ચોમાસું / બનાસકાંઠામાં મેઘરાજાની ધમાકેદાર બેટિંગ, વાવમાં 9 ઇંચ તો થરાદ 7 ઇંચ વરસાદ

રાજસ્થાન અને ગુજરાત બોર્ડરના વિસ્તારોમાં ભારે વરસાદ પડ્યો છે. જેથી નદીઓમાં નવા નીર આવ્યા છે. તો વાવમાં  આભ ફાટ્યું છે. છેલ્લા 8 કલાકમાં જ વાવમાં 9 ઈંચ જેટલો વરસાદ વરસી ગયો છે. તો બીજી તરફ માડકા અને મોરિખા ગામનું તળાવ ફાટી ગયું છે. જેના પાણી ગામમાં ફરી વળ્યા છે. તો લોકોના ઘરમાં પણ પાણી ફરી વળ્યા છે. 

બનાસકાંઠા જિલ્લામાં લાંબા સમયબાદ સાર્વત્રિક વરસાદ થયો છે. બનાસકાંઠાના વાવમાં સૌથી વધારે 9 ઇંચ વરસાદ નોંધાયો છે, જ્યારે થરાદમાં 7 ઇંચ વરસાદ પડ્યો છે. તો ભારે વરસાદના કારણે નિચાણવાળા વિસ્તારોમાં પાણી ભરાયા છે. થરાદ બસ ડેપોના વર્કશોપમાં પણ ઢીંચણસમા પાણી ભરાઈ ગયા છે.

છેલ્લા 12 કલાકમાં બનાસકાંઠાના વાવમાં 9 ઈંચ વરસાદ પડ્યો છે. તો થરાદમાં 7 ઈંચ, દિયોદરમાં 4 ઈંચ, લાખણીમાં 2 ઈંચ અને ભાભરમાં 1.5 ઈંચ વરસાદ વરસ્યો છે. જ્યારે સુઈગામ અને વડગામમાં 1-1 ઈંચ જ્યારે ડીસા અને દાંતીવાડામાં અડધો અડધો ઈંચ વરસાદ વરસ્યો છે.

બનાસકાંઠામાં વરસાદની આગાહીના પગલે ગઈ મોડી રાતે ઘણા વિસ્તારોમાં મૂશળધાર વરસાદ પડતા ખેડૂતોમાં ખુશી જોવા મલી છે ત્યારે રાજસ્થાન તરફ ઉપરવાશમાં પણ ભારે વરસાદ થતાં બનાસ નદીમાં નવા નીર આવ્યા છે. જોકે બનાસ નદીમાં આવેલો પાણી દાંતીવાડા ડેમ માં જાય છે જેના કારણે દાંતીવાડા ડેમની સપાટીમાં પણ આ પાણીથી વધારો થશે જેના કારણે ઘણા બધા ખેડૂતોને  આ પાણીનો ફાયદો થશે.

નદીમાં નવા નીર આવતા ખેડૂતોમાં ખુશી છવાઈ છે જોકે લાંબા સમય બાદ વરસાદ ખાબકતા સમગ્ર બનાસકાંઠાવાસીઓમાં ખુશીનો માહોલ જોવા મળી રહ્યો છે. ખાસ કરીને ખેડૂતોને પોતાના પાકને બચાવવા માટે વરસાદ માટે ભગવાનને પ્રાર્થના કર્યા હતા ત્યારે અચાનક જ મોડી રાતે વરસાદ ખાબકતા ભારતી પણ નવું જીવતદાન મળ્યું છે હજી બે દિવસની આગાહીને લઈને તંત્ર પણ ખડી પગ થયું છે વધારે વરસાદની ખેડૂતો આશા સેવી રહ્યા છે.

રાજ્યમાં ભારે લો પ્રેશર અને સાયક્લોનિક સર્ક્યુલેશનના કારણે હવાનું સર્ક્યુલેશન સર્જાયું છે, જેના કારણે ગુજરાતમાં ભારે વરસાદની આગાહી કરવામાં આવી છે. ઉત્તર, મધ્ય, દક્ષિણ ગુજરાત અને સૌરાષ્ટ્રમાં પણ આગામી 3 દિવસ ભારે વરસાદ પડવાની આગાહી કરી છે.