ગીરમાં આભ ફાટ્યું! રાજ્યનો સૌથી વધુ વરસાદ ખાબક્યો અનેક ગામો સંપર્ક વિહોણા નદીઓમાં ઘોડાપુર

ગીર-સોમનાથઃ ગીર-સોમનાથ જિલ્લામાં જાણે આભ ફાટયું  હોય તેમ છેલ્લા 24 કલાકમાં ધોધમાર વરસાદ વરસી ચૂક્યો છે. ગીર-સોમનાથના ગીર-ગઢડા તાલુકામાં સૌથી વધુ 12 ઈંચ વરસાદ વરસ્યો છે. જેના કારણે ગીર-ગઢડાના તમામ ગામડાઓની સ્થિતિ કફોડી બની છે. ગીર-ગઢડામાં મોટાભાગના ગામડાઓ પાણીમાં ગરકાવ થઈ ગયા છે. તો પાણીના પ્રવાહના કારણે માર્ગો અને ખેતરો ધોવાઈ ગયા છે. કુદરતી આફત સામે વ્યક્તિ લાચાર બન્યો છે. ત્યારે સરકારી કર્મચારીઓ ઓફિસમાં બેસીને જવાબ આપી રહ્યા છે.

ઉનાના રહીમનગર ખારા વિદ્યાનગરમાં ઘરમાં પાણી ભરાયા છે. તો શહેરના મુખ્ય બજારો અને કોમ્પલેક્ષ પણ પાણીમાં ગરકાવ થઈ ગયા છે. ત્યારે નદી કાંઠાના અને દરિયા કાંઠાના ગામડાઓનો સંપર્ક તૂટી ગયો છે. ગામડાઓમાં જવાના માર્ગો પાણીના પ્રવાહમાં ધોવાઈ ગયા છે. લોકોની ઘરવખરી પલળી ગઈ છે. અનાજ પલળી ગયા છે. જેથી લોકોને ખાવા પીવાના ફાંફા મારવા પડે તેવી સ્થિતિ સર્જાઈ છે.



ગીરમાં સૌથી વધુ વરસાદ ખાબક્યો
રાજ્યભરમાં સતત વરસાદ વરસી રહ્યો છે. રાજ્યમાં 206 તાલુકાઓમાં વરસાદ શરૂ થયો છે. રાજ્યમાં સૌથી વધુ ગીર ગઢડામાં 20 ઈંચ વરસાદ ખાબક્યો છે. જ્યારે ઊનામાં 18 ઈંચ વરસાદ વરસ્યો છે. સાથે જ કોડિનારમાં 13 ઈંચ જાફરાબાદમાં 11 ઈંચ સુત્રાપાડામાં 10 ઈંચ. ધરમપુરમાં 9 ઈંચ વલસાડમાં 9 ઈંચ વઘઈમાં 8 ઈંચ પારડી અને ખેરગામમાં 8 ઈંચ રાજકોટ રાજુલા અને તાળામાં 7 ઈંચ વરસાદ નોંધાયો છે.

સૌરાષ્ટ્રમાં વરસાદ યથાવત્
તો આ તરફ સૌરાષ્ટ્રમાં પણ હજુ પણ વરસાદ યથાવત્ છે. ગીર સોમનાથ ભાવનગર અને અમરેલી જૂનાગઢ અને રાજકોટમાં પણ વરસાદ યથાવત્ છે. ભારે વરસાદના કારણે માનવ મૃત્યુંઆંક 29 પર પહોંચ્યો છે. ત્યારે હવે હવામાન વિભાગ દ્વારા ભારેથી અતિભારે વરસાદની આગાહી કરવામાં આવી છે. ભારે વરસાદની આગાહીને પગલે NDRFની વધુ 5 ટીમ ગુજરાત પહોંચી છે. તમામ NDRFની ટીમ વિવિધ વિસ્તારોમાં જરૂરિયાત પ્રમાણે મોકલાશે. ગીર સોમનાથમાં ધોધમાર વરસાદ પડી રહ્યો છે. ગીર સોમનાથમાં છેલ્લા 6 દિવસથી વરસાદ વરસી રહ્યો છે. ભારે વરસાદના કારણે અનેક વિસ્તારોમાં પાણી ભરાયા છે.

સુત્રાપાડાઃ સરસ્વતી નદીમાં આવ્યું ઘોડાપૂર
ગીર-સોમનાથના સુત્રાપાડામાં પણ ભારે વરસાદ નોંધાયો હતો. અહીં રાત્રી દરમિયાન ભારે વરસાદ વરસ્યો હતો. જેના કારણે સરસ્વતી નદીમાં ઘોડાપૂર આવ્યું હતું. બે કાંઠે વહી રહેલી સરસ્વતી નદીના પાણી આસપાસના ખેતરોમાં ફરી વળ્યા હતા. જેથી ખેતીને પણ ભારે નુકસાન થયું છે.



મહત્વનું છે કે 6 દિવસમાં સુત્રાપાડામાં 10 ઈંચ વરસાદ ખાબક્યો છે. ભારે વરસાદના કારણે અનેક ગામ સંપર્ક વિહોણા થયા છે. ભારે વરસાદને પગલે રસ્તાઓ પર પણ પાણી ભરાયા છે. પાણી ભરાવવાના કારણે જનજીવન અસ્ત વ્યસ્ત થયુ છે.



