રાજ્યમાં છેલ્લા એક બે દિવસથી ધોધમાર વરસાદ વરસી રહ્યો છે. સૌથી વધારે મેઘરાજા દક્ષિણ ગુજરાત પર મહેરબાન થયા છે. દક્ષિણ ગુજરાતનો એવો કોઈ જિલ્લો નથી જ્યાં બારે મેઘ ખાંગા ન થયા હોય. વરસાદ પણ એવો અનરાધાર કે તમામ જગ્યાએ પાણી પાણી કરી દીધું છે. નદીઓમાં ઘોડાપુર લાવી દીધું છે.
તો રહેણાંક વિસ્તારો, રોડ રસ્તા, બજારો સહિત તમામ જગ્યાઓ જાણે પાણીમાં સમાઈ ગઈ છે. મેઘરાજાએ હજુ પણ ખંમૈયા કરી નથી. તેઓ અવિરત વરસી રહ્યા છે. ત્યારે રાજ્યભરમાંથી મેઘરાજાના સામે આવેલા રોદ્ર રૂપના એવા 10 દ્રશ્યો જેને જોઈ તમે ચોંકી ઉઠશો. જુઓ વરસાદની 10 તસ્વીર...
મહત્વનું છે કે, વલસાડ જિલ્લામાં મેઘરાજા મન મુકીને વરસ્યા હતા. છેલ્લા 12 કલાકમાં અહી સરેરાશ 6 ઇંચ જેટલો વરસાદ ખાબક્યો હતો. વલસાડના જુદા જુદા તાલુકાઓની વાત કરાવામાં આવે તો વલસાડમાં 8 ઇંચ, વાપીમાં 9 ઇંચ વરસાદ પડ્યો હતો. તો પારડી, ધરમપુર અને કપરાડામાં 6 ઇંચ પડ્યો હતો. જ્યારે ઉમરગામમાં 3 ઇંચ જેટલો વરસાદ પડ્યો હતો. આમ સમગ્ર જિલ્લામાં સાર્વત્રિક વરસાદ પડ્યો હતો.
ભારે વરસાદ બાદ ડાંગમાં મનમોહક દ્રશ્યો સર્જાયા
ભારે વરસાદ બાદ ડાંગમાં મનમોહક દ્રશ્યો સર્જાયા હતા. જેને લઈને ડાંગના ગીરા ધોધમાં પણ લોકોની ભીડ જોવા મળી હતી. ઠંડા વાતાવરણમાં ગીરા ધોધ આકર્ષણનું કેન્દ્ર બન્યું અને ડાંગ જિલ્લામાં આવતા પ્રવાસીઓએ તેને નજારો માણ્યો. તો ભારે વરસાદથી ડાંગની સ્થાનિક નદીઓમા પૂર પણ આવ્યા હતા.
વલસાડના ધમડાચીમાં વૃક્ષ થયું ધરાશાયી
વલસાડમાં ફરીથી ધોધમાર વરસાદ શરૂ થયો છે. ફરીથી વરસાદનું આગમન થતા વલસાડના ધમડાચીમાં વૃક્ષ અને વીજપોલ ધરાશાયી થયા હતા. ભારે વરસાદથી વીજ પોલ પડી જતા વીજ પુરવઠો પણ ખોરવાયો હતો.