રાજ્યમાં છેલ્લા બે ત્રણ દિવસથી વાદળછાયા વાતાવરણ સાથે ક્યાંક ધોધમાર તો ક્યાંક ઝરમર ઝરમર વરસાદ વરસી રહ્યો છે. વરસાદને લઇ ધરતીપુત્રો આનંદ છવાઇ ગયો છે. તો શહેરીજનો અહલાદક વાતાવરણાં મોજ માણી રહ્યા છે.
અમદાવાદમાં ધીમીધારે વરસાદ :
અમદાવાદમાં ધીમીધારે વરસાદ પડી રહ્યો છે. શહેરના બોપલ, સેટેલાઇટ, થલતેજ, ગોતા, ચાંદલોડિયા સહિક પૂર્વ વિસ્તારમાં ધીમીધારે વરસાદ પડી રહ્યો છે. ઝરમર ઝરમર વરસાદ અને વાદળછાયા વાતાવરણમાં શહેરીજનો આનંદ માણી રહ્યા છે.
વલસાડમાંવરસાદી માહોલ:
વલસાડ જિલ્લામાં વરસાદી માહોલ જામ્યો છે. વલસાડના તમામ તાલુકાઓમાં વરસાદ પડી રહ્યો છે. જિલ્લામાં ભારે વરસાદના પગલે ગ્રામ્ય વિસ્તારમાં પાણી ભરાયા છે. લોકોના ઘરમા પાણી ઘૂસી જતા લોકોને હાલાકીનો સામનો કરવો પડી રહ્યો છે. તો વાપી, વલસાડ, કપરાડા, ધરમપુર, પારડીમાં સારા વરસાદથી ખેડૂતોમાં ખુશીની લહેર જોવા મળી રહી છે.
અરવલ્લીમાં છેલ્લા બે દિવસથી સાર્વત્રિક વરસાદ:
અરવલ્લીમાં છેલ્લા બે દિવસથી સાર્વત્રિક વરસાદ વરસી રહ્યો છે. ગુરુવારે રાત્રે ગાજવીજ સાથે વરસાદ તૂટી પડતાં મેઘરજમાં છેલ્લા ર૪ કલાક દરમિયાન ચાર ઇંચ વરસાદ નોંધાયો હતો. ૯૬ મી.મી વરસાદ થતાં અનેક નિચાણવાળા વિસ્તારો જળબંબાકાર થયા હતા.
નવસારીમાં ધોધમાર વરસાદ:
આ તરફ નવસારીમાં પણ મેઘરાજાનું આગમન થયુ છે. જિલ્લામાં 2 કલાકના વિરામ બાદ ફરી વરસાદ શરૂ થયો છે. વરસાદને પગલે ચીખલીથી પસાર થતી કવારે નદીમાં નવા નીર આવ્યા છે અને નદી પર બનાવેલો કોઝવે પરથી પાણી વહી રહ્યુ છે. ભારે વરસાદના કારણે નીચાણવાળા વિસ્તારમાં પાણી ભરાયા છે. જેને કારણે લોકોને હાલાકીનો સામનો કરવો પડી રહ્યો છે.
સુરત વહેલી સવારથી વરસાદ શરૂ:
દક્ષિણ ગુજરાતમાં આજે વહેલી સવારથી શરૃ થયેલા સાર્વત્રિક વરસાદને પગલે તમામ જિલ્લાઓમાં જળબંબાકારની સ્થિતિ છવાઈ હતી. ખાસ કરીને સુરતના ઉમરપાડા તાલુકામાં આજે દિવસ દરમિયાન ૧૬૮ મિ.મી. લેખે સાડ છ ઇંચ વરસાદ પડતાં તમામ સ્થળે જળબંબાકારની સ્થિતિ છવાઈ હતી.
છોટાઉદેપુરમાં ભારે વરસાદ:
છોટાઉદેપુર જિલ્લામાં ભારે વરસાદ વરસી રહ્યો છે. જિલ્લાના બોડેલી અને નસવાડીમાં વરસાદ આવતા હેરણ નદીમાં ઘોડાપુર આવતાં બે કાંઠે વહી રહી છે. તો નદી કાંઠાના લોકો નદીનો નજરો જોવા માટે ઉમટી પડ્યા. જ્યારે નદીઓમાં ભારે પાણી આવતા ખેડૂતોમાં ખુશીનો માહોલ જોવા મળ્યો છે. આ ઉપરાંત ઉપરવાસમાં ભારે વરસાદ પડતા ઓરસંગ નદી બે કાંઠે વહી રહી છે. તો જોજવાનો ચેકડેમ પણ ઓવરફ્લો થયો છે. પાણીની આવક થતા ખેડૂતોમાં ખુશીની લાગણી જોવા મળી રહી છે.
