં વધારો થયો છે. પૂર્ણ નદીની જળસપાટીમાં 10 ફૂટનો વધારો થયો છે. જ્યારે અંબિકા નદીની જળસપાટીમાં 6 ફૂટનો વધારો થયો છે. નવસારીના ગણદેવીમાં સવા બે ઈંચ, ચીખલીમાં દોઢ ઈંચ, જલાલપોરમાં સવા ઈંચ, ખેરગામમાં અડધો ઈંચ વરસાદ વરસ્યો છે.
આ ઉપરાંત દક્ષિણ ગુજરાતમાં લગભગ તમામ વિસ્તારમાં મેઘો મંડાયો છે. દક્ષિણ ગુજરાત ઉપરાંત સૌરાષ્ટ્રમાં પણ સાંબેલા ધારે વરસાગ વરસી રહ્યો છે. દક્ષિણ ગુજરાત અને સૌરાષ્ટ્રમાં હજુ અતિભારે વરસાદની હવામાન વિભાગ દ્વારા અગાહી કરવામાં આવી છે.
વલસાડ જિલ્લામાં મેઘરાજાનું આગમન:
તો આ તરફ વલસાડ જિલ્લામાં પણ વિધિવત ચોમાસું બેસ્યુ છે.. જિલ્લાના તમામ તાલુકાઓમાં મેઘરાજાનું આગમન થયુ છે... સમગ્ર વલસાડ જિલ્લામાં વરસાદ આવતા ખેડૂતોમાં ખુશીનો માહોલ જોવા મળ્યો છે.. વલસાડના કપરાડામાં અઢી ઈંચ, ધરમપુરમાં દોઢ ઈંચ, પારડીમાં એક ઈંચ, વલસાડમાં એક ઈંચ. વાપીમાં 2 ઈંચ વરસાદ નોંધાયો છે..
દક્ષિણ ગુજરાત અને સૌરાષ્ટ્રમાં ભારે વરસાદની આગાહી:
ગુજરાતમાં ભારે વરસાદની આગાહીને પગલે NDRFની ટીમ સ્ટેન્ડ બાય રાખવામાં આવી છે. દક્ષિણ ગુજરાત અને સૌરાષ્ટ્રમાં ભારે વરસાદની આગાહી કરવામાં આવી છે. ત્યારે રાજ્યમાં NDRFની 15 ટીમને સ્ટેન્ડ બાય રાખવામાં આવી છે. જેમાં સુરત, ભાવનગર અને વલસાડમાં NDRFની 1-1 ટીમ સ્ટેન્ડ બાય રાખવામાં આવી છે. જ્યારે રાજકોટ અને ગાંધીનગરમાં 2-2- ટીમ સ્ટેન્ડ બાય રખાઈ છે. તો વડોદરા હેડક્વાર્ટરમાં 7 ટીમ સ્ટેન્ડ બાય રાખવામાં આવી છે.