રાજ્યમાં ધીમે ધીમે ચોમાસું જામતું જઈ રહ્યું છે. રાજ્યના 25 જિલ્લાના 97 તાલુકામાં મેઘરાજાએ દસ્તક દીધી છે. અમદાવાદમાં ઝરમર ઝરમર વરસાદ સાથે ગુજરાતભરના અનેક વિસ્તારોમાં મેઘો મુશળધાર વરસાદ લઇને ખાબક્યો છે. છેલ્લા 24 કલાકમાં સૌથી વધુ અંકલેશ્વરમાં 7 ઈંચ વરસાદ થયો છે.
છોટાઉદેપુરમાં ભારે વરસાદ:
છોટાઉદેપુરના બોડેલીમાં ભારે વરસાદના કારણે અનેક વિસ્તારોમાં પાણી ભરાયા છે. રણભૂન ગામ પાસે આવેલા કોઝવે પર પાણી ભરાયા છે. કોઝવે પર પાણી ભરાતા વિદ્યાર્થીઓને જીવના જોખમે કોઝવે પાર કરવાનો વારો આવ્યો છે. હાલમાં બાળકોને જીવના જોખમે કોઝવે પ્રસાર કરવા માટે મજબૂર બન્યા છે. આ મામલે વારંવાર રજૂઆતો કરવા બાદ પણ વહીવટી તંત્ર નિષ્ક્રીય સાબિત થયુ છે. દર વર્ષે આ પ્રકારની સ્થિતિ સર્જાતા ગ્રામજનોમાં રોષ જોવા મળી રહ્યો છે.
ક્યાં કેટલો વરસાદ:
ભરૂચમાં - 5 ઈંચ વરસાદ
કામરેજમાં - 4.5 ઈંચ વરસાદ
સુરતના માંગરોળમાં - 4 ઈંચ
પલસાણામાં - 3 ઈંચ વરસાદ
નર્મદાના નાંદોદમાં - 2 ઈંચ
વાલિયામાં - 3 ઈંચ વરસાદ
હાંસોટમાં - 2 ઈંચ
જંબુસરમાં - 2 ઈંચ વરસાદ
રાજકોટમાં સહિત સૌરાષ્ટ્રના અનેક વિસ્તારોમાં મેધ મહેર:
રાજકોટમાં સહિત સૌરાષ્ટ્રના અનેક વિસ્તારોમાં મેધ મહેરથી ડેમોમાં નવા નીરની આવક થઈ છે. તો વરસાદ સાથે વીજળી પડતા લલોઈ ગામમાં રાજકોટના ખેડૂતનુ મોત થયુ છે. જ્યારે રાજકોટમાં સવારથી ધોધમાર વરસાદ પડી રહ્યો છે. ધોધમાર વરસાદને કારણે ભાદક ડેમમાં 0.49 ફૂટન નવી નીરની આવક થઈ છે. તો આજીમાં 2માં 0.82 ફૂટ આવક થઈ. મોરબીના વાડીસંગ 2.69 ફૂટ આવક થઈ. તો દેવભૂમિ દ્વારકાના ભોગવો ડેમમાં 0.50 ફૂટ આવક થઈ છે. તો ડેમમાં નવા નીરની આવક થતા ખેડુતો નવા નીરના વધામણા કરી રહ્યા છે. તો આ તરફ જામનગરમાં પણ વરસાદનું આગમન થયુ છે. જામનગર જિલ્લામાં છેલ્લા 24 કલાકમાં બે ઈચ વરસાદ નોંધાયો છે.
ગીર -સોમનાથમાં વરસાદી માહોલ:
ગીર -સોમનાથમાં વરસાદી માહોલ જામ્યો છે. વહેલી સવારથી ગાજ -વિજ સાથ મેધરાજએ માજા મુકી છે. કણેરી,ફાટસર,ધાબાવડ, દ્રોણ, સહીત વિસ્તારમાં ધોધમાર વરસાદ પડેયો છે. ભારે વરસાદને લઈને સમગ્ર પંથકમા પાણી પહેતા થયા છે. ધોધમાર વરસાદ પડતા ખેડૂતોમાં ખુશીની લેહેર જોવા મળી રહી છે.
