હવામાન / આગામી 5 દિવસ રાજ્યમાં ભારે વરસાદની આગાહી, NDRFની ટીમ તહેનાત 

આ ઉપરાંત માછીમારોને પણ દરિયો ન ખેડવા સૂચના આપવામાં આવી છે. ઓડિશા, ઝારખંડ પર બનેલા લો પ્રેશરના કારણે વરસાદી સિસ્ટમ સક્રીય થઇ છે. સાથે જ ઉત્તર પ્રદેશ પર અપર એર સાયક્લોનિક સિસ્ટમ આગળ વધીને મધ્ય પ્રદેશ તરફ જઇ રહી છે જેની સીધી અસર ગુજરાતમાં થઇ છે. જેથી આજે મહેસાણા, અરવલ્લી, મોરબી, જામનગર, સુરેન્દ્રનગર, અમદાવાદ, ગાંધીનગર સહિતમાં ભારે વરસાદની આગાહી કરવામાં આવી છે.

જ્યારે ભારે વરસાદની આગાહીને લઇ રાજકોટ તંત્ર પણ એલર્ટ પર છે. હાલ રાજકોટમાં 3 જેટલી NDRFની ટીમ ખડેપગે રખાઇ છે. ઉપરાંત પૂર આવે તો CCTV કેમેરાથી બાજ નજર રાખાશે અને નીચાણવાળા વિસ્તારમાં પણ પાણી ભરાવાની સ્થિતિને લઇ દેખરેખ રખાશે.

તો અરવલ્લી જિલ્લામાં ધીમીધારે વરસાદનું આગમન થયું છે. મેઘરજ, મોટી મોયડી, લીંભોઇ, અદાપુર ગામમાં વરસાદ પડી રહ્યો છે. જ્યારે તાપી જિલ્લામાં સર્વત્ર વરસાદ નોંધાયો છે. વ્યારા, વાલોડ, સોનગઢ અને નિઝરમાં એક ઇંચ વરસાદ નોંધાયો છે. જ્યારે કુકરમુંડા, ડોલવણ અને ઉચ્છલમાં પણ વરસાદ પડ્યો છે. ઉપરવાસમાં વરસાદને કારણે ઉકાઇ ડેમમાં પાણીની આવક થઇ છે. ડેમમાં પાણીની આવક 8742 ક્યુસેક અને જાવક 600 ક્યુસેક થઇ છે. ઉકાઈ ડેમની હાલની સપાટી 280.64 ફૂટ નોંધાઈ છે.