રાજ્યના હવામાન વિભાગે બંગાળની ખાડીમાં લો પ્રેશર સર્જાતા આગામી 48 કલાકમાં ભારેથી અતિ ભારે વરસાદની આગાહી કરી છે. બંગાળની ખાડીમાં સર્જાયેલા લો પ્રેશરને કારણે વરસાદી સિસ્ટમ સક્રિય બની છે. જેને લઈને સૌરાષ્ટ્રમાં વરસાદ ખાબક્યો હતો. હજુ બે દિવસ ભારે વરસાદની આગાહી કરાઈ છે.
અમરેલી જિલ્લા અધિક કલેક્ટરે અધિકારીઓને કર્યા આદેશ
હવામાન વિભાગની ભારે વરસાદની આગાહીને પગલે તંત્રએ અલર્ટ જાહેર કર્યું છે. અમરેલી જિલ્લા અધિક કલેક્ટરે અધિકારીઓને આદેશ કર્યા છે. 24 કલાક ભારે વરસાદની આગાહીને પગલે આદેશ કર્યા છે. પ્રાંત અધિકારીઓ અને મામલતદારોને હેડ ક્વાર્ટર ન છોડવા આદેશ કર્યા છે.
સત્તાવાર ચોમાસાના આગમન સાથે તંત્ર એલર્ટ
3 જુલાઈ સુધી ગુજરાતમાં ભારે વરસાદ પડે તેવી ભીતિ સેવાઈ રહી છે. રાજ્યમાં સત્તાવાર ચોમાસાના આગમન સાથે તંત્ર એલર્ટ થઇ ગયું છે. ગુજરાતમાં ફરીથી સાઇક્લોનિક સર્ક્યુલેશન સક્રિય થતાં આગામી 48 કલાકમાં દક્ષિણ ગુજરાત, મધ્ય ગુજરાત અને સૌરાષ્ટ્રમાં ભારેથી અતિભારે વરસાદ પડવાની આગાહી કરાઈ છે.
NDRFની 15 ટીમ સ્ટેન્ડ બાય
જેને પગલે પ્રિ-પોઝીશનિંગ અંતર્ગત NDRFની 15 ટીમ સ્ટેન્ડ બાય રાખવામાં આવી છે. જ્યારે અમદાવાદ શહેરમાં પણ સામાન્યથી મધ્યમ વરસાદ પડવાની આગાહી કરાઈ છે. હાલ મધ્ય અને દક્ષિણ ગુજરાતના વલસાડ, નવસારી, દાદરાનગર હવેલી, ડાંગ, તાપી, સુરત, નર્મદા, વડોદરા, આણંદ, ખેડા, પંચમહાલ, છોટાઉદેપુરમાં વરસાદ પડ્યો હતો. અમૂક જગ્યાએ સારો વરસાદ પડ્યો હતો.
અંકલેશ્વરમાં 7 ઇંચ જેટલો વરસાદ ખાબક્યો
28 જૂનના રોજ અંકલેશ્વર પથંકમાં 7 ઇંચ જેટલો વરસાદ ખાબક્યો છે. આ સિવાય ગીરગઢડા અને અમરેલીના વિવિધ વિસ્તારોમાં એકથી ત્રણ ઈંચ જેટલો વરસાદ પડ્યો છે. આ ઉપરાંત અમદાવાદના અનેક સ્થળ પર વરસાદ પડતા અનેક સ્થળે ટ્રાફિકની સમસ્યા સર્જાઈ છે.
ભાવનગરમાં 7 વાગ્યા બાદ ધોધમાર વરસાદ શરૂ થયો
ભાવનગર અને શિહોરમાં મોડી સાંજે 7 વાગ્યા બાદ ધોધમાર વરસાદ શરૂ થઇ ગયો છે. શિહોર, પાલીતાણામાં પણ ભારે વરસાદ વરસ્યો. ભારે વરસાદથી મોટાભાગના વિસ્તારોમાં વીજળી ગુલ થઇ ગઇ છે. વરસાદના પગલે જાહેર રસ્તાઓ પર પાણી ફરી વળ્યા છે.