રાજ્યમાં છેલ્લાં પંદર દિવસથી મેઘાએ મહેર ચાલુ રાખી છે. કયાંક ધીમી ધારે તો કયાંક તોફાની રીતે મેઘો વરસી રહ્યો છે. જેના કારણે રાજ્યના અનેક ડેમ છલકાઈ ગયા છે. તો ઉત્તર ગુજરાતમાં પણ વરસાદે હાહાકાર મચાવ્યો છે. મહેસાણા અને આસપાસના વિસ્તારોમાં લીલો દુકાળની સ્થિતિ છે તો ખેતરો પણ ધોવાઇ જતાં જગતના તાતે રડવાનો વારો આવ્યો છે. જો કે, આજરોજ રાજ્યના નાયબ મુખ્યમંત્રી નીતિન પટેલે મહેસાણાની મુલાકાત લીધી હતી.
ઉત્તર ગુજરાતમાં પણ મન મુકીને વરસ્યા મેઘરાજા
કડીના 500 વીઘાના ખેતરમાં ફરી વળ્યા પાણી
મહેસાણામાં ભારે વરસાદના કારણે અનેક વિસ્તારોમાં પાણી ભરાઇ ગયા છે. મહેસાણાના ધોબીઘાટ વિસ્તારમાં 125 લોકોનું સ્થળાંતર પણ કરાયું હતું. ત્યારે નાયબ મુખ્યમંત્રી નીતિન પટેલે મહેસાણાના અસરગ્રસ્ત વિસ્તારની મુલાકાત લીધી. નીતિન પટેલે કહ્યું કે હાલ વરસાદથી થોડું નુકસાન થયું છે પરંતુ વરસાદથી આગામી એક વર્ષ સુધરી ગયું છે. ઉત્તર ગુજરાતમાં પાણીની નોંધપાત્ર આવક થઇ છે.
કડીના ખાવડ ગામમાં 500 વીઘા ખેતરમાં પાણી ફરી વળ્યા
મહેસાણાના કડી તાલુકાના ખાવડ ગામમાં વીટીવીની ટીમ પહોંચી છે. કડીમાં ભારે વરસાદના કારણે સ્થિતિ ખરાબ થઇ ગઇ છે. ભારે વરસાદના કારણે કડીના ખાવડ ગામમાં 500 વીઘા ખેતરમાં પાણી ફરી વળ્યા છે. જેના કારણે ખેડૂતોના પાકને ભારે નુકસાન થયું છે. કપાસ, જુવાર એરંડા, કઠોળ, બીટી કપાસને નુકસાન થયું છે. ગામમાંથી હજુ પણ પાણી નથી ઓસર્યા. ત્યારે ખેડૂતોની માગ છે કે સરકાર સહાય કરે.
કડી-થોળ અંડરબ્રિજ પણ પાણી ભરાયા
મહેસાણાના કડીમાં ભારે વરસાદથી અનેક જગ્યાએ પાણી ભરાઇ ગયા છે. ત્યારે કડી-થોળ અંડરબ્રિજ પણ પાણી ભરાઇ જતા બંધ કરી દેવાયો છે. ધોધમાર વરસાદના કારણે અંડરબ્રિજમાં પાણી ભરાઇ ગયા છે.
પાટણના સરસ્વતી ડેમમાં આવ્યું પાણી
પાટણ જિલ્લામાં ભારે વરસાદના કારણે પાટણના સરસ્વતી ડેમમાં પાણીની આવક થઇ છે. મોયાણી અને ઉમરદશી સહિત સુજલામ સુફલામની કમલીવાડા કેનાલનું 600 ક્યૂસેક પાણી ડેમમાં ઠાલવવામાં આવ્યું છે. હાલ સરસ્વતી ડેમ ઓવરફ્લો થવામાં બે ફૂટ બાકી છે. આગામી 24 કલાકમાં ડેમ ઓવરફ્લો થવાની શક્યતા છે. ડેમમાં પાણી આવતા લોકોમાં આનંદનો માહોલ જોવા મળ્યો છે.
રાજ્યમાં ભારે વરસાદની આગાહી
રાજ્યમાં ભારે વરસાદની આગાહી કરવામાં આવી છે. સૌરાષ્ટ્ર અને દક્ષિણ ગુજરાતમાં ભારે વરસાદની આગાહી કરવામાં આવી છે. અમદાવાદમાં પણ 24 કલાક દરમિયાન સારા વરસાદની પણ શક્યતા છે. બંગાળની ખાડીમાં વધુ એક લો પ્રેશર સક્રિય થયું છે.