હવામાન વિભાગ દ્વારા આગામી 4 દિવસ ભારે વરસાદની આગાહી આપવામાં આવી છે. આ સાથે હવામાનની વિશેષ માહિતી આપતી વિન્ડી અને સ્કાયમેટના વેબસાઇટના જણાવ્યા અનુસાર રાજ્યમાં આગામી ત્રણ દિવસ અલગ-અલગ જગ્યાઓ પર ભારેથી અતિભારે વરસાદની આગાહી કરવામાં આવી છે.
ઉલ્લેખનીય છે કે હવામાન વિભાગ દ્વારા આજથી રાજ્યમાં ત્રણ દિવસ સુધી ભારે વરસાદની આગાહી કરવામાં આવી છે. આમ છેલ્લા થોડા સમયથી રાજ્યમાં વિરામ બાદ ફરી હવામાન વિભાગ દ્વારા ભારે વરસાદની આગાહી કરવામાં આવી છે. જેમાં આજે ઉત્તર, દક્ષિણ અને મધ્ય ભાગમાં વરસાદની શક્યતા જણાવવામાં આવી છે.
જેમાં અમદાવાદ, ખેડા, વડોદરા, દાહોદ અને છોટા ઉદેપુરમાં પણ વરસાદ પડે તેવી સંભાવના વ્યક્ત કરવામાં આવી છે. જ્યારે ઉત્તર ગુજરાતના મહેસાણા, બનાસકાંઠા અને સાબરકાંઠાના અનેક વિસ્તારમાં વરસાદની શક્યતા છે. જ્યારે સૌરાષ્ટ્રની વાત કરીએ તો ભાવનગર, બોટાદ અને સુરેન્દ્રનગરમાં વરસાદ પડી શકે છે. દક્ષિણ ગુજરાતના સુરત, નવસારી અને વલસાડમાં મધ્યથી ભારે વરસાદની આગાહી કરવામાં આવી છે.