પશ્ચિમ કેન્યામાં સતત થઇ રહેલા વરસાદ, ત્યાર બાદ આવેલા પૂર અને ભૂસ્ખનની ઘટનામાં 34 લોકોના મોત નિપજ્યા છે. કેન્યામાં પડી રહેલો આ કમોસમી વરસાદ અણધાર્યો છે. વૈજ્ઞાનિકોના મતે આ ઘટના પાછળ ક્લાઈમેટ ચેન્જ જવાબદાર છે.
કેન્યામાં પૂર અને ભૂસ્ખલનની ઘટનામાં 34ના મોત
એક મહિનામાં થયા છે 72 લોકોના મોત, વરસાદ બંધ થવાનું નામ નથી લઇ રહ્યો
પશ્ચિમ કેન્યામાં સતત થઇ રહેલા વરસાદ, ત્યાર બાદ આવેલા પૂર અને ભૂસ્ખનની ઘટનામાં 34 લોકોના મોત નિપજ્યા છે. કેન્યાના ગૃહ મંત્રીએ આ વાતની પુષ્ટિ કરતા જણાવ્યું હતું કે પોકોટ સેન્ટ્રલ જિલ્લામાં ભૂસ્ખલનમાં 17 લોકોના મોત નિપજ્યા છે.
આ ઉપરાંત દક્ષિણ પોકોટના પરુઆ અને તપાચ ગામમાં ભૂસ્ખલનમાં 12 લોકોના મોત નિપજ્યા છે. પશ્ચિમ પોકોટના કમિશનરના મતે બે નદીઓમાં પૂર આવ્યું છે જેણે પરિસ્થિતિને કપરી બનાવી દીધી છે. કીટાલે અને લોડવારની વચ્ચે એક કાર પૂરમાં તણાઈ જતા મૃતાંકમાં 5નો વધારો નોંધાયો હતો.
પૂર્વ આફ્રિકામાં સામાન્ય દિવસો કરતા વધુ વરસાદ હોવાથી સ્થિતિ બેકાબુ બની છે. આ પૂરથી પૂર્વ આફ્રિકાના 10 લાખથી વધુ લોકો પ્રભાવિત થયા છે. કરોડોની સંપત્તિનું નુકશાન થયું છે. વરસાદના પગલે એક મહિનાથી અત્યાર સુધી 72 લોકોના મોત નિપજ્યા છે.
હવામાન વિભાગના વૈજ્ઞાનિકોએ અનુમાન લગાવ્યું છે કે સોમાલિયા, સુદાન અને કેન્યાના ઘણા વિસ્તારોમાં 4 થી 6 અઠવાડિયા હજી વધુ વરસાદ ખાબકી શકે છે. નવેમ્બર મહિનામાં આવેલા આ કમોસમી વરસાદથી લોકો પરેશાન થઇ ગયા છે. સામાન્ય દિવસોમાં આ મહિનામાં આટલો વરસાદ થતી નથી.
ઇન્ટરનેશનલ રેસ્કયુ કમિટીના કહેવા મુજબ આ ક્ષેત્રોમાં પહેલા દુકાળ પડ્યો હતો જેનાથી લોકો પ્રભાવિત થયા હતા. હવે સોમાલિયા, સુદાન, કેન્યામાં સામાન્યથી પણ વધારે વરસાદ પડ્યો છે. આ વર્ષે થયેલો વરસાદ આ વિસ્તારો માટે અસામાન્ય છે. વિશેષજ્ઞોના મતે આ ક્લાઈમેટ ચેન્જના કારણે થઇ રહેલી ઘટના છે. કેન્યાની 100% ખેતી વરસાદ ઉપર આધારિત છે.