ગુજરાતમાં વરસાદની સારી શરૂઆત થઈ ગઈ છે. અમદાવાદમાં સરેરાશ બે ઈંચ જેટલો વરસાદ વરસી ગયો છે. ત્યારે હવામાન વિભાગનું માનીએ તો આગામી 24 કલાકમાં ગુજરાતમાં ચોમાસું સક્રીય થઈ જશે. રાજ્યમાં અપર એર સાયક્લોનિક સર્ક્યુલેશન સિસ્ટમ સક્રિય થઈ ગઈ છે અને આગામી બે દિવસ સુધી દક્ષિણ ગુજરાતમાં ભારે વરસાદ પડી શકે છે.
હવામાનના જણાવ્યા અનુસાર, દક્ષિણ ગુજરાતમાં વલસાડ, નવસારી, તાપી અને ડાંગમાં ભારે વરસાદ થઈ શકે છે. સાથે જ સૌરાષ્ટ્ર, ગીર-સોમનાથ, અમરેલી અને ભાવનગરમાં પણ વરસાદ થઈ શકે છે. જ્યારે અમદાવાદમાં પણ પવન સાથે સારો વરસાદ થાય તેવી હવામાન વિભાગે શક્યતા વ્યક્ત કરી છે. રાજ્યમાં વરસાદની જો વાત કરીએ તો સિઝનનો 6 ટકા વરસાદ ગુજરાતમાં વરસી ચૂક્યો છે.
મોડી રાત્રે અમદાવાદમાં મૂશળધાર વરસાદ:
અમદાવાદમાં ચોમાસાનો પ્રથમ વરસાદ પડ્યો છે. અમદાવાદમાં મોડી રાતથી જ ભારે પવનના સુસવાટા વચ્ચે મૂશળધાર વરસાદ વરસ્યો છે. અમદાવાદના પશ્ચિમ વિસ્તારની વાત કરીએ તો સેટેલાઈ, વેજલપુર, શિવરંજની, ગોતા, ચાંદલોડિયા, ઘાટલોડિયા, બોપલ, શીલજ, થલતેજમાં મોડી રાતથી જ ભારે વરસાદ જોવા મળ્યો. જ્યારે પૂર્વ વિસ્તારની વાત કરીએ તો કાળુપુર, દરિયાપુર, સરખેજ, બાપુનગર,ઈસનપુર, મણીનગર વગેરે વિસ્તારમાં પણ પવનના સુસવાટા વચ્ચે ભારે વરસાદ નોંધાયો છે.
અરવલ્લીમાં વીજળીના કડાકા ભડાકા સાથે ભારે વરસાદ:
અરવલ્લીમાં પણ મોડી રાતે ભારે વરસાદ નોંધાયો છે. અરવલ્લીમાં વીજળીના કડાકા ભડાકા સાથે વરસાદનું આગમન થયું છે. બાયડ અને મોડાસાની વાત કરવામાં આવે તો મોડાસા અને બાયડમાં દોઢ ઈંચ વરસાદ નોંધાયો છે. મેઘરજ, માલપુરમાં અડધો ઈંચ વરસાદ નોંધાયો છે. જ્યારે ભીલોડામાં 9 મીલીમીટર અને ધનસુરામાં 2 મીલીમીટર વરસાદ નોંધાયો છે. ઉલ્લેખનીય છે કે, ભારે વરસાદ બાદ છેલ્લા કેટલાય દિવસથી પડી રહેલી કાળઝાળ ગરમીથી લોકોને આંશિક રાહત મળી છે.
સાબરકાંઠામાં પણ ભારે પવન સાથે વરસાદ:
રાજ્યમાં વિધીવત રીતે વરસાદની શરૂઆત થઈ છે. ત્યારે સાબરકાંઠાના હિંમતનગર અને વિજયનગર તાલુકામાં પણ ભારે વરસાદ જોવા મળ્યો છે. વિજયનગરમાં ભારે પવન સાથે વરસાદ પડતા લોકોને ગરમીથી આંશિક રાહત પણ મળી છે. ભારે વરસાદ બાદ લોકોમાં પણ ખુશીનો માહોલ જોવા મળી રહ્યો છે અને જગતના તાતમાં પણ ખુશી જોવા મળી રહી છે.
બનાસકાંઠાના અનેક તાલુકાઓમાં વરસાદ:
તો આ બાજુ બનાસકાંઠાના અનેક તાલુકાઓમાં વરસાદી ઝાપટા પડ્યા છે. લાખણી, દિયોદર, ભાભર, થરાદ સહિતના વિસ્તારમાં વરસાદી ઝાપટા પડ્યા છે. તો ગાજવીજ સાથે વરસાદી ઝાપટાને કારણે વાતાવરણમાં ઠંડક પ્રસરી છે.
ભરૂચમાં જિલ્લામાં ધીમી ધારે વરસાદનુ આગમન:
ગુજરાતમાં ચોમાસાની સરૂઆત થયાની સાથે જ રાજયના તમામ જિલ્લામાં વરસાદનું આગમન થયું છે. ત્યારે આજે સવારથી જ ભરૂચમાં ધીમી ધારે વરસાદની શરૂઆત થઈ છે. કાળા ડીબાંગ વાદળો વચ્ચે ઝરમર વરસાદનું આગમન થયું છે. વરસાદને પગલે વાતાવરણમાં ઠંડક પ્રસરતા લોકોને ગરમીથી રાહત મળી છે. તો બીજી બાજુ વારસાદને લઈને ધરતી પુત્રોમાં ખુશીની લહેર જોવા મળી રહી છે.
નવસારીમાં વરસાદનું આગમન:
નવસારીમાં વરસાદનું આગમન થયુ છે. વહેલી સવારથી ધોધમાર વરસાદ આવતા પાણી ભરાયા છે. શહેરના અનેક વિસ્તારોમાં ધોધમાર વરસાદ આવતા લોકોને પરેશાનીનો સામનો કરવાનો વારો આવ્યો છે.