ચોમાસુ / રાજકોટ સહિત સૌરાષ્ટ્રના અનેક વિસ્તારોમાં મોડી રાતે ધોધમાર વરસાદ 

સૌરાષ્ટ્રમાં પણ ધીમે ધીમે ચોમાસું જામતું જઈ રહ્યું છે. ત્યારે રાજકોટ જિલ્લામાં છેલ્લા 24 કલાકમાં અનરાધાર વરસાદ વરસ્યો. જેમાં સૌથી વધુ ગોંડલ તાલુકામાં 5.5 ઈંચ વરસાદ વરસ્યો છે. તો ધોરાજીમાં 4 ઈંચ, લોધિકામાં સાડા ત્રણ ઈંચ, ઉફલેટામાં 3 ઈંચ, કોટડામાં બે ઈંચ વરસાદ વરસ્યો. તો પડધરી,રાજકોટ તાલુકામાં અને જામ કંડોરણામાં પોણા બે ઈંચ વરસાદ વરસ્યો છે.

બીજી તરફ વિંછીયા અને જસદણમાં દોઢ ઈંચ જ્યારે જેતપુરમાં એક ઈંચ વરસાદ વરસ્યો છે. જેના કારણે ખેડૂતોમાં ખુશીનો માહોલ છવાઈ ગયો છે. મોડી રાતે ધોધમાર વરસાદ વરસતા ખેતરોમાં પણ પાણી ભરાયા હતા. નાના સખપુર ગામમાં વાદળ ફાટતા ઠેર ઠેર પાણી ભરાવવાની સમસ્યા પણ સામે આવી. તો ભારે વરસાદ બાદ ખેતરમાં વરસાદી પાણી ફર્યા છે. વરસાદી પાણી ફરી વળતા અનેક ખેતરોમાં ધોવાણ સામે આવ્યું છે. પણ ભારે વરસાદ બાદ ખેડૂતોમાં પણ ખુશી અને ઉત્સાહ જોવા મળી રહ્યો છે.

સૌરાષ્ટ્રમાં પડેલા વરસાદમાં અમરેલી જિલ્લાનાં બાબરામાં 2 ઇંચ, બગસરામાં દોઢ, અમરેલીમાં પોણો ઇંચ અને લાઠીમાં અડધો ઇંચ વરસાદ થયો હતો.સાવરકુંડલામાં ગાજવીજ અને ભારે પવન સાથે બે કલાકના સમયમાં દોઢથી બે ઇંચ સુધી વરસાદ વરસી ગયો હતો. સાવરકુંડલાની નાવલી નદીમાં વરસાદી નીરની આવક થઇ હતી. નજીકના નેસડી, સમઢીયાળા, દિતલા, વંડા સહિતના ગામોમાં વરસાદ વરસ્યો હતો. રાજકોટ જિલ્લાના જસદણ અને ગોંડલમાં ધીમી ધારે વરસાદ પડ્યો હતો.

હવામાન વિભાગની આગાહી મુજબ, દક્ષિણ ગુજરાતમાં ભારે વરસાદનું અનુમાન છે. દક્ષિણ સૌરાષ્ટ્ર અને મધ્ય ગુજરાતમાં પણ પ્રિમોન્સૂનની એક્ટિવિટી જોવા મળશે. તો મધ્ય ગુજરાતમાં સામાન્ય વરસાદ પડે તેવું અનુમાન છે. 

જ્યારે ઉત્તર ગુજરાતમાં 29 જૂનથી 2 જુલાઈ સુધી ભારે વરસાદની આગાહી છે. જો અમદાવાદની વાત કરવામાં આવે તો અમદાવાદમાં 2 દિવસ સુધી સામાન્ય વરસાદની આગાહી છે. ઉલ્લેખનીય છે કે, આ વર્ષે કાળઝાળ ગરમીથી લોકો ત્રસ્ત બન્યા છે અને વરસાદ પડે તેવી આશા સેવી રહ્યા છે.