દક્ષિણ ગુજરાતમાં ગઇકાલે ભારે વરસાદ બાદ આજે મધ્ય અને ઉત્તર ગુજરાતમાં પણ મેઘરાજાએ ફરીથી એન્ટ્રી કરી છે. મોડી રાતથી અમદાવાદમાં વરસાદી ઝાપટા સાથે સાબરકાંઠા, અરવલ્લી અને પંચમહાલમાં ભારે વરસાદ વરસ્યો છે.
ગુજરાતના 70 તાલુકામાં વરસાદ વરસ્યો છે. જેમાં સૌથી વધુ પંચમહાલના હાલોલ તાલુકામાં 3 ઇંચ વરસાદ પડ્યો છે. જ્યારે બોડેલમાં 2.5 ઇંચ અને જાંબુઘોડામાં 2 ઇંચ વરસાદ વરસ્યો છે. તો ક્વાંટ, ઘોઘંબામાં પણ 2 ઇંચ વરસાદ પડ્યો છે જ્યારે સોનગઢમાં પોણા 2 ઇંચ વરસાદ છે. જ્યારે લીમખેડા, વાલોદ, માલપુર અને વાઘોડિયામાં એક ઇંચ વરસાદ પડ્યો છે.
યાત્રાધામ પાવાગઢ ડુંગર પર ભારે વરસાદ આવતા શ્રદ્ધાળુઓ અટવાયા હતા. ભારે વરસાદને પગલે ડુંગરથી નીચે તરફ પગથિયાં પર નદીઓ વહી હતી. વરસાદના પગલે સાત કમાન પાસે નવો બનાવેલ રોડ તૂટ્યો છે. જેના કારણે વાહન ચાલકોને પણ પરેશાનીનો સામનો કરવો પડ્યો. સુરક્ષાને ધ્યાના રાખીને વરસાદના સમયે રોપ-વે બંધ કરવાની ફરજ પડી છે.
તો આ તરફ સાબરકાંઠાના હિંમતનગરમાં પણ વરસાદનું આગમન થયુ છે. હિંમતનગર, ગાંભોઈ, ચાદરણી, નિકોળામાં ધોધમાર વરસાદ વરસી રહ્યો છે. ભારે વરસાદ પડતા ખેડૂતોમાં ખુશીનો માહોલ જોવા મળ્યો છે. જ્યારે યાત્રાધામ શામળાજીમાં ધોધમાર વરસાદ પડી રહ્યો છે. ત્યારે વરસાદના પગલે મંદિર જવાના રસ્તા પર પાણી ભરાઇ ગયા છે.
જ્યારે તાપી જિલ્લામાં લાંબા વિરામ બાદ ફરી મેઘરાજાનું આગમન થયુ છે. જિલ્લાના વડા મથક વ્યારામાં વરસાદ શરૂ થયો છે. વરસાદને પગલે ધરતીપુત્રોમાં આનંદની લાગણી જોવા મળી છે.