નદીઓમાં ઘોડાપૂર સર્જાતા નીચાણવાળા વિસ્તારોને એલર્ટ કરી દેવાયા
આજે છેલ્લા બે કલાકમાં ગુજરાતના 135 તાલુકામાં મેઘરાજાએ ધમાકેદાર બેટિંગ કરી છે. રાજ્યમાં સવારના 6થી 8 વાગ્યામાં 135 તાલુકામાં મેઘમહેર જોવા મળી રહી છે. જેમાં બનાસકાંઠા, સાબરકાંઠા અને અરવલ્લીમાં તો મેઘરાજાએ રમઝટ બોલાવી છે.
રાજ્યમાં સૌથી વધુ દાંતીવાડામાં 2.5 ઈંચ વરસાદ ખાબક્યો
રાજ્યમાં સૌથી વધુ દાંતીવાડામાં 2.5 ઈંચ વરસાદ ખાબક્યો છે. તો વડગામમાં 2 ઈંચ વરસાદ, ઈડર, ધાનેરા, સોનગઢ, વ્યારા અને ભિલોડામાં 1.5 ઈંચ વરસાદ ખાબક્યો. તો ડાંગ, હિંમતનગર અને કપરાડામાં 1 ઈંચ વરસાદ વરસ્યો છે. જ્યારે કામરેજ, સિદ્ધપુર, પાલનપુર, અમીરગઢ અને ઝાલોદમાં પોણો ઈંચ વરસાદ વરસ્યો.
સાબરકાંઠામાં મેઘરાજાએ ધડબડાટી બોલાવી
સાબરકાંઠામાં ઉપરવાસમાં ભારે વરસાદને પગલે નદીઓમાં ઘોડાપૂરની સ્થિતિ સર્જાઇ છે. હિંમતનગરના કૂંપ, હમીરગઢ અને સુરપુર સહિતના ગામો સંપર્ક વિહોણા બન્યા છે. કૂંપ ગામે કોઝવે પર પાણી ફરી વળતા રસ્તો બંધ થઇ ગયો છે. જ્યારે અમીરગઢ ગામે અંડરબ્રિજમાં પાણી ભરાઇ ગયા છે. આજુબાજુના ગામો સંપર્ક વિહોણા થતા લોકોને ભારે મુશ્કેલી પડી રહી છે.
બાઈક ચાલકનો માંડ-માંડ જીવ બચ્યો
સાબરકાંઠામાં ભારે વરસાદના પગલે હિંમતનગરથી ભોલેશ્વરને જોડતા કોઝવે ઉપર પાણી ફરી વળ્યા છે. બાઈક ચાલકનો માંડ-માંડ જીવ બચ્યો હતો. જીવના જોખમે કોઝવે પસાર કરતા ભોલેશ્વરથી હિંમતનગર આવતા બાઈક પણ પાણીના પ્રવાહમાં ખેંચાયા.
હાથમતી નદીમાં અચાનક પાણી આવી જતા 25 પશુઓ ફસાયા હતા
સાબરકાંઠાના હિંમતનગરના ગ્રામ્ય વિસ્તારોમાં ભારે વરસાદ વરસી રહ્યો છે. ભારે વરસાદના કારણે હાથમતી નદીમાં ઘોડાપૂર આવ્યું છે. નદીમાં અચાનક પાણી આવી જતા 25 જેટલાં પશુઓ નદીમાં ફસાયા હતા. જેથી પશુઓને તાત્કાલિક સ્થાનિક લોકો દ્વારા બહાર કાઢવાની કામગીરી હાથ ધરાઇ હતી. જેમાંથી હજુ પણ પાંચ પશુઓ પાણીમાં ફસાયેલા હોવાથી સ્થાનિકોએ બચાવ કામગીરી હાથ ધરી હતી.
એ સિવાય સાબરકાંઠામાં ઉપરવાસમાં ભારે વરસાદના કારણે નાના-મોટા જળાશયોમાં પાણીની આવક જોવા મળી છે. ભારે વરસાદના કારણે નીચાણવાળા વિસ્તારોમાં પાણી ભરાઇ જતા નીચાણવાળા વિસ્તારોમાં ન જવા તંત્ર દ્વારા સૂચના અપાઇ છે.
વડીયાવિર અને કડીયાદરા વચ્ચેનો સંપર્ક તૂટ્યો
સાબરકાંઠામાં સવારના 4 વાગ્યાથી ધોધમાર વરસાદના કારણે મોટા ભાગની નદીઓમાં ઘોડાપૂરની સ્થિતિ જોવા મળી રહી છે. વડીયાવિર અને કડીયાદરા વચ્ચેનો સંપર્ક પણ તૂટ્યો છે. નદીઓના પાણી રોડ પરથી વહેતા થઇ ગયા છે.
હરણાવ ડેમમાં નવા નીરની આવક
ઉપરવાસમાં ભારે વરસાદના પગલે હરણાવ ડેમમાં નવા નીરની આવક આવી છે. ડેમમાં 3 હજાર ક્યુસેક પાણીની આવક જોવા મળી છે. હાલ ડેમ 95 ટકાથી વધુ ભરાઇ ગયો છે. એક-એક ફૂટ લેવલે ત્રણ ગેટો ખોલી નાખવામાં આવ્યા છે.
ભારે વરસાદના લીધે કરોલ નદીમાં પણ ઘોડાપૂર
સાબરકાંઠામાં ભારે વરસાદના લીધે કરોલ નદીમાં પણ ઘોડાપૂર સર્જાયું છે. જેથી નીચાણવાળા વિસ્તારોને સચેત કરી દેવાયા છે. નોંધનીય છે કે, સાબરકાંઠાના ઉપરવાસમાં સારો એવો વરસાદ વરસી રહ્યો છે.
ઇડરના દેત્રોલી ખાતે ગુહાઈ નદીમાં ત્રણ નદીનો સંગમ
બીજી બાજુ સાબરકાંઠાના ઉપરવાસમાં ભારે વરસાદથી ઇડરના દેત્રોલી ખાતે ગુહાઈ નદીમાં ત્રણ નદીનો સંગમ જોવા મળ્યો છે. ત્રણેય નદીઓમાં વરસાદી પાણીની આવક જોવા મળી છે. ભેશ્કા, કરોલ અને ગુહાઇ નદીનો સંગમ એકસાથે જોવા મળ્યો છે. જો કે, ભારે વરસાદથી ખેડૂત આલમમાં ખુશીનો માહોલ જોવા મળી રહ્યો છે.