બંગાળની ખાડી અને તેને અડીને આવેલા ઓડિશા, ઝારખંડ પર લૉ પ્રેશર સિસ્ટમ સક્રિય થઈ છે. તે મધ્ય પ્રદેશ અને રાજસ્થાન થઈ ગુજરાત તરફ આગળ વધી રહી છે. પરિણામે રવિવારે મોડી રાત પછી ઉત્તર ગુજરાતમાં ભારે વરસાદ ખાબક્યો હતો. ભારે વરસાદના કારણે વાવના માડકા ગામનું તળાવ ફાટ્યું હતુ. તો આજે મોડી રાતથી અંબાજીમાં 7 ઇંચ કરતા વધુ વરસાદ પડ્યો છે.
અંબાજીમાં 7 ઇંચ કરતા વધુ વરસાદ પડતાં આસપાસના ખેતરોમાં પાણી ભરાઇ ગયા છે. તો નીચાણવાળા વિસ્તારમાં પણ પાણી ભરાયા છે. ભારે વરસાદના કારણે લોકોના ઘરમાં તેમજ દૂકાનોમાં પાણી ઘૂસી ગયા છે. જ્યારે રવિવારે સાંજે 6 થી સોમવારે સાંજે 6 વાગ્યા સુધીમાં સૌથી વધુ વાવમાં 9.68 ઇંચ, થરાદમાં 7 ઇંચ અને દિયોદરમાં 4.44 ઇંચ સાથે સાંબેલાધાર વરસાદ વરસ્યો હતો.
તો હિંમતનગરમાં 2.50 ઇંચ, રાધનપુર અને સુઇગામમાં 2.28 ઇંચ, ભાભર, કાંકરેજ, લાખણીમાં 2 ઇંચ, પોશીનામાં 1.44 ઇંચ, મેઘરજ, સમી, શંખેશ્વર, સતલાસણા, વિજાપુર અને ઇડરમાં 1 ઇંચ વરસાદ ખાબક્યો હતો. આ સાથે મોટાભાગના તાલુકાઓમાં દિવસભર હળવા ઝાપટાંથી એક ઇંચથી ઓછો વરસાદ વરસ્યો હતો. હવામાન વિભાગના જણાવ્યા અનુસાર, આગામી 24 કલાકમાં હળવાથી મધ્યમ સ્થિતિનો વરસાદ વરસી શકે છે.