ગુજરાતમાં મેઘ મહેર થવાથી ખેડૂતોમાં ખુશીનો માહોલ છે. રાજ્યમાં ચોમાસુ જામ્યુ છે. રાજ્યમાં ઠેર ઠેર વરસાદ વરસી રહ્યો છે. ચોમાસુ જામ્યા બાદ અત્યારસુધીમાં 22.72 ટકા વરસાદ નોંધાયો છે. કુલ 102 તાલુકામાં 4 ઈંચથી 7 ઈંચ સુધીનો વરસાદ નોંધાયો છે.
જ્યારે 68 તાલુકાઓમાં 2થી 3.5 ઈંચ જેટલો વરસાદ નોંધાયો છે. વલસાડમાં પણ મેઘરાજાએ મહેર કરી છે. વાપીમાં પણ વરસાદ મન મૂકીને વરસ્યો છે. ત્યારે વરસાદ બાદ લોકોએ પણ રાહત અનુભવી છે અને ગરમીથી આંશિક મેળવી છે. જોકે, હજુ પણ રાજ્યમાં અનેક વિસ્તારો વરસાદની આશ લગાવીને બેઠા છે.
હવામાન વિભાગની ભારે વરસાદની આગાહી
ગુજરાત સહિત દેશના અનેક રાજ્યોમાં હવામાન વિભાગ દ્વારા આગામી 48 કલાકમાં ભારે વરસાદની આગાહી આપવામાં આવી છે. જેને લઇને દક્ષિણ ગુજરાતમાં ભારે વરસાદની આગાહી કરવામાં આવી છે. જ્યારે સૌરાષ્ટ્ર અને મધ્ય ગુજરાતમાં સામાન્ય વરસાદનું અનુમાન છે. જ્યારે અમદાવાદમાં છૂટો છવાયો વરસાદ પડવાની શક્યતા છે. નવસારી, વલસાડ સહિતના જિલ્લામાં ભારે વરસાદ પડી શકે છે.
ભાવનગરમાં સારા વરસાદના કારણે ખેડૂતોએ કરી વાવણી
ભાવનગરમાં અત્યાર સુધી સીઝનમાં 28 ઈંચ વરસાદ નોંધાયો છે. સારા વરસાદના કારણે જીલ્લામાં ખેડૂતોએ વાવણી કરી છે. ભાવનગર જીલ્લામાં અત્યાર સુધી સીઝનનો 40 ટકા વરસાદ નોધાયો છે. સારા વરસાદના કારણે ખેડૂતોમાં ખુશીનો માહોલ જોવા મળ્યો છે. જીલ્લામાં અંદાજે 6.50 લાખ હેક્ટર જમીનમાં વિવિધ પ્રકારના પાકોનું વાવેતર થાય છે.
જેમાં સૌથી વધુ વાવેતર 4 લાખ હેક્ટરમાં કપાસનું વાવેતર થાય છે અને બાજરી, મગફળી, ઘઉં અને ડુંગળીનું વાવેતર કરવામાં આવે છે. ત્યારે હવે સારો વરસાદ આવે તો ખેડૂતોને ફાયદો થઈ શકે છે. હાલમાં ભાવનગરના ખેડૂતો સારા વરસાદની આશા રાખીને ખેતી કરી રહ્યા છે.