હવામાન વિભાગ દ્વારા આજથી રાજ્યમાં ત્રણ દિવસ સુધી ભારે વરસાદની આગાહી કરી છે. આમ છેલ્લા થોડા સમયથી રાજ્યમાં વિરામ બાદ ફરી હવામાન વિભાગ દ્વારા ભારે વરસાદની આગાહી કરવામાં આવી છે.
જેમાં આજે ઉત્તર, દક્ષિણ અને મધ્ય ભાગમાં વરસાદની શક્યતા જણાવવામાં આવી છે. જેમાં અમદાવાદ, ખેડા, વડોદરા, દાહોદ અને છોટા ઉદેપુરમાં પણ વરસાદ પડે તેવી સંભાવના વ્યક્ત કરવામાં આવી છે.
જ્યારે ઉત્તર ગુજરાતના મહેસાણા, બનાસકાંઠા અને સાબરકાંઠાના અનેક વિસ્તારમાં વરસાદની શક્યતા છે. જ્યારે સૌરાષ્ટ્રની વાત કરીએ તો ભાવનગર, બોટાદ અને સુરેન્દ્રનગરમાં વરસાદ પડી શકે છે. દક્ષિણ ગુજરાતના સુરત, નવસારી અને વલસાડમાં મધ્યથી ભારે વરસાદની આગાહી કરવામાં આવી છે.
અરવલ્લી જિલ્લામાં આજરોજ વહેલી સવારથી વરસાદી માહોલ સર્જાયો છે. શામળાજી, ભિલોડામાં ગાજવીજ સાથે ધોધમાર વરસાદનું આગમન થયું છે. જ્યારે માલપુરામાં ધીમીધારે વરસાદ વરસતાં વાતાવરણમાં ઠંડક પ્રસરી ગયેલી જોવા મળી છે. અરવલ્લીના ભિલોડામાં બે કલાકમાં 2 ઇંચ અને ધનસુરામાં 1 ઇંચ વરસાદ ખાબક્યો છે.
સાબરકાંઠાના હિંમતનગરમાં મુશળધાર વરસાદનું આગમન થયુ છે. ભારે પવન સાથે હિંમતનગરમાં ધોધમાર વરસાદ વરસ્યો છે. હવામાન વિભાગે રાજ્યમાં ભારે વરસાદની આગાહી કરી છે. હવામાન વિભાગની આગાહી બાદ હવે રાજ્યના અનેક જિલ્લાઓમાં વરસાદનું આગમન થયું છે. લાંબા વિરામ બાદ વરસાદ થતા ખેડૂતોમાં ખુશીનો માહોલ જોવા મળ્યો છે.
જ્યારે બીજી તરફ મહીસાગરની વાત કરીએ તો કડાણામાં એક ઇંચ, સંતરામપુરમાં અડધો ઇંચ તેમજ ખાનપુર, લુણાવાડામાં પણ વરસાદ વરસ્યો છે. મોડી રાતથી જિલ્લામાં વરસાદ વરસી રહ્યો છે.
વડોદરા શહેરમાં સવારથી વરસાદી માહોલ
વડોદરા શહેરમાં વહેલી સવારથી વરસાદી માહોલ વચ્ચે ધીમીધારે વરસાદ શરૂ થયો છે. હવામાન વિભાગની વરસાદની આગાહી છે. ત્યારે શહેરના મોટાભાગના વિસ્તારમાં ઝરમર વરસાદ પડી રહ્યો છે. 10 દિવસના વિરામ બાદ શહેરમાં વરસાદે ફરી એન્ટ્રી મારી છે. જેમાં રાજમહેલ રોડ, રાવપુરા, માંજલપુર, મકરપુરા, સમા વિસ્તાર, ફતેહગંજ અને કારેલીબાગ વિસ્તારમાં વરસાદી માહોલ સર્જાયો છે.