રાજ્યમાં બારે મેઘ ખાંગા થયા છે. છેલ્લા 24 કલાકમાં રાજ્યના 184 તાલુકામાં વરસાદ વરસ્યો છે. જેમાં સૌથી વધુ જામનગરમાં સવા 8 ઈંચ વરસાદ નોંધાયો છે. ત્યારે રાજ્યનામાં હજુ એક અઠવાડિયા સુધી ભારે વરસાદની આગાહી હવામાન વિભાગે કરી છે.
ક્યાં કેટલો વરસાદ:
જામનગરના જોડિયામાં 5 ઈંચ, ખંભાળિયામાં 4 ઈંચ અને ધ્રોલમાં 4 ઈંચ વરસાદ નોંધાયો છે .તો આ તરફ કપરાડામાં 5 ઈંચ, માંગરોળ, કામરેજ, વાપી અને માંડવીમાં 3.5 ઈંચ વરસાદ નોંધાયો છે. તો બીજી તરફ ઓલપાડ, સુરત શહેર, ઉમરપાડા, વઘઈ, હાંસોટ અને માંડવીમાં 3-3 ઈંચ વરસાદ નોંધાયો છે. તો બીજી તરફ મુંદ્રા અને ચોર્યાસીમાં 2.5 ઈંચ વરસાદ. જ્યારે ઉમરગામ, માંગરોળ, વાંસદા, વ્યારા, સુબિર અને સોનગઢમાં સવા બે ઈંચ વરસાદ નોંધાયો છે. તો વલસાડ, ઉચ્છલ, ધરમપુર, ડોલવણ, પારડી અને પલસાણામાં 2-2 ઈંચ વરસાદ નોંધાયો છે.
અમદાવાદમાં ગઈકાલથી ધીમીધારે વરસાદ:
આ તરફ અમદાવાદમાં પણ ગઈકાલથી જ ધીમીધારે વરસાદ વરસી રહ્યો છે. તો રાત્રી દરમિયાન પણ મોટાભાગના વિસ્તારોમાં વરસાદ વરસ્યો હતો. અમદાવાદ શહેરના થલતેજ, સેટેલાઈટ, વસ્ત્રાપુર, સોલા, ચાંદલોડિયા અને ઘાટલોડિયામાં વરસાદ વરસ્યો હતો. તો બીજી તરફ ગોતા, ઓગણજ, શીલજ, સરખેજ, જુહાપુરા, જીવરાજ, નવરંગપુરા, નારણપુરા, અખબારનગર, દાણીલીમડા, ખોખરા હાટકેશ્વર, મણીનગર, નારોલ, ઈસનપુર, ઘોડાસર, નરોડા, નિકોલ અને બાપુનગર સહિતના વિસ્તારોમાં વરસાદ જોવા મળી રહ્યો છે. તો શહેરમાં કેટલાક સ્થળોએ વૃક્ષો પણ ધરાશાયી થઈ ગયા હતા.
કચ્છમાં બારે મેઘ ખાંગા:
વરસાદ માટે તરસતા કચ્છ જિલ્લામાં પણ બારે મેઘ ખાંગા થયા છે. કચ્છના 10 તાલુકામાં વરસાદ નોંધાયો છે. જેમાં સૌથી વધુ વરસાદ અબડાસા તાલુકામાં થયો છે. તેમજ કચ્છના મોટાભાગના ડેમ અને તળાવોમાં પણ નવા નીર આવ્યા છે. તો બીજી તરફ ભુજ, માંડવી અને મુંદ્રામાં પણ વરસાદ નોંધાયો છે. આ તરફ રાપર, અંજાર સહિતના વિસ્તારોમાં બારે મેઘ ખાંગા જોવા મળ્યા છે.
જામનગર:
જામનગર જિલ્લામાં છેલ્લા 12 કલાકમાં 1થી સવા ઇંચ વરસાદ વરસ્યો છે. જામનગરમાં 1 ઇંચ અને જોડિયામાં સવા ઇંચ વરસાદ વરસી ગયો છે. ધ્રોલના લાલપુરમાં ઝરમર વરસાદ વરસ્યો છે. ધ્રોલમાં મોસમનો કુલ 14 ઇંચ વરસાદ વરસી ગયો છે. જ્યારે લાલપુરમાં મોસમનો 9 ઇંચ વરસાદ, અને જોડિયામાં સિઝનનો કુલ 10 ઇંચ વરસાદ વરસી ગયો છે. જામજોધપુરમાં સિઝનનો કુલ વરસાદ 7.5 ઇંચ વરસ્યો છે.
વડોદરા:
વડોદરામાં પણ રાત્રી દરમિયાન વરસાદી માહોલ જોવા મળ્યો છે. વડોદરા શહેરમાં ધીમીધારે વરસાદ વરસ્યો છે. શહેરના મોટા ભાગના વિસ્તારોમાં વરસાદ વરસ્યો. જેમાં રાવપુરા, આકોટા, માંજલપુર, અલ્કાપુરી અને સમા તેમજ કારેલીબાગ વિસ્તારમાં પણ વરસાદી માહોલ જોવા મળ્યો છે.
જૂનાગઢ:
જૂનાગઢ જિલ્લામાં વરસાદી માહોલ યથાવત્ છે. ધીમીધારે વરસાર વરસી રહ્યો છે. તો ગઈકાલે પણ જૂનાગઢમાં વરસાદ પડ્યો હતો. જેથી ખેડૂતોમાં પણ ખુશીની લાગણી છવાઈ ગઈ છે. તો ધીમીધારે વરસાદ વરસતાં ખેડૂતોના પાકને પણ જીવનદાન મળ્યું છે. જૂનાગઢ જિલ્લામાં પણ મોટાભાગના તાલુકામાં વરસાદ વરસી રહ્યો છે.