તાપી જિલ્લા પર મેઘરાજા મહેરબાન:
તાપી જિલ્લા પર મેઘરાજા મહેરબાન થયા છે. છેલ્લા 24 કલાકમાં વ્યાપામાં 3.5 ઇંચ વરસાદ નોંધાયો છે. જ્યારે વાલોડમાં સવા 2 ઈંચ અને ડોલવણમાં 3.5 ઈંચ વરસાદ પડ્યો છે. તો સોનગઢમાં 2 ઈંચ, ઉચ્છલમાં સવા 3 ઈંચ અને નિઝરમાં 2 ઈંચ વરસાદ નોંધાયો છે. જ્યારે કુકરમુંડામાં 2 ઈંચ વરસાદ પડ્યો છે. ભારે વરસાદના કારણે ઉકાઇ ડેમની સપાટી 276.18 ફૂટ પહોંચી છે. ડેમમાં પાણીની આવક 4200 ક્યુસેક છે. જ્યારે પાણીની જાવક 600 ક્યુસેક છે.
મહીસાગર જિલ્લામાં સતત વરસાદ:
મહીસાગર જિલ્લામાં સતત વરસાદ વરસી રહ્યો છે. ભારે વરસાદને પગલે કડાણા ડેમમાં પાણીની આવકમાં વધારો થયો છે. ડેમમાં પાણીની આવક 16110 ક્યુસેક નોંધાયું છે. પાણીની આવક થતા છેલ્લા 2 દિવસમાં ડેમની જળસપાટી વધીને 392.9 ફૂટે પહોંચી છે.
ડાંગ જિલ્લામાં સાર્વત્રિક વરસાદ:
ડાંગ જિલ્લામાં સાર્વત્રિક વરસાદ પડ્યો છે. જેને લઇ નદી-નાળા છલકાયા છે. ત્યારે વરસાદ પડતા ખેડૂતોની વાવણી અધુરી રહી ગઇ છે. ત્યારે ખેતરોમાં વાવણી કરેલા બિયારણ ધોવાવાની ખેડૂતોમાં ચિંતા જોવા મળી છે. તો અંબિકા નદી બે કાંઠે થતા ધોધમાં પાણીનું આગમન થયુ છે. ધોધમાં પાણીનું આગમન થતા પ્રકૃતિ પ્રેમીઓ ધોધ જોવા માટે ઉમટ્યા હતા. સાપુતારા જતા પ્રવાસીઓ ગીરા ધોધ જોવા માટે રોકાયા હતા. ઉનાળા પછી ગીરા ધોધ વહેતો થતા લોકોમાં ખુશીનો માહોલ જોવા મળ્યો છે. સૌંદર્ય પ્રેમીઓ ગીર ધોધ વહેચો થતા મજા માણવા માટે પહોંચ્યા.
ક્યાં કેટલો વરસાદ:
12 વાગ્યા સુધીમાં સૌથી વધુ ઉમરપાડામાં 9 ઈંચ વરસાદ પડ્યો છે. જ્યારે જાંબુઘોડામાં સવા 6 ઈંચ, ચીખલીમાં 5 ઈંચ વરસાદ નોંધાયો છે. તો ગણદેવીમાં સવા 4 ઈંચ, બોડેલીમાં સવા 4 ઈંચ, વાંસદામાં 4 ઈંચ અને મહુવામાં 4 ઈંચ વરસાદ પડ્યો છે. જ્યારે વઘઈમાં 4 ઈંચ, વ્યરામાં 3.5 ઈંચ અને સુરતમાં 3.5 ઈંચ વરસાદ નોંધાયો છે. ડોલવણ, ચૂડામાં અને છોટાઉદેપુરમાં 3.5 ઇંચ વરસાદ પડ્યો છે. જ્યારે સીંગવડ, લીમખેડા અને ઉચ્છલમાં સવા 3 ઇંચ વરસાદ ખાબક્યો છે. તો વાપીમાં 3 ઇંચ અને કામરેજમાં પણ 3 ઇંચ વરસાદ પડ્યો છે. જ્યારે મોરવા હડફ, દાહોદ, માંગરોળ અને સુબીરમાં 2.5 ઇંચ વરસાદ નોંધાયો છે. તો વાલોદ અને માંડવીમાં સવા 2 ઇંચ વરસાદ પડ્યો છે. જ્યારે જલાલપોર, નવસારી, ડાંગ, ગોધરામાં 2 ઇંચ વરસાદ વરસ્યો છે. ઉપરાંત જાલોદ, ખેરગા, બાલાસિનોરમાં પણ 2 ઇંચ વરસાદ નોંધાયો છે. જ્યારે ફતેપુરા, નિઝર, સોનગઢ, કુકરમુંડા અને માલપુરમાં 2 ઇંચ વરસાદ પડ્યો છે.