ગુજરાતમાં આગામી 5 દિવસ ભારે વરસાદની આગાહી કરવામાં આવી છે. રાજસ્થાન પર વરસાદી સિસ્ટમ ફરી સક્રિય થતા પૂર્વ-મધ્ય ગુજરાત અને દક્ષિણ ગુજરાતમાં ભારે વરસાદની આગાહી કરવામાં આવી છે. જ્યારે સૌરાષ્ટ્રમાં પણ ભારે વરસાદ પડી શકે છે. આગામી 3થી 5 સપ્ટેમ્બરથી ઉત્તર ગુજરાતમાં ભારે વરસાદની આગાહી કરવામાં આવી છે.
બનાસકાંઠાના પાલનપુરમાં મોડીરાત્રે ધોધમાર વરસાદ પડ્યો છે. જેના કારણે ગણેશ પંડાલોમાં પાણી ભરાઇ ગયા હતા. ગણેશ પંડાલો ભીંજાઇ ગયા હતા. જ્યારે શહેરના અનેક વિસ્તારોમાં વીજળી પણ ડૂલ થઇ ગઇ છે.
બનાસકાંઠાના ઉપરવાસમાં ભારે વરસાદના કારણે ધાનેરામાં આવેલી રેલ નદીમાં સતત પાણીની આવક થઇ રહી છે. બે વર્ષ બાદ રેલ નદી વહેતી થઇ છે. રેલ નદીમાં નવા નીર આવતા ખેડૂતો ખુશ છે. 2017 પછી પહેલીવાલ રેલ નદીમાં પાણી આવ્યું છે. ઉપરવાસમાં 24 કલાકમાં પડેલા વરસાદના કારણે રેલ નદી બે કાંઠે વહી રહી છે.
જામનગર જિલ્લામાં વરસાદનું ફરી આગમન
જામનગર જિલ્લામાં વિરામ બાદ ફરી એકવાર મેઘરાજા મનમુકીને વરસ્યાં છે. છેલ્લા 24 કલાકમાં કાલાવડમાં અઢી ઈંચ વરસાદ ખાબક્યો છે. લાલપુરમાં 1 ઈંચ,જામજોધપુરમાં 1 ઈંચ વરસાદ પડયો છે. ધ્રોલમાં અડધો ઈંચ વરસાદ નોંધાયો છે. સાર્વત્રિક વરસાદ થતા ખેડૂતોમાં ખુશીની લહેર જોવા મળી રહી છે.
કચ્છમાં નલિયા-નખત્રાણાને જોડતો રોડ ધોવાયો
કચ્છમાં નલિયાથી નખત્રાણાને જોડતો રોડ ધોવાઇ ગયો છે. બીટા નજીક નદીના પાણી મુખ્ય રોડ પર ફરી વળ્યા હતા. જેના કારણે રોડને બંધ કરવાની ફરજ પડી. જો કે રોડ બંધ થતા લોકોને ભારે હાલાકી પડી રહી છે, વાહનચાલકોને 25 કિમી ફરીને જવું પડી રહ્યું છે.
કચ્છના ભુજમાં ભારે વરસાદ થતા હમીરસર તળાવમાં પાણીની આવક થઈ છે. ઉપરવાસમાં ભારે વરસાદ થતા તળાવમાં નવા નીર આવ્યા છે. તળાવમાં નવા નીર આવતા સૌંદર્યં ખીલી ઉઠ્યું છે. તળાવનો નજારો જોવા માટે મોટી સંખ્યામાં સહેલાણીઓ ઉમટ્યા છે.
અરવલ્લીમાં વરસાદનું આગમન
અરવલ્લીમાં છેલ્લા 24 કલાકમાં સાર્વત્રિક વરસાદ નોંધાયો છે. અરવલ્લીના મોડાસા અને ભિલોડામાં દોઢ ઇંચ વરસાદ પડ્યો છે. જ્યારે ધનસુરામાં એક ઇંચ, મેઘરજ અને માલપુરમાં અડધો ઇંચ વરસાદ પડ્યો છે. માલપુરના ગ્રામીણ વિસ્તારમાં 3 ઇંચ વરસાદ ખાબક્યો છે.
દ્વારકા જિલ્લામાં સાર્વત્રિક 4 ઇંચ વરસાદ
દ્વારકામાં મોડી રાત દરમિયાન ધોધમાર વરસાદ વરસ્યો હતો. જિલ્લામાં સાર્વત્રિક 4 ઈંચ જેટલો વરસાદ નોંધાયો. જિલ્લાના ખંભાળિયા તાલુકાના કેશોદના વિંઝલપરમાં 4 ઈંચ, ઉગમણા બારા ગામમાં 3 ઈંચ, કલ્યાણપુર તાલુકાના લાંબા ગામમાં 2 ઈંચ વરસાદ નોંધાયો. વિરામ બાદ વરસાદનું આગમન થતા ખેડૂતોમાં ખુશીનો માહોલ જોવા મળ્યો છે.
રાજકોટ શહેરમાં 7 ઇંચ વરસાદ ખાબક્યો
રાજકોટ શહેરમાં 7 ઇંચ જેટલો વરસાદ ખાબક્યો છે. ભારે વરસાદના કારણે લક્ષ્મીનગર અને પોપટપરા નાળું બંધ કરી દેવાયું છે. મહિલા કોલેજે અન્ડરબ્રિજનું નાળું બંધ કરી દેવાયું છે. સાવચેતીના ભાગરૂપે ફાયર બ્રિગેડની ટીમ અને મનપાનો વિજિલન્સ પોલીસ સ્ટાફ પણ તૈનાત કરી દેવાયો છે. શહેરમાં નીચાણવાળા વિસ્તારોમાં પાણી ભરાઇ ગયા છે. શહેરમાં હાલ ધીમીધારે વરસાદ હજુ ચાલું છે.
આ તરફ મોરબીમાં પણ રાતથી વરસાદી માહોલ સર્જાયો છે. મોરબી જિલ્લામાં ધીમીધારે વરસાદ વરસી રહ્યો છે. જેના કારણે ચો તરફ લિલોતરી પથરાઈ છે. તો ધીમીધારે વરસાદ વરસતાં ખેડૂતોમાં ખુશીની લહેર છવાઈ ગઈ છે.