બરસો રે મેઘા મેઘા / આજે ગુજરાતના આ જિલ્લાઓમાં પડશે અતિભારે વરસાદ, જાણો હવામાન વિભાગની આગાહી

• ગુજરાતમાં વરસાદને લઇને હવામાન વિભાગની આગાહી
• મોટા ભાગે સૌરાષ્ટ્ર અને કચ્છમાં પડી શકે છે સારો વરસાદ
• સૌરાષ્ટ્રમાં અનેક જિલ્લામાં આજે સારા એવા વરસાદની શક્યતા

રાજ્ય (Gujarat) માં આજે ફરીવાર વરસાદને લઇને હવામાન વિભાગે આગાહી કરી છે. હવામાન વિભાગે આગાહી વ્યક્ત કરતા જણાવ્યું કે, આજે રાજ્યના કેટલાંક જિલ્લાઓમાં વરસાદ પડી શકે છે. આજે સૌરાષ્ટ્ર અને કચ્છમાં અતિ ભારે વરસાદ વરસી શકે છે. તો રાજ્યમાં અન્ય જિલ્લાઓની જો વાત કરીએ તો રાજ્યમાં આજે કચ્છ, દ્વારકા, મોરબી, રાજકોટ અને સુરેન્દ્રનગરમાં પણ સારો એવો વરસાદ વરસી શકે છે. એ સિવાય પોરબંદર, જૂનાગઢ, જામનગર, અમરેલી અને ગીર-સોમનાથમાં પણ વરસાદ થઈ શકે છે. બીજી બાજુ ભાવનગર અને બોટાદમાં પણ સામાન્ય વરસાદની શક્યતા રહેલી છે.

ગઇકાલે એક જ દિવસમાં 140 તાલુકામાં વરસાદ પડ્યો હતો

ઉલ્લેખનીય છે કે, ગઇકાલે રાજ્યમાં એક જ દિવસમાં 140 તાલુકામાં વરસાદ વરસ્યો હતો. પંચમહાલના જાંબુઘોડામાં દોઢ ઇંચ જેટલો વરસાદ વરસ્યો હતો. ડભોઈ, સંખેડામાં પણ એક થી સવા ઈંચ વરસાદ વરસ્યો.  મહુવા, વઘઈ, વાલોદ, મહેસાણામાં એક ઈંચ જેટલો વરસાદ વરસ્યો.  બોડેલી, બારડોલી, ડેડિયાપાડા, ગણદેવીમાં પણ અડધા ઈંચ જેટલો વરસાદ વરસ્યો. 

ગઇકાલે રાજ્યમાં સિઝનનો 97.53 ટકા વરસાદ વરસ્યો હતો

ગઇકાલે રાજ્યમાં સિઝનનો 97.53 ટકા વરસાદ વરસ્યો હતો. જેમાં 56 તાલુકામાં 40 ઈંચથી વધુ વરસાદ વરસ્યો હતો. જ્યારે 126 તાલુકામાં 20થી 40 ઈંચ જેટલો વરસાદ ખાબક્યો હતો. એ સિવાય 68 તાલુકામાં 10થી 20 ઈંચ વરસાદ વરસ્યો હતો. માત્ર 1 જ તાલુકામાં 5થી 10 ઈંચ વરસાદ વરસ્યો હતો. એ સિવાય કચ્છ જિલ્લામાં સૌથી વધુ 151 ટકા જેટલો વરસાદ ખાબક્યો હતો. જ્યારે વલસાડ, નવસારી, પોરબંદર અને ગીર-સોમનાથમાં 100 ટકાથી વધુ વરસાદ પડ્યો હતો. તો બીજી બાજુ જૂનાગઢ, છોટાઉદેપુર, સાબરકાંઠા અને બનાસકાંઠામાં પણ વ્યાપક વરસાદ વરસ્યો હતો.