અમદાવાદમાં વહેલી સવારથી ઝરમર વરસાદ:
અમદાવાદમાં આજે વહેલી સવારથી ઝરમર વરસાદ વરસી રહ્યો છે. શહેરના વિવિધ વિસ્તારોમાં વરસાદી માહોલ છવાયો છે. શહેરના સેટેલાઈટ, બોડકદેવ, સુભાષબ્રિજ, ગોતા, ચાંદખેડા, થલતેજ, બોપલ, ચાંદખેડા, અખબાર નગર, મેમનગર, વસ્ત્રાપુર, શિવરંજની, ઇસ્કોન સહિતના પૂર્વી વિસ્તારોમાં ધીમીધારે વરસાદનું આગમન થયુ છે.
વડોદરામાં ભારે પવન સાથે વરસાદ:
વડોદરામાં અચાનક વાતાવરણમાં પલટો આવતાં ભારે પવન સાથે મેઘરાજા મન મુકીને વરસ્યા છે. સમગ્ર શહેરમાં ધોધમાર વરસાદ પડતા ઠેર ઠેર પાણી ભરાયા. ભરાયેલા પાણીના પગલે શાળાએ જતા બાળકોને મુશ્કેલી પડી રહી છે. એક કલાકમાં 1.5 ઈંચ વરસાદ પડતા તંત્રની પોલી ખુલી છે. કલાકો વિતવા છતા પાણીનો નિકલ ન થતા તંત્ર પર સવાલો ઉઠી રહ્યા છે.
સુરત શહેરમાં મોડ રાત્રે વરસાદ:
સુરત શહેરમાં મોડી રાત્રે વરસાદ શરૂ થયો હતો અને મોટાભાગના વિસ્તારોમાં વરસાદ વરસ્યો હતો. જેમાં શહેરના રેલવે સ્ટેશન વિસ્તારમાં વીજળીના કડાકા ભડાકા સાથે ધોધમાર વરસાદ વરસ્યો હતો. જ્યારે કતારગામ અને વરાછા વિસ્તારમાં પણ રાત્રી દરમિયાન સારો વરસાદ વરસ્યો હતો. તો સુરતના ખોલવડમાં ધોધમાર વરસાદ પડયો છે. ભારે વરસાદના કારણે લસકાના-ખોલવડ વચ્ચે આવેલી ખાડી ઓવર ફ્લો થઈ છે. ખાડી ઓવરફ્લો થતા રસ્તો બંધ કરી દેવામાં આવ્યો છે. મહત્વનું છે કે, એક વર્ષથી જિલ્લા પંચાયત દ્વારા પુલ બનાવવાની કમિગીરી ચાલી રહી હતી.પરંતુ સમયસર કામ પૂર્ણ ન થતા અનેક લોકોને હાલાકી વેઠવાનો આવ્યો વારો છે.
ભરૂચ જિલ્લામાં ધોધમાર વરસાદ:
ભરૂચ જિલ્લામાં ધોધમાર વરસાદ વરસ્યો છે. જિલ્લાના 9 તાલુકામાં ક્યાંક ધોધમાર તો ક્યાંક ઝરમર વરસાદી માહોલ જામ્યો છે. છેલ્લા 24 કલાકમાં સરેરાશ 5 ઈંચ વરસાદ નોંધાયો છે. ભરૂચના અંકલેશ્વરમાં 7 ઈંચ, જંબુસરમાં 2 ઈંચ, હાંસોટમાં 2 ઈંચ, વાલીયામાં 2.5 ઈંચ, ઝઘડીયામાં સવા ઈંચ અને નેત્રંગમાં અડધો ઈંચ વરસાદ વરસ્યો છે. વરસાદના પગલે કેટલાક સ્થળે વીજ પુરવઠો પણ ખોરવાયો છે અને નિચાણવાળા વિસ્તારોમાં પાણી ભરાઇ ગયા છે.
નવસારીમાં વ્યાપક વરસાદ:
આ તરફ નવસારીમાં પણ ધોધમાર વરસાદ વરસ્યો છે. નવસારી જિલ્લામાં સરેરાશ 1 ઈંચ વરસાદ વરસ્યો છે. નવસારીમાં આવેલી પૂર્ણા નદી અને અંબિકા નદીની જળસપાટીમાં વધારો થયો છે. પૂર્ણ નદીની જળસપાટીમાં 10 ફૂટનો વધારો થયો છે. જ્યારે અંબિકા નદીની જળસપાટીમાં 6 ફૂટનો વધારો થયો છે. નવસારીના ગણદેવીમાં સવા બે ઈંચ, ચીખલીમાં દોઢ ઈંચ, જલાલપોરમાં સવા ઈંચ, ખેરગામમાં અડધો ઈંચ વરસાદ વરસ્યો છે.