હવામાન / રાજ્યમાં મેઘરાજાની ધમાકેદાર એન્ટ્રી, સુરત, પંચમહાલ, તાપી સહિતના વિસ્તારોમાં ભારે વરસાદ

સુરત:
સુરતમાં વહેલી સવારથી ધીમીધારે વરસાદ વરસી રહ્યો છે. વરસાદ આવતા અનેક વિસ્તારોમાં પાણી ભરાયા છે. વરસાદના પાણીના નિકાલની વ્યવસ્થા ન હોવાના કારણે સુરતની સિવિલ હોસ્પિટલ પાણી ભરાવવાયા છે. જેથી દર્દીઓને હાલાકી ભોગવવાનો વારો આવ્યો છે.

અમદાવાદ:
અમદાવાદની વાત કરીએ તો અમદાવાદમાં બે દિવસથી વરસાદી ઝાપટા સાથે ઝરમર ઝરમર વરસાદ વરસી રહ્યો છે. વાદળછાયુ વાતાવરણ રહેતાં શહેરીજનોને ગરમીથી રાહત મળી છે, તો શહેરીજનો ખુલ્લામાં વાતાવરણની મજા માણી રહ્યા છે.

તાપી:
તાપીમાં મોડી રાત્રે મેઘરાજાનું આગમન થયું છે. તાપી જિલ્લાના વ્યારા અને આસપાસના વિસ્તારમાં વરસાદ વરસી રહ્યો છે. જિલ્લાના વાલોડ, ડોળવણ, સોનગઢ તાલુકામાં વરસાદ વરસ્યો છે. સવારથી પડી રહેલા વરસાદને લઇ ધરતી પુત્રોમાં આનંદની લાગણી ફેલાઈ હતી. જ્યારે જિલ્લામાં આવેલ અને દક્ષિણ ગુજરાતની જીવાદોરી સમાન ઉકાઈ ડેમમાં આજે સીઝનમાં પ્રથમ વાર નવા નીરની આવક શરૂ થઇ છે. ડેમમાં 4200 ક્યુસેક પાણી આવી રહ્યું છે જેને લઈને ડેમની સપાટીમાં અંશતઃ વધારો થયો છે. હાલ ડેમની સપાટી 275.78 ફૂટ પર પોહચી છે.

નર્મદા:
આ તરફ નર્મદા જિલ્લામાં મોડી રાત્રે મેઘરાજાએ દ્વાર ખખડાવ્યા છે. ગરુડેશ્વર અને તીલકવાડામાં દોઢ ઈંચ વરસાદ વરસ્યો છે. તો નાંદોદમાં એક ઈંચ જેટલો વરસાદ વરસ્યો છે. જ્યારે સાગબારા અને ડેડીયાપાડામાં અડધો ઈંચ વરસાદ વરસ્યો છે. બીજી તરફ મધ્યપ્રદેશમાં ભારે વરસાદ વરસી રહ્યો છે. જેના કારણે બોર્ડર પર આવેલા નર્મદા જિલ્લામાં પણ વરસાદી માહોલ યથાવત્ છે. અને હજુ પણ કેટલાક તાલુકાઓમાં વરસાદ વરસી રહ્યો છે.