રાજ્યભરમાં ખાસ કરીને દક્ષિણ અને મધ્ય ભાગમાં સારો વરસાદ થઇ રહ્યો છે. છેલ્લા 24 કલાકમાં રાજ્યના 128 તાલુકામાં વરસાદ વરસ્યો છે. જેમાં સૌથી વધુ કપરાડામાં 9 ઈંચ વરસાદ વરસ્યો છે. જ્યારે હવામાન વિભાગે ગુજરાતમાં હળવા વરસાદની આગાહી કરી છે.
વાપીમાં મધરાત્રીથી મુશળધાર વરસાદ
સમગ્ર રાજ્યમાં વાદળછાયા વાતાવરણ સાથે વરસાદી માહોલ યથાવત છે, જ્યારે વાપીમાં છેલ્લા 24 કલાકથી સતત વરસાદ વરસી રહ્યો છે. જેને કારણે ભારે વાપીમાં જળબંબાકાર જેવી પરિસ્થિતિ સર્જાઇ છે. ભારે વરસાદને પગલે અનેક વિસ્તારોમાં પાણી ભરાયા છે, તો રાત્રી દરમિયાન પડેલા આઠ ઈંચ વરસાદના કારણે વાપી પાણી પાણી થઇ ગયું છે. વાપીના પોશ વિસ્તાર એવા ગુંજનમાં પણ પાણી ભરાયા છે. ગુંજનની શોપિંગ વિસ્તારમાં દુકાનોમાં પણ પાણી ઘુસવાની સમસ્યા ઉભી થઇ છે. જેથી દુકાનદારો ને મોટું નુકશાન થયું છે.
નવસારીમાં સતત ત્રીજા દિવસે વરસાદ યથાવત
નવસારી જિલ્લામાં ત્રીજા દિવસે પણ વરસાદ યથાવત છે. ત્યારે ભારે વરસાદના કારણે અંબિકા નદીની જળ સપાટીમાં વધારો થયો છે. જેમાં 12 કલાકમાં 1.41 ફૂટ વધારો થયો છે હાલ અંબિકા નદીની જળ સપાટી 10.75 ફૂટ પર પહોંચી છે. જ્યારે પૂર્ણા નદીની જળ સપાટી 10 ફૂટ અને કાવેરી નદીની જળ સપાટી 8 ફૂટે પહોંચી છે.
વલસાડમાં ભારે વરસાદ
વલસાડમાં રાત્રી દરમિયાન ભારે વરસાદ વરસ્યો છે. વલસાડ જિલ્લામાં પણ છેલ્લા 24 કલાકમાં 8 ઈંચ વરસાદ નોંધાયો છે. વરસાદ આવતા નીચાણવાળા વિસ્તારમાં પાણી ભરાયા છે. છીપવાડ અને મોગરાવાળી ગરનાળામાં પાણી ભરાતા સ્થાનિકોને હાલાકી ભોગવવાનો વારો આવ્યો છે. તો 4 વાહનચાલકો સરીગામ બાયપાસ રોડ પર ફસાઇ ગયા હતા. જો કે ફાયરબ્રિગેડની ટીમે ચારેય વાહનચાલકોનું રેસ્ક્યૂ કરી અને તેમને બહાર કાઢવામાં આવ્યા હતા. જ્યારે વલસાડના મોગરાવાડી રેલવે સ્ટેશનના ગરનાળામાં વરસાદી પાણી ભરાયા છે.
અમદાવાદમાં મોડી રાતથી વરસાદ
ચોમાસાનું વિધિવત આગમન થઈ ચૂક્યું છે. ત્યારે અમદાવાદમાં ગઈ મોડી રાતથી શહેરના વિવિધ વિસ્તારમાં છૂટો છવાયો વરસાદ જોવા મળ્યો છે. શહેરના સેટેલાઈટ, ગોતા, થલતેજ, બોપલ, ચાંદલોડિયા, મણીનગર, ખોખરા, ઘાટલોડિયા, વસ્ત્રાપુર, મેમનગર, નવરંગપુરા, ચાંદખેડા, સાબરમતી, સુભાષબ્રીજ વિસ્તારમાં વરસાદ જોવા મળ્યો છે. મોડી રાતથી શરૂ થયેલો વરસાદ વહેલી સવાર સુધી જોવા મળ્યો. તો કેટલાક વિસ્તારોમાં ઝરમર વરસાદ નોંધાયો છે.
વડોદરામાં મોડીરાત્રે ધોધમાર વરસાદ
વડોદરામાં મોડીરાત્રે ધોધમાર વરસાદ વરસ્યો છે. છેલ્લા 24 કલાકમાં વડોદરામાં 3 ઇંચ વરસાદ પડ્યો છે, ભારે વરસાદને પગલે શહેરના અનેક વિસ્તારમાં પાણી ભરાયા છે. વરસાદ પડતા શહેરના વાઘોડિયા વિસ્તારમાં આવેલા કોમ્પલેક્ષોમાં પાણી ભરાયા છે. તો સુપર માર્કેટ શોપિંગ સેન્ટરમાં આવેલી દુકાનોમાં પણ પાણી ભરાયા છે. પાણી ભરાતા લાખો રૂપિયાનું નુકસાન થયુ છે. વડોદરાના ડભોઇ અને વાઘોડીયામાં સવા ત્રણ ઇંચ વરસાદ પડ્યો છે. જ્યારે કરજણ અને શિનોરમાં અઢી ઇંચ અને પાદરામાં અડધો ઇંચ અને સાવલીમાં અડધો ઇંચ વરસાદ પડ્યો છે. તો ડભોઈમાં સતત 12 કલાકથી વરસાદ વરસતા લોકોમાં પણ ખુશી જોવા મળી રહી છે. ડભોઈમાં સિઝનનો કુલ 11 ઈંચ વરસાદ નોંધાયો છે. તો વરસાદ પડતા લોકોને ગરમીથી પણ આંશિક રાહત મળી છે.
