દક્ષિણ ગુજરાતમાં ત્રણ દિવસથી સતત વરસાદ વરસી રહ્યો છે. ત્યારે સૌરાષ્ટ્રમાં પણ મંગળવારે વરસાદ વરસ્યો હતો. જેમાં ભાવનગર, બોટાદ, રાજકોટ, રાજુલા, મોરબીમાં ધોધમાર વરસાદ થયો હતો.
ભાવનગરના અનેક વિસ્તારોમાં ધોધમાર વરસાદ
ભાવનગરના અનેક વિસ્તારોમાં ધોધમાર વરસાદ થયો. ઉમરાળા, રંઘોળા, ધોળા સહિતના વિસ્તારો ભારે વરસાદ થયો. વાવણીલાયક વરસાદને પગલે ખેડૂતોમાં ખુશી જોવા મળી છે.
બોટાદ શહેર અને જિલ્લાના અનેક વિસ્તારોમાં વરસાદ
બોટાદ શહેર અને જિલ્લાના અનેક વિસ્તારોમાં વરસાદ થયો. ભારે પવન અને ગાજવીજ સાથે ધોધમાર વરસાદ થયો. બરવાળા અને રાણપુર સહિતના વિસ્તારમાં વરસાદ થયો. રાણપુરમાં ભારે પવનના કારણે વૃક્ષ ધરાશયી થયા હતા.
રાજકોટના સરધાર અને પડધરીના વિસ્તારોમાં સાંબેલાધાર વરસાદ
રાજકોટમાં સરધારમાં સતત બીજા દિવસે સાંબેલાધાર વરસાદ થયો. ભારે પવન સાથે વરસાદને પગલે ખેડૂતોમાં ખુશી જોવા મળી છે. સરધારની બજારમાં ધીંચણ સુધી પાણી ભરાયા છે. પડધરી તાલુકાના ગ્રામ્ય વિસ્તારોમાં ધોધમાર વરસાદ થયો. 2.5થી 3 ઇંચ વરસાદ થતા અનેક નદીઓમાં નવાનીર આવ્યા. ખંઢેરી, નારણકા, બાધી, ડુંગરકા, રંગપર સહિતના ગામોમાં વરસાદ થયો. નદીમાં પાણી આવતા ખેડુતોમાં આનંદ છવાયો છે.
રાજુલાના અનેક વિસ્તારમાં ધોધમાર વરસાદ
અમરેલીના રાજુલાના બાબારીયાધાર ગામમાં ધોધમાર વરસાદ થયો. ખેરાળી, મેરિયાણા, ઉટીયા સહિતના ગામોમાં વરસાદ થયો છે. ગ્રામીણ વિસ્તારના માર્ગો પર પાણી ફરી વળીયા છે. જોલાપુરી નદીમાં નવા નીરની આવક થતા કોઝ-વે પાણીમાં જતો રહ્યો છે. જ્યારે પીપાવાવ પોર્ટમાં વરસાદ વરસ્યો હતો. ઉપરાંત સાજણવાવ, ડુંગર, રાભડા અને જિંજકા ગામમાં ધોધમાર વરસાદ થયો હતો. ભારે વરસાદના કારણે રસ્તા પર પાણી ભરાઇ ગયા. જ્યારે બીજી બાજુ સારા વરસાદથી ખેડૂતોમાં ખુશી જોવા મળી છે.
વાંકાનેરમાં ધોધમાર વરસાદ
મોરબીના વાંકાનેરમાં ભારે ઉકળાટ બાદ વાંકાનેરમાં ધોધમાર વરસાદ થયો. આ વરસાદથી ખેડૂતો અને શહેરીજનોમાં આનંદની લાગણી છવાઇ છે. રેલવે બ્રિજ નીચે પાણી ભરાતા ટ્રાફિક જામ થયું હતું.