રાજ્યમાં છેલ્લા 24 કલાકથી વરસાદી માહોલ જોવા મળી રહ્યો છે. ગઇકાલે સૌરાષ્ટ્રમાં ભારે વરસાદના પગલે પોરબંદર, દ્વારકામાં વિકટ પરિસ્થિતિ જોવા મળી હતી. જો કે વરસાદની આગાહી વચ્ચે અરવલ્લીના ભીલોડા તાલુકામાં આભ ફાટ્યું છે. વરસાદે તોફાની બેટિંગ કરતાં એક જ રાતમાં સાત ઇંચ વરસાદ વરસતાં વિસ્તારમાં જળબંબાકારની સ્થિતિ જોવા મળી છે.
શામળાજી પાસે ચેકડેમ પર ઘોડાપુરથી રસ્તો કરાયો બંધ
શામળાજી-ભિલોડા હાઇવે પર પાણી ફરી વળ્યાં
ભિલોડાની અનેક સોસાયટીઓમાં પાણી ભરાયા
એક રાતમાં સાત ઇંચ વરસાદથી જળબંબાકર
રાજયમાં પડી રહેલા અવિરત વરસાદના પગલે અરવલ્લી જિલ્લાના ભીલોડા તાલુકામાં આભ ફાટ્યું છે. જેમાં એક રાતમાં જ સાત ઇંચ જેટલો વરસાદ પડતા ચારેય બાજુ પાણી પાણી થઇ ગયું છે. જેને લઇને નીચાણવાળા વિસ્તારો પાણીમાં ગરકાવ જોવા મળી રહ્યાં છે.
ભિલોડા તાલુકાની બુઢેલી હાથમતી નદી તોફાની બની
અરવલ્લીના ભીલોડા તાલુકામાં વરસાદનો કહેર જોવા મળી રહ્યો છે. જેમાં ભારે વરસાદના કારણે બુઢેલી અને હાથમતી નદીઓ તોફાની બની રહી છે. ધોલવાણી તળાવ પણ ઓવર ફ્લો થઇ ગયું છે. ખેતરો અને રોડ રસ્તા પર પાણી ફરી વળ્યાં છે. શામળાજી-ભિલોડા હાઇવે પર પાણી ભરાઇ ગયા છે. ભારે વરસાદના કારણે ભિલોડાની અનેક સાસોયટીઓમાં પાણી ભરાઇ ગયા છે.
અરવલ્લીના શામળાજીમાં ધોધમાર વરસાદ
અરવલ્લી જિલ્લામાં ધોધમાર વરસાદ વરસી રહ્યો છે. આમ ભારે વરસાદના કારણે મેશ્વો નદીમાં આવેલ ઘોડાપુરના કારણે ભયજનક સપાટી વટાવી છે. જેને લઇને શામળાજી પાસે ચેકડેમ પર ઘોડાપુરથી રસ્તો બંધ કરી દેવામાં આવ્યો છે. ગોખરવા-મહાદેવગ્રામ કોઝવે પર પાણીથી 10 ગામ સંપર્ક વિહોણા બન્યા છે. વાંદીયોલ પાસે કોઝવે પર પાણી ફરી વળ્યાં છે. મેશ્વો નદી કિનારાના અનેક કોઝવે પાણીમાં ગરકાવ થઇ ગયા છે.