પંચમહાલ જીલ્લમાં પણ ભારે વરસાદ
આ તરફ પંચમહાલમાં પણ વરસાદ વરસી રહ્યો છે. પંચમહાલના દાહોદમાં છેલ્લા 24 કલાકમાં અઢી ઈંચ વરસાદ વરસ્યો છે. જ્યારે ગરબાડા અને લીમખેડામાં 2-2 ઈંચ વરસાદ નોંધાયો છે. ધનપુરમાં એક ઈંચ, દેવગઢ બારિયામાં અડધો ઈંચ, ઝાલોદમાં અડધો ઈંચ અને સંજેલીમાં પોણો ઈંચ વરસાદ નોંધાયો છે. વરસાદ આવતા નીચાણવાળા વિસ્તારોમાં પાણી ભરાયા હતા. પંચમહાલ અને દાહોદમાં ભારે વરસાદના કારણે પાનમ, હડફ અને કરાડ ડેમમાં પાણીની આવક થઇ છે. હાલ પંચમહાલના પાનમ ડામમાં 1277 ક્યુસેક પાણીની આવક થઇ છે. પાનમ ડેમની ભયજનક સપાટી 127.41 મીટર છે. જ્યારે ડેમની હાલની સપાટી 121.90 મીટરે પહોંચી ગઇ છે. તો હડફ ડેમમાં પણ 690 ક્યુસેક પાણીની આવક થઇ છે. હડફ ડેમની ભયજનક સપાટી 166.20 મીટર છે અને ડેમની હાલની સપાટી 164 મીટરે પહોંચી છે. જ્યારે કરાડ ડેમમાં 981 ક્યુસેક પાણીની આવક થતા હાલ ડેમની જળસપાટી 131.60 મીટરે પહોંચી છે જ્યારે કરાડ ડેમની ભયજનક સપાટી 140.08 મીટર છે.
અરવલ્લીમાં મેઘરાજાએ લીધો વિરામ
અરવલ્લી જિલ્લામાં વરસાદે વિરામ લીધો છે. ત્યારે છેલ્લા 24 કલાકમાં અરવલ્લીમાં નોંધાયેલા વરસાદની વાત કરીએ તો. ધનસુરામાં 2 ઇંચ વરસાદ, મોડાસામાં, બાયડમાં અને માલુપુરમાં પણ 2 ઇંચ વરસાદ પડ્યો. જ્યારે ભિલોડામાં અડધો ઇંચ વરસાદ નોંધાયો છે. ત્યારે ભારે વરસાદના કારણે માજૂમ ડેમમાં 450 ક્યુસેક પાણીની આવક થઇ છે. તો વાત્રક ડેમમાં 230 ક્યુસેક અને વૈડી ડેમમાં 265 ક્યૂસેક પાણીની આવક થઇ છે. જ્યારે લાંક ડેમમાં 28 ક્યુસેક પાણીની આવક થઇ છે.
નર્મદામાં વરસાદ થતા સરદાર સરોવર ડેમની સપાટીમાં વધારો
નર્મદામાં વરસાદ થતા સરદાર સરોવર નર્મદા ડેમની સપાટીમાં વધારો થયો છે. ઉપરવાસમાં ભારે વરસાદ થતા 40 હજાર 341 ક્યુસેક પાણીની આવક થઈ છે. પાણીની આવક થતા એક જ દિવસમાં ડેમની સપાટીમાં 22 સેન્ટીમીટરનો વધારો થયો છે. ડેમની સપાટી વધીને 120.62 મીટરે પહોંચી છે.. ડેમની ભયજનક સપાટી 121.92 મીટર છે. હાલમાં ડેમમાં 1203 MCM પાણીનો લાઈવ સ્ટોરેજ જથ્થો છે. જ્યારે ખેડૂતો માટે ડેમમાંથી મેઈને કેનાલમાં 6 હજાર ક્યુસેક પાણી છોડવામાં આવી રહ્યુ છે.
બનાસ નદીમાં પણ નવા નીર
આ તરફ રાજસ્થાનના ડુંગરાળ વિસ્તારમાં વરસાદ આવતા બનાસકાંઠાની બનાસ નદીમાં પણ નવા નીર આવ્યા છે. 2017માં તાંડવ કર્યા બાદ સુકીભટ્ટ પડેલી નદીમાં પ્રથમ વખત નવા નીર આવતાં સ્થાનિકોમાં ખુશીનો માહોલ જોવા મળ્યો છે.
સૌરાષ્ટ્રના અનેક વિસ્તારોમાં માત્ર આંશિક વરસાદ
સૌરાષ્ટ્રમાં વરસાદ માટે હજુ એક સપ્તાહની રાહ જોવી પડશે. હવામાન વિભાગની આગાહી મુજબ હજુ સપ્તાહ બાદ સૌરાષ્ટ્રમાં વરસાદ પડશે. સિસ્ટમ ફંટાતા ઉત્તર ભારતમાં વરસાદ પડ્યો છે. ત્યારે હાલ સૌરાષ્ટ્રના અનેક વિસ્તારોમાં માત્ર આંશિક વરસાદ જ જોવા મળ્યો છે. નવી સિસ્ટમ સક્રિય થયા બાદ જ સૌરાષ્ટ્રમાં ભારે વરસાદ જોવા મળશે.