રાજ્યના કેટલાક વિસ્તારોમાં 5 દિવસના વિરામ બાદ ફરી ભારે વરસાદ ખાબક્યો છે. જેના કારણે કેટલાક વિસ્તારોમાં પુર જેવી સ્થિતિ સર્જાઇ છે. સૌરાષ્ટ્રમાં આજે ત્રીજા દિવસે પણ વીજળીના કડાકા ભડાકા સાથે વરસાદ વરસ્યો હતો. તો બનાસકાંઠા જિલ્લામાં ભારે વરસાદના કારણે પુરની સ્થિતિ સર્જાઇ છે. શહેરના કેટલાક વિસ્તારોમાં પાણી ભરાયા છે. જેને લઇને જનજીવન અસ્તવ્યસ્ત થઇ ગયું છે. તો ખેડૂતો પણ ચિંતામાં મુકાયા છે. ત્યારે જાણો રાજ્યના કયા કયા વિસ્તારોમાં આજે વરસાદ વરસ્યો હતો.
સૌરાષ્ટ્રના અમરેલી-ખાંભા ગીરપંથકમાં મેઘતાંડવ
બનાસકાંઠામાં ભારે વરસાદના પગલે પુર જેવી સ્થિતિ
ખાંભાના ગોરાણા ગામની વાડી વિસ્તારમાં વીજળી પડતા 1 ખેડૂતનું મોત
સૌરાષ્ટ્ર અને ઉત્તર ગુજરાતના વિસ્તારોમાં ભારે વરસાદના પગલે જગતનો તાત મુશ્કેલીમાં મુકાયો છે. ભારે વરસાદથી ગીર ગઢડા તાલુકાના 6 ગામો સંપર્ક વિહોણા બન્યા છે. તો ગીર અને બનાસકાંઠા પંથકમાં વરસાદના પગલે નદી-નાળા છલકાયા છે. ભારે વરસાદથી ખેતરો પાણી પાણી થયા છે. જ્યારે કપાસ, મગફળી સહિતના પાકોને નુકસાન થવાની શક્યતાઓ પૂરેપુરી છે. પાક નિષ્ફળ જવાના ડરથી ખેડૂતો ચિંતિત બન્યા છે.
બનાસકાંઠામાં પુરની સ્થિત સર્જાઇ
બનાસકાંઠામાં ધોધમાર વરસાદના પગલે આસપાસના વિસ્તારમાં પુરની સ્થિતિ સર્જાઇ છે. અંબાજી વિસ્તારમાં સર્વત્ર પાણી-પાણી થયું છે. અંબાજીના રસ્તાઓ પર વરસાદી પાણી ફરી વળ્યા છે. પાણી ભરાવવાના કારણે લોકોને ભારે મુશ્કેલીનો સામનો કરવો પડી રહ્યો છે. તો દાંતા અને હડાદ વિસ્તારોમાં પણ વરસાદ પડ્યો હતો. પાંચ દિવસના વિરામ બાદ સાબરકાંઠા જિલ્લામાં પણ વરસાદ પડ્યો હતો. વધુ વરસાદ પડે તો મગફળી, કપાસ, અડદના પાક નુકસાન થવાની ભીતિ છે. મહેસાણા જિલ્લામાં પણ વરસાદ પડ્યો હતો.
સૌરાષ્ટ્રના અમરેલી-ખાંભા ગીરપંથકમાં ધોધમાર વરસાદ
અમરેલીમાં ખાંભાના ગ્રામીણ વિસ્તાર પચપચીયા, ધૂંધવાણા, બોરાળા, ચકરાવા, હનુમાનપુર અને કંટાળામાં વરસાદ પડ્યો હતો. ખાંભા ગીરના ઘૂંઘવાણામાં ધોધમાર વરસાદ પડતા માલણ નદીમાં પુર આવ્યું છે. ધૂંધવાણાની માલણ નદી બે કાંઠે થઈ છે. તો ગીરગઢડા સીટી, તુલસીશ્યામ, ખીલાવડ, ધોકડવા, નગડીયા, જસાધાર, બેડીયા, મોતીસર, ચીખલકુબા અને ગીરના આસપાસમાં વરસાદ પડ્યો હતો. ગીર પંથકમાં વરસાદથી નદીઓ વહેતી થઇ છે. બીજી તરફ રાજુલાના ધારેશ્વર, વાવેરા, માંડરડી, આગરીયા સહિતના ગામોમાં વરસાદ વરસ્યો હતો. ગીરગઢડા પંથકમાં આજે 2થી 3 ઈંચ વરસાદ ખાબક્યો છે. ગીર ગઢડાના જુડવડલી ગામે 3 ઈંચ, ધોકડવામાં 2 ઈંચ વરસાદ વરસ્યો હતો. આથી નદીઓમાં ઘોડાપૂર આવ્યું હતું.
ખાંભાના ગોરાણા ગામ ખેતીકામ કરતા ખેડૂતો પર વીજળી પડતા 1નું મોત
રાજુલામાં વીજળી પડી હતી. વીજળીના કડાકા ભડાકાથી લોકોમાં પણ ભયનો માહોલ જોવા મળ્યો હતો. ખાંભાના ગોરાણા ગામની વાડીમાં ખેતી કામ કરતા ત્રણ ખેડૂત પર વીજળી પડી હતી. જેમાં એકનું ઘટનાસ્થળે જ મોત નીપજ્યું હતું અને બે ખેડૂતોને ઈજા પહોંચતા સારવાર માટે રાજુલા હોસ્પિટલે ખસેડવામાં આવ્યા છે. મૃતક ખેડૂતનું નામ બાબુભાઈ હમીરભાઈ રામ (ઉં.વ.30) હોવાનું જાણવા મળ્યું છે.
મોડાસાના ટીંટોઈ અને આસપાસના વિસ્તારમાં ભારે વરસાદ વરસતા ટીંટોઈ બજારના રસ્તાઓ પર પાણી ભરાયા હતા. પાટણ જિલ્લાના સિદ્ધપુર અને આસપાસના વિસ્તારમાં પવન સાથે વરસાદ પડ્યો હતો.
ગાંધીનગર શહેરમાં બપોરના સમયે વરસાદનું આગમન થયું હતું. વરસાદી ઝાપટાથી ગરમીથી આંશિક રાહત થઇ છે. તો ભરૂચ શહેર અને જિલ્લાના ગ્રામ્ય વિસ્તારોમાં ગાજવીજ સાથે વરસાદ ખાબક્યો હતો.