ચોમાસુ / રાજ્યમાં મોડી રાત્રે ગાજવીજ સાથે મેઘરાજાની ધમાકેદાર એન્ટ્રી

મોડી રાત્રે અમદાવાદમાં મૂશળધાર વરસાદ:

અમદાવાદમાં ચોમાસાનો પ્રથમ વરસાદ પડ્યો છે. અમદાવાદમાં મોડી રાતથી જ ભારે પવનના સુસવાટા વચ્ચે મૂશળધાર વરસાદ વરસ્યો છે. અમદાવાદના પશ્ચિમ વિસ્તારની વાત કરીએ તો સેટેલાઈ, વેજલપુર, શિવરંજની, ગોતા, ચાંદલોડિયા, ઘાટલોડિયા, બોપલ, શીલજ, થલતેજમાં મોડી રાતથી જ ભારે વરસાદ જોવા મળ્યો. જ્યારે પૂર્વ વિસ્તારની વાત કરીએ તો કાળુપુર, દરિયાપુર, સરખેજ, બાપુનગર,ઈસનપુર, મણીનગર વગેરે વિસ્તારમાં પણ પવનના સુસવાટા વચ્ચે ભારે વરસાદ નોંધાયો છે. 

- અમદાવાદ શહેરના કયા વિસ્તારમાં કેટલો વરસાદ:

• ઓઢવમાં 2.5 ઈંચ વરસાદ
• વિરાટનગરમાં 1.5 ઈંચ વરસાદ
• ઉસ્માનપુરમાં 1.5 ઈંચ વરસાદ
• ચાંદખેડામાં 1 ઈંચ વરસાદ
• રાણીપમાં સવા ઈંચ વરસાદ
• બોડકદેવમાં 1.5 ઈંચ વરસાદ
• ગોતામાં 1.5 ઈંચ વરસાદ
• સરખેજમાં 1.5 ઈંચ વરસાદ
• દુધેશ્વરમાં 1.5 ઈંચ
• મેમ્કો વિસ્તારમાં 1.5 ઈંચ વરસાદ
• નરોડામા 1 ઈંચ
• કોતરપુર વિસ્તારમાં 1 ઈંચ વરસાદ
• મણીનગરમાં પોણા બે ઈંચ વરસાદ
• વટવામાં 2 ઈંચ વરસાદ

અરવલ્લીમાં વીજળીના કડાકા ભડાકા સાથે ભારે વરસાદ:

અરવલ્લીમાં પણ મોડી રાતે ભારે વરસાદ નોંધાયો છે. અરવલ્લીમાં વીજળીના કડાકા ભડાકા સાથે વરસાદનું આગમન થયું છે. બાયડ અને મોડાસાની વાત કરવામાં આવે તો મોડાસા અને બાયડમાં દોઢ ઈંચ વરસાદ નોંધાયો છે. મેઘરજ, માલપુરમાં અડધો ઈંચ વરસાદ નોંધાયો છે. જ્યારે ભીલોડામાં 9 મીલીમીટર અને ધનસુરામાં 2 મીલીમીટર વરસાદ નોંધાયો છે. ઉલ્લેખનીય છે કે, ભારે વરસાદ બાદ છેલ્લા કેટલાય દિવસથી પડી રહેલી કાળઝાળ ગરમીથી લોકોને આંશિક રાહત મળી છે.

સાબરકાંઠામાં પણ ભારે પવન સાથે વરસાદ:

રાજ્યમાં વિધીવત રીતે વરસાદની શરૂઆત થઈ છે. ત્યારે સાબરકાંઠાના હિંમતનગર અને વિજયનગર તાલુકામાં પણ ભારે વરસાદ જોવા મળ્યો છે. વિજયનગરમાં ભારે પવન સાથે વરસાદ પડતા લોકોને ગરમીથી આંશિક રાહત પણ મળી છે. ભારે વરસાદ બાદ લોકોમાં પણ ખુશીનો માહોલ જોવા મળી રહ્યો છે અને જગતના તાતમાં પણ ખુશી જોવા મળી રહી છે.

બનાસકાંઠાના અનેક તાલુકાઓમાં વરસાદ:

તો આ બાજુ બનાસકાંઠાના અનેક તાલુકાઓમાં વરસાદી ઝાપટા પડ્યા છે. લાખણી, દિયોદર, ભાભર, થરાદ સહિતના વિસ્તારમાં વરસાદી ઝાપટા પડ્યા છે. તો ગાજવીજ સાથે વરસાદી ઝાપટાને કારણે વાતાવરણમાં ઠંડક પ્રસરી છે.

વરસાદને લઇ હવામાન વિભાગની આગાહી:

ગુજરાતમાં વરસાદી માહોલ જામ્યો છે. ત્યારે હવામાન વિભાગે આગાહી કરી છે કે, રાજ્યમાં ભારે વરસાદ પડી શકે છે. હવામાન વિભાગની આગાહી મુજબ આજે દાહોદ, પંચમહાલ, છોટા ઉદેપુરમાં ભારે વરસાદ પડી શકે છે. આ સિવાય મહિસાગર, ખેડા, આણંદમાં પણ વરસાદની આગાહી છે. જ્યારે અમદાવાદ, ગાંધીનગર, રાજકોટમાં પણ ભારે વરસાદ પડે તેવી આગાહી  હવામાન વિભાગે કરી છે. આ ઉપરાંત ગીર સોમનાથ, સુરેન્દ્રનગર, અમરેલીમાં પણ ભારે વરસાદ પડે તેવી આગાહી છે. ઉલ્લેખનીય છે કે, મોડી રાતથી રાજ્યના અમદાવાદ, અરવલ્લી, સાબરકાંઠા વગેરેમાં વરસાદ જોવા મળી રહ્યો છે.