રવિવારે અમદાવાદમાં અનરાધાર વરસાદ બાદ હવે સુરતમાં પણ ભારે વરસાદની આગાહી કરવામાં આવી છે.
સુરતમાં આજે અને આવતીકાલે ભારે વરસાદની આગાહી
સુરતમાં બે દિવસ ઓરેન્જ અલર્ટ અપાયું
13 થી 15 જુલાઈએ સુરતમાં અતિભારે વરસાદની શકયતા
13 થી 15 જુલાઈએ સુરતમાં રેડ અલર્ટ અપાયું
ગુજરાતમાં મેઘરાજાએ તોફાની બેટિંગ શરૂ કરી છે, દક્ષિણ ગુજરાત અને સૌરાષ્ટ્રમાં ભારે વરસાદ બાદ રવિવારે આખું અમદાવાદમાં જળબંબોળ થઈ ગયું છે ત્યારે હવે સુરતમાં પણ ભારે વરસાદને લઈને ઓરેન્જ અને રેડ અલર્ટ આપવામાં આવ્યું છે.
હવામાન ખાતા દ્વારા સુરત જિલ્લામાં તા. 11 થી 12 ભારેથી અતિ ભારે વરસાદ (ઓરેન્જ એલર્ટ) તથા તા. 13 થી 15 ખુબજ ભારે વરસાદ (રેડ એલર્ટ) ની આગાહી કરવામા આવેલ છે. જેથી તમામ નાગરિકો સતર્કતા રાખે તથા બિનજરૂરી પ્રવાસ ટાળે. @CMOGuj@pkumariaspic.twitter.com/AOrXJtgBhJ
સુરતમાં પડશે ભારે વરસાદ
સુરત જિલ્લામાં 11 અને 12 જુલાઇના રોજ ભારે વરસાદ પડી શકે છે, જેના પગલે ઓરેન્જ અલર્ટ આપવામાં આવ્યું છે, જ્યારે 13થી 15 જુલાઇ સુધી સુરતમાં અતિભારે વરસાદની આગાહી કરવામાં આવી છે. અતિભારે વરસાદને લઈને રેડ અલર્ટ આપવામાં આવ્યું છે ત્યારે તંત્ર દ્વારા લોકોને જરૂરી ન હોય તો ઘરમાં જ રહેવા માટે અપીલ કરી છે.
કેટલા લોકોનું કરાયું સ્થળાંતર
છોટાઉદેપુરમાં ૪૦૦, નવસારીમાં ૫૫૦ અને વલસાડમાં ૪૭૦ સહિત રાજ્યમાં ૩,૨૫૦ જેટલાં નાગરિકોનું સલામત સ્થળે સ્થળાંતર કરવામાં આવેલું છે. મુખ્યમંત્રીએ આગામી બે દિવસ ગુજરાતમાં હજુ વ્યાપક વરસાદની હવામાન વિભાગે વ્યક્ત કરેલી આગાહીને પગલે આ જિલ્લા કલેકટરોને તાકીદ કરી હતી કે, જરૂર જણાયે હજુ વધુ લોકોનું સલામત સ્થળે સ્થળાંતર કરવાની વ્યવસ્થાઓ માટે તેઓ સજ્જ રહે. એટલું જ નહીં, પોલીસ દળની મદદ લઈને પણ લોકોનું સ્થળાંતર થાય, વરસાદને પગલે કોઈ જાનહાની ન થાય અને ઓછામાં ઓછું નુકસાન થાય તે જોવા તેમણે ખાસ તાકીદ કરી હતી.
ડાંગ જિલ્લામાં જળ બંબાકારની પરિસ્થિતિ સર્જાઈ
ડાંગ જિલ્લામાં બારેમેઘ ખાંગા થતા લોકમાતાઓ રોદ્ર સ્વરૂપ ધારણ કરી વહેતી થઇ હતી. તેના કેચમેન્ટ વિસ્તારોમાં આવતા કોઝવે પર પુરના ધસમસતા પ્રવાહ ફરી વળતા અનેક ગામડાઓ દિવસભર જિલ્લા મથકેથી સંપર્ક વિહોણા બન્યા હતા. ડાંગ જિલ્લામા શનિવારે સાંજે ૪ વાગ્યાથી રવિવારે સાંજે ૪ વાગે પુરા થતા 24 કલાકમાં આહવા ૧૨.૬ ઇંચ, વઘઇ ૧૨.૬ ઇંચ, સુબીર ૮.૩ ઇંચ અને સાપુતારા ૭.૪ ઇંચ વરસાદ પડ્યો હતો. આ તોફાની વરસાદને પગલે ધવલીદોડ ગામે એક મહિલાનું પૂરના પાણીમાં તણાય જવાથી મોત નીપજ્યું હતું. બીજી તરફ ગાય ઉપર શેડ પડવાથી મૃત્યુ થયું હતું. ડાંગ જિલ્લામાં છેલ્લા ત્રણ દિવસથી અવરીત વરસી રહેલા મેઘરાજા એ સમગ્ર ડાંગ જિલ્લામાં જળ બંબાકારની પરિસ્થિતિ સર્જાઈ હતી.