કોડીનારઃ ગામમાંથી વહી નદી ભરાયા પાણી
ગીર-સોમનાથના કોડીનારમાં પણ વરસાદે કહેર વરસાવ્યો છે. કોડીનારના ગ્રામ્ય વિસ્તારમાં નદીના પાણી ફળી વળ્યા છે. તો ગામમાંથી નદીનો પ્રવાહ વહેતા પાણીનો ધસમસતો પ્રવાહ નજરે પડી રહ્યો છે. ગામની વચ્ચેથી વહેતા પાણીના કારણે ગ્રામજનોને બહાર નીકળવું મુશ્કેલ થઈ ગયું છે. નદીની જેમ પાણી વહેતા લોકો પણ ભયભીત થઈ ગયા છે.



ગોહિલખાનઃ ગામ બેટમાં ફેરવાયું
ગીર-સોમનાથ જિલ્લામાં છેલ્લા બે દિવસથી પડી રહેલા અવિરત અને ભારે વરસાદના કારણે જિલ્લામાં જળબંબાકાર જેવી સ્થિતિ સર્જાઈ છે. ગીર-સોમનાથના કોડીનારમાં પણ ભારે વરસાદ પડ્યો છે. જેના કારણે કોડીનારનું ગોહિલખાન ગામ બેટમાં ફેરવાયું છે. ગામના કેટલાક વિસ્તારો બેટમાં ફેરવાઈ ગયા છે. ગામના નીચાણવાળા વિસ્તારમાં કેડસમા પાણી ભરાઈ ગયા છે.



ઉનાઃ સોસાયટીમાં પાણી
ગીર-સોમનાથના ઉનામાં થઈ રહેલા ભારે વરસાદના કારણે લોકોને ભારે હાલાકીનો સામનો કરવાનો વારો આવ્યો છે. વરસાદથી અનેક સોસાયટીઓ પાણીમાં ગરકાવ થઈ ગઈ છે. સોસાયટીમાં કમર સુધી પાણી ભરાઈ ગયા છે. જેથી લોકોને ઘરની બહાર નીકળવું મુશ્કેલ બન્યું છે.

સિંગોડા નદીમાં ભારે પૂર
જ્યારે રાત્રીના સમયે પણ ગીર-સોમનાથના ઉનામાં ભારે વરસાદ વરસતો રહ્યો હતો. જેના કારણે અનેક ગામડાઓ સંપર્ક વિહોણા થઈ ગયા હતા. તો ઉનામાં સિંગોડા નદીમાં ભારે પૂર આવ્યું હતું. જેને નિહાળવા માટે મોડી રાત્રે મોટી સંખ્યામાં લોકો ઉમટી પડ્યા હતા.



કાસુદ્રી નદી બે કાંઠે
જેના કારણે સમગ્ર જિલ્લામાં જળબંબાકારની સ્થિતિ સર્જાઈ છે. ત્યારે ઉના રોડ઼ પર ઢીંચણસમા પાણી વહી રહ્યા છે. જ્યારે કાસુદ્રી નદી બે કાંઠે વહી રહી છે. નદીના પાણી માર્ગો અને ખેતરોમાં ફરી વળ્યા છે. ત્યારે અમારા સંવાદદાતાએ ઉના હાઈ-વે પર લોકોને પડી રહેલી હાલાકીનો તાગ મેળવ્યો હતો.

મટાણા ગામઃ બેટમાં ફેરવાયું ગામ 
તો આ તરફ ગીર સોમનાથમાં પણ ધોધમાર વરસાદ વરસી રહ્યો છે... ભારે વરસાદના કારણે મટાણા ગામ બેટમાં ફેરવાયુ છે... ભારે વરસાદના કારણે અનેક ઘરોમાં પાણી ઘુસ્યા છે..  



જંત્રાખડી ગામઃ ખોડિયાર મંદિરનો સંપર્ક તૂટ્યો
જિલ્લાના તમામ તાલુકામાં ભારે વરસાદ નોંધાયો છે. ત્યારે જંત્રાખડી ગામનું ખોડિયાર મંદિર પાણીમાં ગરકાવ થઈ ગયું છે. મંદિરની ચારેય બાજુ પાણી ફરી વળ્યાં છે. જેના કારણે મંદિરનો આશ્રમ પણ પાણીમાં ગરકાવ થઈ ગયો છે. મંદિરનો ગ્રામજનો સાથે સંપર્ક તૂટી ગયો છે.



અમદાવાદમાં ૨૪ કલાકમાં ભારે વરસાદની આગાહી
રાજ્યભરમાં આગામી 24 કલાકમાં ભારેથી અતિભારે વરસાદની હવામાન વિભાગ દ્વારા આગાહી કરવામાં આવી છે. ખાસ કરીને સૌરાષ્ટ્ર અને દક્ષિણ ગુજરાતમાં ધોધમાર વરસાદ પડવાની સંભાવના છે. આ તરફ ઉત્તર અને મધ્ય ગુજરાતમાં પણ વરસાદ પડવાની શક્યતા છે.

આગાહી અનરાધારની !
હવામાન વિભાગના જણાવ્યા પ્રમાણે સમગ્ર ગુજરાતને આંતરતી નવી સિસ્ટમ બંગાડની ખાડીમાં સક્રિય થઈ છે. જેના કારણે સમગ્ર રાજ્યમાં ધોધમાર વરસાદ પડી શકે છે. દરિયામાં સિસ્ટમ સક્રિય થતા માછીમારોને પણ દરિયો ન ખેડવા માટે સલાહ આપવામાં આવી છે. તો તમામ બંદરોને સતર્ક રહેવાના આદેશ આપી દેવાયા છે. આ તરફ સરકારનું વહીવટી તંત્ર પણ સતર્ક થયું છે. NDRF અને ડિઝાસ્ટર મેનેજમેન્ટ સહિતની તમામ બતાવ ટીમોને સ્ટેન્ડબાય રાખવામાં આવી છે.