પ્રકોપ / કોરોના બાદ હવે સુરતમાં 'મેઘકહેર' : રસ્તાઓ જાણે નદી બની ગયા, રેસ્ક્યુ કામગીરી શરુ

• પર્વતપાટિયા વિસ્તારમાં 200 લોકોનું રેસ્ક્યુ 
• કિમ નદીનાં જળસ્તરમાં સતત વધારો 
• લોકોના ઘરોમાં પાણી ઘુસી જતા મુશ્કેલી 

લોકોનું રેસ્ક્યુ 

સુરતમાં મેઘપ્રકોપના કારણે આખા જિલ્લામાં તારાજી સર્જી છે. સુરતના પર્વત પાટિયા વિસ્તાર પાણીમાં ગરકાવ થઇ ગયો છે. સોસાયટીનાં ઘરોમાં પાણી ઘુસી જતા ત્યાંથી 200 જેટલા લોકોનું રેસ્ક્યુ કરવામાં આવ્યું છે. માધવબાગ સોસાયટીઓના લોકોના રેસ્ક્યુમાં ફાયર વિભાગની સાથે સાથે આરએસએસ પણ લોકોની મદદે આવ્યું છે. 

સુરતનું પર્વત પાટિયા વિસ્તારની સોસાયટીઓ પાણીમાં ગરકાવ, 200થી વધુ લોકોનું રેસ્ક્યુ કરવામાં આવ્યું. #GujaratRains #suratrains #Surat pic.twitter.com/OG4b52K5eV

— VTV Gujarati News and Beyond (@VtvGujarati) August 15, 2020

લિમ્બાયતમાં લોકોના ઘરોમાં પાણી 

સુરતમાં ભારે વરસાદથી સ્થિતિ વણસી રહી છે. સુરતના લિંબાયત વિસ્તારમાં ધોધમાર વરસાદથી સ્થિતિ ખૂબ ખરાબ થઇ રહી છે. ડુભલ સર્કલ પાસે સોસાયટીઓમાં પાણી ઘૂસી ગયા છે. લોકોના ઘરોમાં પાણી ભરાઇ જતા સ્થાનિકોને મુશ્કેલી પડી રહી છે.

NDRF તૈનાત 

સુરતમાં ભારે વરસાદના કારણે અનેક જગ્યાએ પાણી ભરાયા છે જેને લઇને NDRFની ટીમ વિસ્તારમાં ચિતાર મેળવવા નીકળી છે. NDRF ની ટીમ અસરતગ્રસ્ત ઓલપાડના કાઠોદરા ગામે પહોંચી છે. કોઈપણ પ્રકારની પરિસ્થિતિને પહોંચી વળવા તંત્ર સજ્જ છે ત્યારે કોરોના વચ્ચે પણ સાવચેતી સાથે અસરગ્રરસ્તોનું રેસ્ક્યૂ કરવામાં આવશે.  

કોસંબામાં પણ મેઘકહેર 

ભારે વરસાદથી કિમ નદીમાં પૂરની સ્થિતિ સર્જાઇ છે. નદીનું પાણી કઠોદરા ગામ વિસ્તારમાં સોસાયટીઓમાં ફરી વળ્યાં છે. કોસંબાની ત્રણ જેટલી સોસાયટીમાં પાણી ભરાયા છે. સોસાયટીઓમાં પાણી ભરાતા લોકોને ભારે હાલાકીનો સામનો કરવાનો વારો આવ્યો છે. 

ઉકાઈ ડેમ છલોછલ 

સુરતમાં સારા વરસાદના પગલે નદીઓ અને ડેમના જળસ્તરમાં પણ સતત વધારો થઇ રહ્યો છે.  ઉપરવાસમાં વરસાદથી ઉકાઇ ડેમમાં પાણીની આવક વધી છે. જળ સપાટીમાં વધારો થતાં ડેમના દરવાજા ખોલાયા છે. ઉકાઇ ડેમમાં હાલ 85042 ક્યુસેક પાણીની આવક થઇ છે. તો ડેમમાંથી હાલ 70524 ક્યુસેક પાણી છોડવામાં આવ્યું છે. ઉકાઇ ડેમની હાલની જળ સપાટી 332.61 ફૂટ સુધી પહોંચી છે. ડેમની ભયજનક સપાટી 345 ફૂટ છે.ઉકાઇમાંથી પાણી છોડાતા તાપી નદીનું સ્તર વધ્યું છે. તાપી નદી ઉપર આવેલો કોઝવે પર પાણી ફરી વળ્યા છે. 

કિમ નદી પણ તોફાની બની 

જિલ્લામાં પડેલા સારા વરસાદના પગલે કીમ નદીની જળ સપાટીમાં વધારો થયો છે. રાત્રી દરમ્યાન કીમ નદીમાં નવા નીરની આવક થતાં  જળ સપાટીમાં વધારો થયો છે. નદી ભયજનક સપાટીથી પોણો મીટર દુર છે. કીમ નદીનું હાલનુ લેવલ 12.17 મીટર છે. જ્યારે 13 મીટરે નદીની ભયજનક સપાટી છે. કીન નદીનું જળસ્તર વધતાં નીચાણવાળા વિસ્તારના લોકોને સાવચેત કરાયા છે. ઓલપાડ તાલુકાના કીમ ગામ ખાતે NDRF ટીમ તૌનાત કરાઇ છે.